Read Batak Toba 1 RAJARAJA 17 Bible Online

1 RAJARAJA 17 - Batak Toba bible

1 RAJARAJA 17

¹I. [1] Dung i ro ma hata ni si Elia, halak Tisbi, sian halak paisolat di Gilead, mandok tu si Ahab: Songon sintongna mangolu Jahowa, Debata ni Israel, jala ahu marhalado di jolona, ndang jadi ro nambur manang udan, manang piga taon on, molo so jolo ahu mandokkon! [370†]

²Dung i ro ma hata ni Jahowa mandok tu ibana:

³Laho ma ho sian on jala tondong ma dompak purba, jala martabuni ma ho di lambung sunge Kerit na di bariba ni Jordan.

⁴Ingkon minum sian sunge i ma ho, jala nunga hudokkon angka pidong sigak, asa nasida marmudu do disi. [371†]

⁵Dung i laho ma ibana jala dibahen ma hombar tu hata ni Jahowa, laho ma ibana tutu jala hundul di lambung sunge Kerit na di bariba ni Jordan.

⁶Jadi ro ma angka pidong sigak mamboan tu ibana sagusagu dohot juhut manogotna i dohot bodarina i, jala sian sunge i ibana minum. II.

⁷Dung i marhira sataon lelengna, marsik ma sunge i, ala soada ro be udan di tano i.

⁸Dung i ro ma hata ni Jahowa tu ibana songon on:

⁹Borhat ma ho laho tu Sarpat na mardonokkon Sidon, maringan disi ma ho; ida ma, nunga hudokkon sada parompuan na mabalu disi marmudu ho. [372†]

¹⁰Dung i borhat ma ibana laho tu Sarpat; jadi dung sahat ibana tu harbangan ni huta i, ida ma, adong ma disi sada parompuan na mabalu na marsobansoban. Dung i joujou ma si Elia mandok tu nasida: Ua alap di ahu aek i otik di bagasan tabutabu on, asa minum ahu.

¹¹Alai dung laho nasida naeng mangalap, joujou muse ibana mandok tu nasida songon on: Ua buat di ahu santopik sagusagu di bagasan tanganmu.

¹²Alai ninna parompuan i ma: Songon sintongna mangolu Jahowa, Debatam, ndang adong sagusagu di ahu nanggo sada, nda holan itak sampohul di bagasan hudon, angkup ni miak otik di bagasan guriguri, jala ida ma, na marsobansoban do ahu, asa laho ahu paulihon itak i di ahu dohot di anakki, asa mangan hami na dua dung i mate ma. [373†]

¹³Alai ninna si Elia ma tu nasida: Unang ho mabiar, laho ma ho, bahen ma songon na nidokmu, alai pauli di ahu jumolo sian i sada sagusagu na metmet, jala boan tu ruar di ahu, dung pe i asa pauli di ho dohot di anakmu.

¹⁴Ai songon on do hata ni Jahowa, Debata ni Israel: Ia itak na di bagasan hudon ndang olo suda, jala miak na di bagasan guriguri ndang jadi marsik, paima jumpang ari haroro ni udan tongoson ni Jahowa tu sisik ni tano on. [374†]

¹⁵Dung i laho ma parompuan i, dibahen ma songon na nidok ni si Elia, gabe mangan nasida, nang ibana nang parompuan i ro di isi ni jabuna ariari. [375†]

¹⁶Ia itak na di bagasan hudon ndang olo suda, jala miak na di bagasan guriguri ndang olo marsik, hombar tu hata ni Jahowa, naung pinaboana hian marhite sian si Elia. III.

¹⁷Jadi dung salpu angka jamita ondeng, marsahit ma anak ni parompuan, soranganna i, pola pasang situtu sahitna laos tos hosana.

¹⁸Dung i ninna parompuan i ma tu si Elia: Aha parsaoranku tu ho, ale halak ni Debata? Rupa ro do ho tu ahu laho pasingothon dosangku dohot mambunu anakki? [376†]

¹⁹Dung i ninna si Elia ma mandok nasida: Boan tuson anakmi. Dung i dibuat si Elia ma anakna i sian ampuanna, laos diboan ibana tu ginjang, tu bilut na niingananna i, jala diampehon ibana tu podomanna.

²⁰Dung i joujou ma ibana tu Jahowa, ninna ma: Oale Jahowa, Debatangku! Tung dohot ma parompuan na mabalu on, soranganki marhinamago bahenonmu laho mambunu anakna?

²¹Dung i dipabustang ma ibana tolu hali di ginjang ni dakdanak i huhut joujou tu Jahowa, ninna ma: Ale Jahowa, Debatangku, ua paulak ma hosa ni dakdanak on tu bagasan ibana. [377†]

²²Jadi ditangihon Jahowa ma soara ni si Elia, gabe mulak hosa ni dakdanak i tu bagasan ibana, laos mangolu ibana.

²³Dung i dibuat si Elia ma dakdanak i jala diboan sian bilut parginjang tu toru, jala dilehon ibana tu inana huhut didok si Elia: Ida ma, na mangolu do anakmon. [378†]

²⁴Dung i didok parompuan i ma tu si Elia: Nuaeng pe asa huboto halak ni Debata do ho, jala hasintongan do hata ni Jahowa na ruar sian pamanganmu. [379†]