Read Batak Toba 1 MUSA 45 Bible Online

1 MUSA 45 - Batak Toba bible

1 MUSA 45

¹I. [1] Jadi ndang tartaon si Josep be sihol ni rohana maradophon sude angka na jongjong di lambungna, gabe dijouhon ma: Paruar hamu ma sude halak sian lambungkon! Jadi ndang adong manang ise na jongjong di lambungna, di na pinatandahon ni si Josep ibana tu angka hahana i.

²Dung i dipangiar ma soarana tumatangis, pola dibege halak Misir, ro di isi ni bagas ni raja Firaun umbegesa.

³Dung i ninna si Josep ma mandok angka hahana i: Ahu do si Josep, mangolu dope amanta i? Jadi ndang haalusan angka hahana i ibana, ai tarhatotong do rohanasida mida bohina i.

⁴Dung i ninna si Josep ma mandok angka hahana i: Ua pajonok hamu ma tu lambungkon; gabe dipajonok nasida ma. Jadi ninna ibana ma: Ahu do si Josep, anggimuna, na ginadismuna i tu tano Misir.

⁵On pe, unang mabiar hamu, jala unang serbeng matamuna, ala ginadismuna i ahu tuson, ai mangarade hangoluanmuna, umbahen disuru Debata ahu parjolomuna.

⁶Ai padua taon on dope masa haleon di tano on, alai lima taonnari dope na so masa saburon manang gotilon.

⁷Alai disuru Debata do ahu parjolomuna, pajophon di hamu ebaeba di tano on dohot pangoluhon hamu, mambahen haluaon bolon.

⁸On pe, ndada hamu marsuru ahu tuson, Debata do, dipabangkit do ahu gabe ama ni raja Firaun, dohot gabe induk ni sandok bagasna, jala pangarajai di sandok tano Misir.

⁹Asa pahatop hamu ma ne nangkok tu damang i, paboa hamu ma tu ibana: Songon on do tona ni anakmu, si Josep: Dipabangkit Debata do ahu gabe raja ni sandok tano Misir; tuat ma ho mandapothon ahu, unang togangtogangon.

¹⁰Maringan di tano Gosen ma ho, asa jonok di lambungku, ho dohot anakmu dohot angka pahompum, ro di birubirum dohot lombum dohot nasa na di ho.

¹¹Ahu do marmuduhon ho disi, ai lima taonnari dope haleon on, asa unang raparan ho dohot isi ni bagasmu, ro di sude na di ho.

¹²Antong matamuna dohot mata ni anggingki, si Benjamin i, marnidasa, paboa apala pamanganku manonahon hata i tu hamu.

¹³Paboa hamu ma tu damang i sude hasangaponku di tano Misir, ro di sude na niidamuna i. Pahatop hamu ma ne tuat tuson rap dohot amanta.

¹⁴Dung i dihaol ma rungkung ni si Benjamin, anggina i huhut tangis, si Benjamin i pe, sai tumatangis do mangkaol rungkungna.

¹⁵Dung i diumma si Josep ma sude angka hahana i huhut tumatangis be; dung pe salpu i, asa mangkatai angka hahana i dohot ibana. II.

¹⁶Dung i tarbortik ma barita i tu bagas ni raja Firaun, angka ninna do: Nunga ro angka haha ni si Josep; jadi denggan ma roha ni raja Firaun dohot angka naposona i.

¹⁷Dung i ninna raja Firaun ma mandok si Josep: Dok ma tu angka hahami, songon on ma bahen hamu: Sorati hamu ma angka halodemuna i, borhat ma hamu, asa gira sahat hamu tu tano Kanaan.

¹⁸Dung i boan hamu ma amamuna dohot ripemuna mandapothon ahu, asa hulehon tu hamu na dumenggan di tano Misir, asa dipangan hamu miak ni tano on.

¹⁹Antong sahat tu ho ma i, bahen hamu ma songon on: Buat hamu ma sian tano Misir angka hureta hundulan ni anakkonmuna dohot jolmamuna i, boan hamu dohot amamuna ro tuson.

²⁰Jala unang habot rohamuna mida ugasanmuna i, ai gok di hamu do na denggan ni sandok tano Misir on. III.

²¹Jadi dibahen angka anak ni si Israel ma songon i, diparlehon si Josep ma angka hureta tu nasida marningot pandok ni raja Firaun, dilehon tu nasida dohot bohal di dalan.

²²Diganupi nasida abit sasalin be, alai anggo tu si Benjamin tolu ratus rupia dohot lima salin abit dilehon.

²³Ditongoshon ma angkup ni di amana i sorat sampulu halode tunggal, angka na mangusung na dumenggan i sian tano Misir, dohot sampulu halode boruboru, angka siusung eme, sagusagu dohot sipanganon di amana i di tongan dalan.

²⁴Asa dipaborhat ma angka hahana i, gabe laho nasida; alai ninna do mandok nasida: Unang marbadai hamu di tongan dalan.

²⁵Jadi nangkok ma nasida sian tano Misir, gabe sahat nasida tu tano Kanaan, tu si Jakkob, amanasida i.

²⁶Jadi dibaritahon nasida ma tu ibana, angka ninna ma: Mangolu dope si Josep, jala ibana do sigomgom saluhut tano Misir; alai diparotootoi roha ni si Jakkob do i, ai ndang dihaporseai hatanasida i.

²⁷Alai dung dihatahon nasida tu ibana sude hata ni si Josep, angka na tinonahonna i tu nasida, diida dohot hureta, angka na tinongoshon ni si Josep mangusung ibana, gabe tarhilas ma tondi ni si Jakkob, amanasida i.

²⁸Dung i ninna si Israel ma: Taho ma i, mangolu dope hape si Josep anakki! Borhat ma ahu, asa huida ibana, tagan so mate dope ahu.