Read Batak Toba 2 SAMUEL 5 Bible Online

2 SAMUEL 5 - Batak Toba bible

2 SAMUEL 5

¹I. [1] Dung i ro be ma sude marga ni Israel manopot si Daud di Hebron, angka ninna ma: Ida ma, sisada holiholi dohot sibuk hian do hami dohot ho. [51†]

²Angkup ni nang na sai laon, uju si Saul dope raja gumomgom hami, nunga ho hian manogihon Israel ruar dohot masuk. Jala nunga didok Jahowa hian mandok ho: Ingkon ho marmahan bangsongku Israel, jala ingkon ho gabe partogi di halak Israel. [52†]

³Jadi ro be ma sude sintua ni Israel manopot rajai di Hebron. Dung i marpadan ma raja Daud tu nasida di Hebron di adopan ni Jahowa, jadi dimiahi nasida ma si Daud bahen raja gumomgom Israel. [53†]

⁴Marumur tolupulu taon do si Daud di na bangkit raja ibana, jala opatpulu taon lelengna ibana mangarajai. [54†]

⁵Di Hebron ibana mangarajai Juda pitu taon onom bulan lelengna, jala di Jerusalem ibana mangarajai sandok Israel dohot Juda tolupulu tolu taon lelengna. [55†] II.

⁶Dung i borhat ma rajai rap dohot paranganna tu Jerusalem mandopang halak Jebusi, na mangingani tano i. Dung i didok angka nasida ma mandok si Daud: Ndang tagamon masuk ho tuson, ingkon paundaron ni halak na mapitung dohot angka na pangpang do ho, lapatanna: Ndang tagamon masuk si Daud tuson.

⁷Hape dipapatu si Daud do benteng Sion, i ma huta ni si Daud.

⁸Ai nunga didok si Daud hian di na sadari i: Manang ise na manaluhon halak Jebusi, ingkon dabuonna tu sampuran do angka na pangpang dohot na mapitung angka na hinagigihon ni roha ni si Daud. Alani umbahen didok halak: Anggo halak na mapitung dohot na pangpang, ndang jadi masuk tu bagasan joro. [56†]

⁹Jadi maringan ma si Daud di bagasan benteng i, jala digoar do i huta ni si Daud. Dung i dipauli si Daud ma partanobatoan humaliang, olat ni Milo sahat ro di bagasan.

¹⁰Dung i lam leleng, lam naek ma hatimbulon ni si Daud, ai didongani Jahowa, Debata Zebaot do ibana. [57†]

¹¹Dung i disuru si Hiram, raja sian Tirus ma angka suruanna manopot si Daud, angka na mamboan hau Ares, tole pande hau dohot tukang mandakdak batu, angka na mamandei bagas ni si Daud. [58†]

¹²Jadi mananda ma si Daud naung pinahot ni Jahowa ibana bahen raja di Israel, jala naung pinatimbulna harajaonna ala ni bangsona Israel.

¹³Dung i ditambai si Daud dope angka parompuan di Jerusalem bahen jolmana, dung ro ibana sian Hebron, jadi tubu dope di si Daud angka anak dohot boru. [59†]

¹⁴Jala on do goargoar ni angka tubuna di Jerusalem: Si Samua, si Sobab, si Natan dohot si Salomo. [60†]

¹⁵Si Ibar, si Elisua, si Nepeg dohot si Japia.

¹⁶Si Elisama, si Eliada dohot si Elipelet. III.

¹⁷Alai dung dibege halak Palistim, naung miniahan si Daud bahen raja gumomgom Israel, nangkok ma sude halak Palistim naeng marburu si Daud. Jadi dung dibege si Daud barita i, tuat ma ibana tu benteng i.

¹⁸Alai marroan ma halak Palistim, jala marserak nasida di rura Repaim.

¹⁹Dung i marsungkun ma si Daud tu Jahowa ninna ma: Na jadi lo ahu nangkok mangalo halak Palistim, jala pasahatonmu do nasida tu bagasan tanganku? Jadi didok Jahowa ma mandok si Daud: Nangkok ma ho, ai sai na pasahatonku do halak Palistim i tu bagasan tanganmu! [61†]

²⁰Dung i sahat ma si Daud tu Baal Perazim, jala ditaluhon si Daud nasida disi, ninna huhut: Nunga dipaserak Jahowa angka musungku di jolongku, songon parserak ni aek magodang; alani umbahen digoar ibana inganan i Baal Perazim (huta parserahan).

²¹Dung i ditinggalhon nasida disi angka ajiajiannasida, gabe dijomput si Daud dohot paranganna angka i. [62†]

²²Alai diulahi halak Palistim muse ma nangkok, jala marserak muse di rura Repaim. [63†]

²³Dung i marsungkun muse ma si Daud tu Jahowa, na mandok: Ndang jadi ho nangkok, ingkon lompitonmu nasida sian pudinasida, asa pajumpang ho dohot nasida tondong ni angka hau balsam.

²⁴Ia dung dibege ho pardorom ni halak pardalan di punsu ni angka hau balsam, rampok ma nasida disi, ai disi ma ruar Jahowa mardalan di jolom laho papatuhon parangan ni halak Palistim. [64†]

²⁵Jadi dibahen si Daud ma songon i, hombar tu tona ni Jahowa tu ibana, gabe dipapatu ma halak Palistim olat ni Geba sahat ro di Gezer.