Read Batak Toba 1 MUSA 5 Bible Online

1 MUSA 5 - Batak Toba bible

1 MUSA 5

¹I. [1] On ma buku ni angka sundut ni si Adam, di ari panompaon ni Debata di si Adam, tudos tu rupa ni Debata ibana ditompa.

²Baoa dohot boruboru nasida ditompa, jala dipasupasu nasida, jala dibahen goarnasida jolma, di ari panompaonnasida i. II.

³Jadi dung saratus tolupulu taon mangolu si Adam, tubu ma anakna, tudos tu rupana, songon pangalahona, dibahen ma goarna si Set.

⁴Ia umur ni si Adam, dungkonsa ditubuhon si Set ualu ratus taon do, jala ditubuhon anak dohot boru.

⁵Jadi sia ratus tolupulu taon ma sandok umur ni si Adam mangolu, dung i mate ma ibana.

⁶Dung saratus lima taon leleng ni si Set mangolu, ditubuhon ma si Enos.

⁷Ia leleng ni si Set mangolu, dung ditubuhon si Enos, ualu ratus pitu taon do, jala ditubuhon anak dohot boru.

⁸Jadi sia ratus sampulu dua taon ma sandok umur ni si Set, dung i mate ma ibana.

⁹Dung siapulu taon leleng ni si Enos mangolu, ditubuhon ma si Kenan.

¹⁰Ia leleng ni si Enos mangolu, dung ditubuhon si Kenan, ualu ratus sampulu lima taon do, jala ditubuhon anak dohot boru.

¹¹Jadi sia ratus lima taon sandok umur ni si Enos, dung i mate ma ibana.

¹²Dung pitupulu taon leleng ni si Kenan mangolu, ditubuhon ma si Mahalaleel.

¹³Ia leleng ni si Kenan mangolu dung ditubuhon si Mahalaleel ualu ratus opatpulu taon do, jala ditubuhon anak dohot boru.

¹⁴Jadi sia ratus sampulu taon ma sandok umur ni si Kenan, dung i mate ma ibana.

¹⁵Dung onompulu lima taon leleng ni si Mahalaleel mangolu, ditubuhon ma si Jared.

¹⁶Ia leleng ni si Mahalaleel mangolu, dung ditubuhon si Jared, ualu ratus tolupulu taon, jala ditubuhon anak dohot boru.

¹⁷Jadi ualu ratus siapulu lima taon sandok umur ni si Mahalaleel, dung i mate ma ibana.

¹⁸Dung saratus onompulu dua taon leleng ni si Jared mangolu, ditubuhon ma si Henok.

¹⁹Ia leleng ni si Jared mangolu, dung ditubuhon si Henok, ualu ratus taon, jala ditubuhon anak dohot boru.

²⁰Jadi sia ratus onompulu dua taon sandok umur ni si Jared, dung i mate ma ibana.

²¹Dung onompulu lima taon leleng ni si Henok mangolu, ditubuhon ma si Metusalah.

²²Jadi dung ditubuhon si Metusalah i, sai marparange, mardonganhon Debata ma si Henok tolu ratus taon lelengna, jala ditubuhon anak dohot boru.

²³Jadi tolu ratus onompulu lima taon sandok umur ni si Henok.

²⁴Jala sai marparange, mardonganhon Debata ma si Henok, dung i ndang disi be ibana, ai dialap Debata do ibana.

²⁵Dung saratus ualupulu pitu taon leleng ni si Metusalah mangolu, ditubuhon ma si Lamek.

²⁶Ia leleng ni si Metusalah mangolu, dung ditubuhon si Lamek, pitu ratus ualupulu dua taon do, jala ditubuhon anak dohot boru.

²⁷Jadi sia ratus onompulu sia taon sandok umur ni si Metusalah, dung i mate ma ibana.

²⁸Dung saratus ualupulu dua taon leleng ni si Lamek mangolu, ditubuhon ma sada anak.

²⁹Dung i dibahen ma goarna si Noak, ninna ma: On ma mangapul hita di ulaonta dohot di haloloja ni tanganta di tano on, na hona toru ni Jahowa.

³⁰Ia leleng ni si Lamek mangolu, dung ditubuhon si Noak, lima ratus siapulu lima taon do, jala ditubuhon anak dohot boru.

³¹Jadi pitu ratus pitupulu pitu taon sandok umur ni si Lamek, dung i mate ma ibana.

³²Dung lima ratus taon umur ni si Noak, ditubuhon ma si Sem, si Ham dohot si Japet.