Read Batak Toba 2 SAMUEL 12 Bible Online

2 SAMUEL 12 - Batak Toba bible

2 SAMUEL 12

¹I. [1] Dung i disuru Jahowa ma si Natan manopot si Daud. Jadi dung sahat ibana tu jolona, ninna ma mandok ibana: Adong ma dua halak di na sahuta, sada na mora, sadanari na pogos.

²Ia di na mora i mansai torop do birubiru dohot lombu.

³Alai anggo di na pogos i ndang adong dungkon ni sada anak ni birubiru, na tinuhorna, jala dipadimundimun, asa balga di lambungna rap dohot anakna i muse; dipahan do i tu pangananna jala dipasobur tu panginumanna, dipapodompodom tu ampuanna, hira doshon boruna dibahen.

⁴Dung i ro ma sahalak pardalandalan tuli sian na mora i, gabe diolani anggo mambuat sian birubiru na, dohot sian lombuna, laho marhobas sipanganon tu halak pardalandalan na ro manopot ibana; tung dibuat do anak ni birubiru ni halak na pogos i jala dihobas di baoa na ro manopot ibana.

⁵Jadi marpiarpiar ma rimas ni si Daud mida baoa i, ninna ma mandok si Natan: Songon sintongna mangolu Jahowa, ingkon marutang hosa baoa na mambahen songon i. [134†]

⁶Angkup ni ingkon lompit opat hali gararonna anak ni birubiru i ala binahenna songon i, ala so alang rohana. [135†]

⁷Dung i ninna si Natan ma mandok si Daud: Ho do baoa i! Songon on do hata ni Jahowa, Debata ni Israel: Nunga Ahu mamiahi ho bahen raja gumomgom Israel, jala nunga Ahu paluahon ho sian tangan ni si Saul. [136†]

⁸Nunga pola hubasabasahon tu ho dohot isi ni bagas ni tuanmu, ro di angka jolma ni tuanmu tu bagasan ampuanmu, jala nunga hulehon tu ho pinompar ni Israel dohot Juda, jala tung sura maotikku dope i tambaanku dope nian tu ho manang sadianari. [137†]

⁹Boasa tung parhamudaonmu hata ni Jahowa laho mangulahon sogo ni rohana? Ia si Uria marga Het i, nunga dibunu ho marhitehite podang, jala jolmana i nunga dibuat ho bahen jolmam; alai anggo ibana nunga dibunu ho marhitehite podang ni halak Amon. [138†]

¹⁰On pe ndang be sumurut podang i sian jabum ro di salelenglelengna, ala naung ditoisi ho Ahu, jala dibuat ho jolma ni si Uria, marga Het i bahen jolmam. [139†]

¹¹Songon on do hata ni Jahowa: Ida ma, Ahu sandiri pahehehon dompak ho jea sian pinomparmu sandiri, jala buatonku angka jolmam sian jolo ni matam, jala lehononku angka i tu pedanmu, asa diangkupi angka jolmam modom di adopan ni mata ni ari on. [140†]

¹²Ai na niulahonmi di na holip, papataronku ma i di adopan ni sandok Israel dohot di adopan ni mata ni ari. [141†]

¹³Dung i ninna si Daud ma mandok si Natan: Nunga mardosa ahu dompak Jahowa! Jadi ninna si Natan ma mandok si Daud: Antong nunga disesa Jahowa dosami, ndang be mate anggo ho. [142†]

¹⁴Alai tahe ala naung manginsahi situtu angka musu i di Jahowa dibahen ho marhite sian hata on, ingkon mate anggo na tubu di ho. [143†] II.

¹⁵Dung i muli ma anggo si Natan tu jabuna. Alai disahiti Jahowa ma posoposo i, na tinubuhon ni jolma ni si Uria di si Daud, gabe matemate ne.

¹⁶Dung i diparhurajai si Daud ma Debata ala posoposo i, huhut marpuasa si Daud, jala masuk tu bilutna, laos peak di tano manipat sabornginna i.

¹⁷Dung i hehe ma angka sintua ni jabuna manopot ibana, naeng pahehehon ibana nian sian tano i; alai ndang olo ibana, jala ndang olo ibana mangan sipanganon rap dohot nasida.

¹⁸Tole muse papituarihon, mate ma posoposo i. Jadi mabiar ma angka naposo ni si Daud paboahon tu ibana naung mate posoposo i, ai ninna rohanasida do: Ida ma, uju mangolu dope posoposo i hupangkulingi hami ibana, hape ndang ditangihon soaranami; nda lam maningkotningkot ma ibana molo hudok hami tu ibana: Nunga mate posoposo i.

¹⁹Jadi dung diida si Daud masihusipan angka naposona i, mamoto ma ibana naung mate posoposo i, gabe didok si Daud ma mandok angka naposona i: Atehe nunga mate posoposo i? Jadi didok nasida ma: Nunga mate tutu.

²⁰Dung i hehe ma si Daud sian tano i jala marsuap huhut marpangir jala disalin pangkeanna, jala masuk ibana tu bagas ni Jahowa, asa martangiang. Jadi dung mulak ibana tu jabuna, didokkon ma padirihon sipanganon di ibana, laos mangan ibana.

²¹Jadi ninna angka naposona ma mandok ibana: Dia do i na binahenmon? Uju mangolu dope posoposo i, marpuasa do ho jala tumatangis, alai ia dung mate posoposo i, hehe do ho jala mangan sipanganon.

²²Dung i ninna rajai ma: Uju mangolu dope posoposo i, marpuasa do ahu tutu jala tumatangis, ai ninna rohangku do: Ise umbotosa, atik tung marpangulahi roha ni Jahowa mida ahu, anggiat laos mangolu posoposo i. [144†]

²³Alai anggo dung mate nuaeng aha gunana marpuasa ahu? Tung tarbahen ahu be mangalap ibana mulak? Ahu nama mandapothon ibana, alai anggo ibana ndang tagamon be mulak tu ahu.

²⁴Jadi dung diapuli si Daud roha ni si Batseba jolmana i, ditopot ma nasida, laos rap modom. Jadi tubuan anak ma nasida muse, dibahen ma goarna si Salomo. Holong roha ni Jahowa anggo mida ibana. [145†]

²⁵Dung i dipaguruhon ma ibana tu panurirang Natan, na manggoar ibana Jedija, ala hasudungan ni Jahowa ibana. [146†] III.

²⁶Sai marmusu anggo si Joab dompak Rabba ni halak Amon, laos tartaban huta hundulan ni harajaon i. [147†]

²⁷Dung i disuru si Joab ma angka suruanna manopot si Daud huhut mandok: Nunga patu hubahen Rabba, nunga hutaban huhut huta di topi ni aek.

²⁸Antong haru papungu ma pasipasi ni parangan i jala tungkum huta i, laos papatu, asa unang ahu papatu huta i, jala unang apala goarhu tarjou tusi.

²⁹Jadi dipapungu si Daud ma sude parangan i jala borhat dompak Rabba, asa marporang dompak huta i, laos dipapatu.

³⁰Dung i dibuat ma tumpal ni rajanasida sian uluna, ia boratna sada talenta sere padohot angka mata intan, jadi dibahen ma i tu ulu ni si Daud, diboan huhut mansai godang tabantaban sian huta i.

³¹Diparuar huhut situan natorop, isi ni huta i, jala dipampeakkon nasida tu toru ni gargaji dohot tu toru ni angka hureta bosi pardegean dohot tu toru ni angka tangke bosi jala dimosokkon nasida tu Molok i. Suang songon i dibahen tu saluhut huta ni halak Amon. Dung i mulak ma si Daud dohot sandok parangan i tu Jerusalem. [148†]