Read Batak Toba 1 RAJARAJA 20 Bible Online

1 RAJARAJA 20 - Batak Toba bible

1 RAJARAJA 20

¹I. [1] Dung i dipaluhut si Benhadad raja sian Ram ma sandok paranganna, jala tolupulu dua raja angka na hinarana, tole angka hoda dohot hureta porang, jadi nangkok ma ibana, ditungkum ma Samaria, laos diporang do i. [425†]

²Dung i disuru ma angka suruanna manopot si Ahab, raja sian Israel, tu bagasan huta i.

³Asa dohononna tu ibana: Songon on do hata ni si Benhadad: Perakmu dohot serem ahu do nampunasa, angka jolmami dohot anakkonmu angka na ummuli ahu do nampuna nasida.

⁴Dung i ninna raja ni Israel ma mangalusi: Songon na nidokmi do na tutu, ale rajanami, ho do nampuna ahu ro di sude na di ahu.

⁵Dung i diulahi angka suruani ro muse, didok nasida ma: Songon on do hata ni si Benhadad: Nunga nian husuru suruanku mandok tu ho: Perakmu dohot serem dohot angka jolmam ro di anakkonmu ingkon tu ahu do i lehononmu.

⁶Antong marsogot songon on suruonku ma angka naposongku manopot ho, asa disungkapi nasida jabum dohot jabu ni angka naposom, jala nasa ugasan homitan ni roham, ingkon boanor nasida ma i di bagasan tanganna.

⁷Dung i dipaluhut raja sian Israel ma sude sintua ni tano i, didok ma: Ua tanda jala ida hamu, haurahonta do hape na niluluan nian, ai nunga disuru ibana suruanna mangido tu ahu angka jolmangku dohot anakkonku ro di perakku dohot serengku, jala ndang hujua mangalehon angka i tu ibana. [426†]

⁸Dung i sahata ma sude sintua dohot bangso i mandok tu ibana: Unang patangitangi hatahatana jala unang oloi.

⁹Dung i ninna rajai ma tu angka suruan ni si Benhadad: Dok hamu ma tu tuanku rajai: Saluhut naung nidok ni suruanmi parjolo tu ahu naposom, bahenonku do i, alai anggo hata on ndang haoloan ahu. Dung i laho ma angka suruani patolhas alusi tu tuanna.

¹⁰Dung i diulahi si Benhadad muse marsuru suruanna mandok tu ibana: Ingkon marlulu situtu angka debata tu ahu, molo tung singkop orbuk ni Samaria manggohi tangan sandok bangso angka na mangihuthon tu ahu. [427†]

¹¹Dung i ninna raja ni Israel ma mangalusi, dok hamu ma tu rajai: Ndang jadi nian manenganenga halak na manandang podangna, hira songon halak naung mambahen sinjatana tu rompean.

¹²Jadi dung dibege raja Benhadad hata i, tongon ibana minum anggur rap dohot angka raja hinarana di bagasan undungundungna, didok ma tu angka naposona: Haliangi hamu ma huta i! Jadi dihaliangi nasida ma huta i. [428†] II.

¹³Dung i ida ma, ro ma sada panurirang mandapothon si Ahab, raja sian Israel, didok ma: Songon on do hata ni Jahowa: Atehe nunga diida ho musum na deakon? Ida ma, pasahatonku ma i sadarion tu bagasan tanganmu, asa tung ditanda ho Ahu do Jahowa. [429†]

¹⁴Dung i ninna si Ahab ma: Marhite sian ise do? Dung i ninna panurirang i ma: Songon on do hata ni Jahowa: Marhite sian angka naposo ni angka induk marluatluat. Dung i ninna rajai ma: Ise hami jumolo bingkas? Dung i ninna panurirang i ma: Ho do! [430†]

¹⁵Dung i dibilang rajai ma angka naposo ni angka induk i marluatluat, gabe dua ratus tolupulu dua halak toropna, dung salpu nasida, dibilang ma dohot sian sandok bangso i, i ma sude halak Israel, pitu ribu halak. [431†]

¹⁶Dung i ruar ma nasida di hos ni ari. Alai anggo si Benhadad lilian minum anggur sanga mabuk di bagasan undungundungna rap dohot na tolupulu dua raja, angka na hinarana i. [432†]

¹⁷Dung i ruar ma jumolo angka naposo ni angka induk i marluatluat. Jadi disuru si Benhadad ma suruanna, angka na mangalualuhon tu ibana mandok: Nunga adong ruar angka baoa sian Samaria.

¹⁸Dung i didok rajai ma: Manang na naeng mardemak nasida umbahen ruar, manang laho marporang, sai tangkupi hamu nasida songon i mangolu!

¹⁹Alai dung ruar angka nasida sian huta i, i ma angka naposo ni angka induk i marluatluat dohot angka parangan sian pudinasida.

²⁰Dibunu nasida be ma alona, gabe maporus halak Ram jala dieak halak Israel nasida; maporus dohot si Benhadad, raja sian Ram marsihundul di hoda rap dohot deba jolma parsihundulna.

²¹Jadi ruar ma dohot raja ni Israel, jala dibunu angka jolma parsihundul di hoda dohot hureta porang, gabe torop situtu marragean halak Ram dibahen.

²²Dung i ro ma panurirang i mandapothon raja ni Israel, didok ma tu ibana: Mulak ma ho, patorop ma jolo angka paranganmu, pingkiri ma jala ida manang aha na tama sibehenonmu; ai dapot taon ulahan ni raja sian Ram ma nangkok mandopang ho. [433†]

²³Ai nunga didok angka naposo ni raja sian Ram hian mandok ibana: Debata pandingini di dolok do angka Debatanasida i, ala ni do umbahen talu hita dibahen nasida; alai molo maralo di adaran hita dohot nasida, sai na tunduk do nasida bahenonta. [434†]

²⁴Ala ni songon on ma bahen: Palaho ma angka rajai, ganup sian hajongjonganna be, jala bahen ma angka ulubalang singkatnasida. [435†]

²⁵Alai anggo papungu ma di ho parangan, suang songon torop ni parangan naung marragean sian ho, tole angka hoda dohot hureta songon toropna na jolo, asa taulahi marmusu dohot nasida di adaran, sai na tunduk do nasida bahenonta. Jadi dioloi rajai ma hatanasida i, jala dibahen songon i.

²⁶Jadi dung salpu na sataon i, dibilang si Benhadad ma halak Ram, jala nangkok ibana tu Apek laho marporang dompak Israel. [436†]

²⁷Dung i tarbilang ma dohot halak Israel jala diparbohali, asa mardalan manjumpangkon halak Ram; dung i marsaro ma halak Israel patondong dohot nasida, hira songon dua punguan hambing; alai anggo halak Ram tung ditutup do tano i.

²⁸Dung i ro ma sada halak ni Debata mandapothon raja ni Israel, ninna ma mandok ibana: Songon on do hata ni Jahowa: Ala naung didok halak Ram, Debata pandingini di angka dolok do Jahowa, ndada Debata pandingini di adaran, dibahen i nunga hupasahat tu tanganmu sandok jolma na deak on, asa tung ditanda hamu, Ahu do Jahowa. [437†]

²⁹Jadi marsaro ma nasida patondong be pola pitu ari lelengna. Tole papitu arihon turtar be ma nasida tongtang, gabe dibunu halak Israel ma saratus ribu halak Ram, angka na mardalan pat di bagasan sadari.

³⁰Jala angka na teba i maporus do tu bagasan huta Apek, gabe ditinggang parik ni huta i duapulu pitu ribu halak angka na teba i; maporus dohot si Benhadad masuk tu bagasan huta i, laho sian bilut na sada tu bilut na sadanari. [438†] III.

³¹Dung i ninna angka naposona i ma mandok ibana: Ida ma, nunga hubege hami barita ni angka raja ni halak Israel, raja parasi ni roha do nasida; dibahen i loas ma hami marabithon tangki dohot martalitalihon tangki ruar mandapothon raja ni Israel, anggiat tung pangoluonna hosam. [439†]

³²Dung i marabithon tangki ma nasida jala martalitalihon tangki laho mandapothon raja ni Israel, laos didok nasida ma: Hata ni naposom si Benhadad mandok: Ua pangolu ma hosangku! Jadi ninna rajai ma: Mangolu dope ibana hape? Antong anggingku ma ibana.

³³Pintor disigop angka baoa i ma hatana i mangaithon tu nasida, angka didok ma: Anggim ma tutu si Benhadad! Dung i didok rajai ma: Laho ma hamu mamboan ibana tuson. Jadi ruar ma si Benhadad mandapothon rajai, laos didokkon rajai ibana manaek tu hureta.

³⁴Dung i didok si Benhadad ma tu rajai: Huta angka na nirampas ni damang na jolo sian amanta, paulahonku ma tu ho, bahen huhut di ho angka jambur di Damaskus, songon na binahen ni damang nahinan di Samaria. Alai anggo ahu (ninna si Ahab), paluaonku ma ho marningot padan on. Jadi marpadan ma nasida na dua, diloas ma ibana laho. [440†]

³⁵Dung i ro ma hata ni sada halak sian angka anak ni panurirang mandok tu donganna marhite sian hata ni Jahowa: Ua lombuti ma ahu! Hape manjua do baoa i mangalombuti ibana. [441†]

³⁶Dung i didok panurirang i ma tu ibana: Ala na so tinangihonmi soara ni Jahowa, ida ma, molo laho ho annon sian lambungkon, soroon ni singa ma ho. Jadi dung laho ibana sian lambungna pajumpang ma ibana dohot singa na manoro ibana. [442†]

³⁷Dung i jumpang panurirang i ma sada halak na asing, ninna ma: Ua lombuti ma ahu! Jadi dilombuti baoa i ma ibana, pola mabugang ibana dibahen.

³⁸Dung i laho ma panurirang i mangambat rajai di tongan dalan, jala dipatinda rupana marhite sian bulangbulang binahenna tu matana. [443†]

³⁹Jadi dung mamolus rajai, mangangguhangguk ma ibana dompak rajai, ninna ma: Ruar do ahu naposomon sian tongatonga ni parporangan, gabe ida ma, ro sada halak na manimbil sian parporangan mamboan tu ahu sada halak, ninna ma: Ramoti baoa on! Molo tung mangangkat ibana, ingkon hosam singkat ni hosana; manang ingkon gararonmu perak satalenta. [444†]

⁴⁰Hape uju ringkot situtu ulaon ni naposomon, gabe ndang disi be ibana hudapot. Dung i ninna raja ni Israel ma tu ibana: Laos i ma uhum madabu tu ho, ho sandiri tahe paputushon.

⁴¹Dung i hapogan ma panurirang i mananggal bulang i sian matana, gabe ditanda raja ni Israel ma ibana, sada sian angka panurirang i do ibana hape.

⁴²Dung i ninna panurirang i ma mandok rajai: Songon on do hata ni Jahowa: Ala na pinaluam i sian tanganmu baoa naung harom hian hubahen, ingkon hosam singkat ni hosana, jala bangsom singkat ni bangsona. [445†]

⁴³Dung i laho ma mulak raja ni Israel tu jabuna, pola gusar jala muruk situtu ibana sahat tu Samaria. [446†]