Read Batak Toba 1 MUSA 46 Bible Online

1 MUSA 46 - Batak Toba bible

1 MUSA 46

¹I. [1] Asa borhat ma si Israel dohot sude na di ibana i. Jadi dung sahat ibana ro di Berseba, gabe dipelehon ma angka pelean tu Debata ni amana si Isak i.

²Dung i didok Debata ma tu si Israel marhitehite pangungkapon bornginna i, ninna ma: Jo, ale Jakkob, Jakkob! Dison do ahu ninna ibana.

³Dung i ninna ma: Ahu do Debata. Debata ni amam, unang ho mabiar tuat tu tano Misir; ai gabe bangso na bolon do ho tumpahanku disi.

⁴Hudongani pe ho tuat tu tano Misir, jala sai na togihononku do ho nangkok sogot, ingkon si Josep do mangampehon tanganna tu matam.

⁵Dung i borhat ma si Jakkob sian Berseba, jala ditogihon angka anak ni si Israel ma si Jakkob, amanasida i, dohot angka anakkonnasida ro di jolmanasida, di hureta, angka na tinongos ni raja Firaun mamboan ibana.

⁶Diboan ma dohot pinahannasida, ro di sinamotnasida, angka na sinamotsamotnasida i di tano Kanaan, jadi sahat ma nasida tu tano Misir. Si Jakkob ro di sude pinomparna i.

⁷Angka anakna dohot angka pahompuna, angka boruna dohot angka pahompuna boruboru, ro di sude pinomparna, diboan tu tano Misir rap dohot ibana. II.

⁸Jala on ma angka goar ni anak ni si Israel, angka na tolhas tu tano Misir i: Si Jakkob dohot angka anakna i: Buhabaju ni si Jakkob, i ma si Ruben.

⁹Angka anak ni si Ruben: Si Hanok, si Pallu, si Hezron dohot si Karmi.

¹⁰Angka anak ni si Simeon: Si Jemuel, si Jamin, si Ohad, si Jakin, si Zohar dohot si Saul, tubu ni boru Kanaan.

¹¹Angka anak ni si Lepi: Si Gerson, si Kohat dohot si Merari.

¹²Angka anak ni si Juda: Si Er, si Onan, si Sela, si Peres dohot si Jara. Alai anggo si Er dohot si Onan mate do di tano Kanaan. Ia anak ni si Peres: Si Hezron dohot si Hamul.

¹³Angka anak ni si Isasar: Si Tola, si Pua, si Job dohot si Simron.

¹⁴Angka anak ni si Zebulon: Si Sered, si Elon dohot si Jalel.

¹⁵I ma pinompar ni si Lea, angka na tinubuhonna di si Jakkob di Padang-Aram, angkup ni si Dina, boruna i. Sude nasida, angka anakna dohot boruna, tolupulu tolu halak do.

¹⁶Angka anak ni si Gad: Si Sipion, si Haggi, si Suni, si Esbon, si Eri, si Arodi dohot si Areli.

¹⁷Angka anak ni si Aser: Si Innah, si Isha, si Ishi, si Beeria dohot si Jara, ibotonasida i; ia angka anak ni si Beeria: Si Heber dohot si Malkiel.

¹⁸I ma pinompar ni si Zilpa, na nilehon ni si Laban tu si Lea, boruna i, asa na sampulu onom halak i do ditubuhon ibana di si Jakkob.

¹⁹Angka anak ni si Rahel, jolma ni si Jakkob: Si Josep dohot si Benjamin.

²⁰Ia tubu ni si Josep di tano Misir, angka na tinubuhon ni si Asnat, boru ni si Potipera, malim di huta On di ibana: Si Manasse dohot si Epraim.

²¹Angka anak ni si Benjamin: Si Bela, si Beker, si Asbel, si Gera, si Naaman, si Ehi, si Roseh, si Muppin, si Hupim dohot si Ared.

²²I ma pinompar ni si Rahel, angka na tinubuhonna di si Jakkob, sampulu opat halak saluhutna.

²³Ia anak ni si Dan: Si Husim.

²⁴Angka anak ni si Naptali: Si Jazeel, si Guni, si Jeser dohot si Shillem.

²⁵I ma pinompar ni si Bilha, na nilehon ni si Laban tu si Rahel, boruna i, asa na pitu halak i tinubuhonna di si Jakkob.

²⁶Sude jolma, angka na tolhas tu tano Misir rap dohot si Jakkob, angka na ruar sian gontingna, so padohot jolma ni angka anak ni si Jakkob, onompulu onom halak saluhutna.

²⁷Ia anak ni si Josep angka na tubu di ibana di tano Misir, dua halak do, asa boho pitupulu halak pinompar ni si Jakkob saluhut, angka na tolhas i tu tano Misir. III.

²⁸Dung i disuru si Jakkob ma si Juda pajolohon manopot si Josep, asa didokkon ro tu Gosen; jadi tolhas ma nasida tu tano Gosen.

²⁹Dung i dipasang si Josep ma huretana laho nangkok tu Gosen manjumpangkon si Israel, amana i. Jadi dung masipaidaan nasida, dihaol si Josep ma rungkungna, huhut sai tumatangis.

³⁰Dung i ninna si Israel ma mandok si Josep: Agia tung nuaeng ahu mate, asal dung huida bohim, laos mangolu dope ho hape.

³¹Alai ninna si Josep ma mandok angka hahana i dohot tu isi ni bagas ni amana i: Nangkok ma ahu paboahonsa tu raja Firaun, jala dohononku ma tu ibana: Nunga ro angka hahaanggingku dohot isi ni bagas ni damang i, na di tano Kanaan na sai laon, mandapoti ahu.

³²Angka halak sipormahan birubiru do nasida, ai pardorbiaon do diula nasida, jala diboan nasida do birubirunasida dohot lombunasida, ro di sude na di nasida i.

³³On pe, molo dijou raja Firaun i hamu, jala didok: Aha do ulaonmuna i?

³⁴Songon on ma dok hamu: Halak pardorbia do angka naposomon sian sietehetehonnami rasirasa nuaeng, songon i hami, nang ompunami, asa anggiat dipaian hamu di tano Gosen, ai marbiasbias do halak Misir mida halak sipormahan birubiru.