Read Batak Toba 2 SAMUEL 22 Bible Online

2 SAMUEL 22 - Batak Toba bible

2 SAMUEL 22

¹Dung i dihatahon si Daud ma tu Jahowa angka hata ni ende on, di ari dung na pinalua ni Jahowa ibana sian tangan ni saluhut musuna dohot sian tangan ni si Saul. [287†]

²Ninna ma: Jahowa do dolok batu di ahu dohot haporusanku, jala sipalua ahu. [288†]

³Debata do partanobatoanku, marhaposan tu ibana do ahu, lombulombungku dohot tanduk ni partuaonku, parondingondinganku dohot haporusanku, sipartumpak di ahu, Ibana palua ahu sian uhum gogo.

⁴Sai hupajoujou do Jahowa, na tama sipujion i, jadi malua ma ahu sian angka musungku.

⁵Nunga pola dihaliangi angka ombak ni hamatean ahu, angka sunge ni hajahaton manonggoti ahu.

⁶Nunga pola dihaliangi angka rante ni banua toru ahu, dilungkupi angka jorgong ni hamateani ahu.

⁷Jadi di na targogot i ahu, hujou do Jahowa, jala hupangiar anggukku tu Debatangku, jadi ditangihon Ibana soarangki sian jorona, jala tolhas angguk i tu pinggolna.

⁸Jadi humuntalhuntal ma tano on, lalolalo angka ojahan ni langit, jala humuturhutur, ala tarrimas Ibana. [289†]

⁹Martimpul do timus sian igungna, jala ruar api na mandilatdilat sian pamanganna, gara ni api angka na marnalanala ruar sian Ibana.

¹⁰Dung i dipajomba Ibana ma angka langit, gabe tuat Ibana, jala holom marimpotimpot di toru ni patna. [290†]

¹¹Marsihundul di kerubim ma Ibana huhut habang, jala mangareapreap Ibana di atas habong ni alogo.

¹²Haholomoni do dibahen undungundungna humaliang Ibana, parhobot ni udan dohot ombun do lapelapena.

¹³Sian sondang di adopanna marsijembur angka gara ni api.

¹⁴Mangkuling ronggur sian angka langit dibahen Jahowa, jala dipatubegehon Natumimbul i soarana.

¹⁵Dung i disiorhon Ibana angka sumbiana, jala dipaserak angka musu, sumiksaksiksak hilapna, asa manggaori nasida.

¹⁶Jadi tarida ma angka lubuk ni laut, gabe mullop angka ojahan ni portibi on maradophon pangasupim, ale Jahowa, maradophon pangunsong ni hosa ni igungna.

¹⁷Disurdukkon Ibana tanganna sian ginjang manangkup ahu, mangenet ahu sian angka aek magodang.

¹⁸Ibana paluahon ahu sian musungku na gogo i, sian angka na mangkosom ahu, ala gumogo nasida sian ahu.

¹⁹Dirampok nasida do ahu di ari hinamagongku, alai Jahowa do pangunsandeanku.

²⁰Jala Ibana manogihon ahu tu halambason, Ibana paluahon ahu, ai lomo do rohana mida ahu.

²¹Dibaloshon Jahowa tu ahu hombar tu hatigoranku, hombar tu habontoron ni tanganku tahe dipasuang tu ahu.

²²Ai hujujur do angka dalan ni Jahowa, jala ndang manjahati ahu marbalik sian Debatangku.

²³Ai sai tongtong di jolongku sude angka uhumna, jala ndang hupaholang angka patikna i sian ahu.

²⁴Sai sun do lidang ni rohangku maradophon Ibana, jala sai hujaga do diringku maradophon hajahatonku.

²⁵Jadi dibaloshon Jahowa tu ahu hombar tu hatigoranku, hombar tu halidangonku, na niidana i.

²⁶Asi do roham tu na asi roha i, tobok do Ho maradophon halak na tobok i.

²⁷Bontor do ho dompak na bontor roha i, jala pulos do roham tu pargeduk i. [291†]

²⁸Ai ditumpahi Ho do jolma na dangol i, alai dialo matam do angka na ginjang roha, jala dipajimput Ho nasida. [292†]

²⁹Ai Ho do, ale Jahowa parpalitoanku! Jala dipatiur Jahowa do holom ni parnidaanku.

³⁰Ai mardonganhon Ho tartondong ahu do parduaan ni parangan, jala mangasahon Debatangku tartimbung ahu do parik.

³¹Sun denggan do dalan ni Debata, pita do hata ni Jahowa, Ibana do lombulombu ni sude halak na marhaposan tu Ibana.

³²Ai tung ise ma Debata, dungkon ni Jahowa, jala tung ise tau partanobatoan, dungkon ni Debatanta.

³³Debata do haporusanku na gonting, jala dipatiur do dalanku.

³⁴Ibana mambahen pathu doshon doras ni tini, jala dipajongjong ahu tu angka habuntulonku.

³⁵Ibana mangajari tanganku mangula hamusuon, asa tarbahen botohonku manintak sior haksa.

³⁶Jala dilehon Ho tu ahu lombulombu ni hatuaonmi, jala habasaonmu do patimbul ahu.

³⁷Dipalumbang Ho do langkangku, jadi ndang tarbaliksu mata ni ari ni tothu.

³⁸Sai hulotongi do angka musungku, laos husiaphon nasida, jala ndang mulak ahu, paima sun nasida hurendephon.

³⁹Huropuhi jala hurendephon nasida, jadi ndang tarbahen nasida be hehe, marragean do nasida tu toru ni tothu.

⁴⁰Dihohoshon Ho do pargogo tu ahu mangula hamusuon, dipapatu Ho do angka alongku tu ahu.

⁴¹Jala nunga dipaundar Ho angka musungku, gabe siap hubahen angka na mangkosom ahu.

⁴²Sai manatapnatap nasida humaliang, hape ndang adong sipalua nanggo sahalak, tu Jahowa pe, hape ndang olo Ibana mangalusi nasida.

⁴³Jadi hulamoti ma nasida songon orbuk na di tano i, hulutluti nasida songon gambo di alaman.

⁴⁴Angkup ni nunga dipalua Ho ahu sian parbadaan ni bangsongku, nunga dipabangkit Ho ahu gabe ihutan ni angka bangso parbegu, gari bangso na so hutanda mangoloi ahu. [293†]

⁴⁵Gari halak na pulik marga mangalesemlesem ahu, guru dokku do dioloi nasida.

⁴⁶Merus do angka anak ni na pulik marga, jala angka hitir do nasida ruar sian partanobatoannasida.

⁴⁷Mangolu do Jahowa, jala tama do papujipujion partanobatoanki, jala timbul do Debata ni hatuaonku.

⁴⁸Debata do silehon angka partubolon tu ahu dohot papatuhon angka bangso tu ahu.

⁴⁹Ibana sipalua ahu sian angka musungku, Ho do tongon patimbul ahu maralohon angka alongku, nunga dipalua Ho ahu sian jolma sibahen gogo.

⁵⁰Dibahen i pujionku ma Ho ale Jahowa, di tongatonga ni angka bangso parbegu, jala endehononku ma Goarmu. [294†]

⁵¹Ibana sipatimbul angka hatuaon ni rajana, jala Ibana mambahen asi ni roha tu jolma naung miniahanna i, tu si Daud dohot tu pinomparna i ro di salelenglelengna.