Read Batak Toba 1 RAJARAJA 21 Bible Online

1 RAJARAJA 21 - Batak Toba bible

1 RAJARAJA 21

¹I. [1] Jadi dung salpu angka jamita ondeng, adong ma sada halak na margoar si Nabot sian Jisreel, marporlak anggur ibana di Jisreel, mardonokkon jabu ni si Ahab, raja di Samaria. [447†]

²Dung i ro ma hata ni si Ahab mandok tu si Nabot: Ua lehon tu ahu porlak anggurmi, asa gabe porlak hatubuan ni ingkau rata i di ahu, ala jonokna tu lambung ni jabungku; hulehon pe tu ho porlak anggur na dumenggan bahen singkatna, manang perak na saarga ni porlakmi, molo i lumehet di bagasan roham.

³Alai ninna si Nabot ma mandok si Ahab: Dao ma i sian ahu bahenon ni Jahowa, anggo tung lehononku tu ho tadingtadingan ni damang. [448†]

⁴Jadi mulak ma si Ahab tu bagasan jabuna, pola gusar jala marmurukmuruk ala hata ni si Nabot sian Jisreel tu ibana, songon on: Ndang olo ahu mangalehon tu ho tadingtadingan ni damang. Dung i dipapeak rajai ma ibana tu podomanna, jala dipahusor bohina dompak dorpi pola ndang olo ibana mangan sagusagu. [449†]

⁵Dung i ro ma si Izebel, jolmana i, manopot ibana huhut didok tu ibana: Ala ni aha umbahen tung marsakmarsak roham, jala ndang olo ho mangan sagusagu?

⁶Dung i didok ibana ma tu nasida: Nunga nian mangkatai ahu dohot si Nabot sian Jisreel, jala hudok tu ibana: Ua lehon di ahu porlak anggurmi tuhoronku, manang molo lomoan roham asa hulehon tu ho sada porlak anggur na asing singkatna; alai ninna ibana do: Ndang olo ahu mangalehon tu ho porlak anggurhi.

⁷Dung i didok si Izebel jolmana i ma mandok ibana: Atehe mangkajongjongkon harajaon di Israel do ho nuaeng? Hehe ho, jala pangan sagusaguon, jala pir tondim! Ahu pe mangalehon tu ho porlak anggur ni si Nabot, halak Jisreel.

⁸Dung i dibahen ma angka surat marhitehite goar ni si Ahab jala disahap marhitehite sahapna, jala ditongoshon angka surat i tu angka sintua dohot tu halak na raja di bagasan hutana, angka dongan sahuta ni si Nabot tahe. [450†]

⁹Jala songon on do hata ni angka suratna i: Martingting ma hamu mandokkon saluhut halak marpuasa, jala dokkon hamu si Nabot hundul di julu on ni luhutan i! [451†]

¹⁰Pahundul hamu huhut dua halak parroha na so hasea, na jahat situtu paadopadop dohot ibana, asa manindangi nasida dompak ibana, dohononna ma: Nunga diinsahi ho Debata dohot raja. Dung i togihon hamu ibana tu ruar, laos dangguri hamu ibana dohot batu asa mate. [452†]

¹¹Jadi ro ma halak donganna sahuta, i ma angka sintua dohot halak na raja, angka na maringan di bagasan hutana i, dibahen nasida ma songon na nidokkon ni si Izebel di bagasan surat angka na tinongosna i tu nasida.

¹²Martingting ma nasida mandokkon halak marpuasa, jala didokkon si Nabot hundul di julu on ni luhutan i.

¹³Dung i ro ma sidua halak parroha na jahat i, jala hundul nasida paadopadop dohot ibana, dung i manindangi ma halak parroha na jahat i dompak si Nabot di adopan ni bangso i, ninna ma: Nunga diinsahi si Nabot on Debata dohot rajai. Dung i ditogihon nasida ma ibana tu balian ni huta i, gabe didangguri ibana dohot batu laos mate. [453†]

¹⁴Dung i disuru nasida ma suruanna manopot si Izebel, mandok tu ibana: Nunga mate si Nabot didangguri dohot batu.

¹⁵Jadi dung dibege si Izebel naung mate si Nabot didangguri dohot batu, didok si Izebel ma tu si Ahab: Hehe ma ho, buat ma porlak anggur ni si Nabot, halak Jisreel, na jinouna i mangalehon tu ho tuhoronmu, ai ndang be mangolu si Nabot, nunga mate ibana. [454†]

¹⁶Jadi dung dibege si Ahab naung mate si Nabot, hehe ma ibana laho tuat tu porlak anggur ni si Nabot, halak Jisreel, asa soluhonna. II.

¹⁷Alai ro ma hata ni Jahowa tu si Elia halak Tisbi, ninna ma: [455†]

¹⁸Hehe ma ho jala tuat mandapothon si Ahab, raja ni Israel na marhabangsa di Samaria; ida ma, di bagasan porlak anggur ni si Nabot do ibana nuaeng, ai nunga tuat ibana tusi asa soluhonna.

¹⁹Jala dohononmu ma tu ibana: Songon on do hata ni Jahowa: Nda nunga mambunu jolma ho huhut mangalaum ugasan? Angkup ni dohononmu ma tu ibana: Songon on do hata ni Jahowa: Ia disi didilati angka biang mudar ni si Nabot, ingkon disi dilatan ni angka biang mudarmu! [456†]

²⁰Dung i ninna si Ahab ma mandok si Elia: Nunga leak tardapot ahu dibahen ho, ale musungku? Dung i ninna si Elia ma: Nunga dapot ahu ho tutu, ala naung digadishon ho dirim mangulahon sogo ni roha ni Jahowa. [457†]

²¹Ida ma, Ahu parohon jea tu ho, jala Ahu mangaripashon pinomparmu, mangaripashon sian Ahab nasa baoa, na bajar dohot na tang di Israel. [458†]

²²Jala Ahu mambahen pinomparmu, songon pinompar ni si Jerobeam, anak ni si Nebat dohot songon pinompar ni si Baesa, anak ni si Ahia, ala paminggilna pahehe murukku dohot ala nielana i halak Israel mambahen dosa. [459†]

²³Nang taringot tu si Izebel songon on do hata ni Jahowa: Ingkon suda panganon ni biang sogot si Izebel di lambung parik ni Jisreel. [460†]

²⁴Manang ise na mate sian si Ahab di bagasan huta, ingkon suda panganon ni biang, jala manang ise na mate di ladang, ingkon suda parguton ni pidong na martongatonga langit. [461†]

²⁵Ndang dung adong antong jolma naung manggadishon dirina mangulahon sogo ni roha ni Jahowa, songon si Ahab, na pinajuju ni si Izebel jolmana i. [462†]

²⁶Tung na sogir situtu do parulaonna laho mangihuthon tu angka debata sileban, maniru sude na binahen ni halak Amori na jolo, angka naung pinabali ni Jahowa nian maradophon halak Israel. [463†]

²⁷Alai dung dibege si Ahab angka hata ondeng, gabe diribahi ma pangkeanna, jala disolukkon abit tangki tu dagingna huhut marpuasa ibana, jala modom marabit tangki, jala tungki mardalan. [464†]

²⁸Dung i ro ma hata ni Jahowa tu si Elia, halak Tisbi songon on:

²⁹Atehe nunga diida ho na pinaunduk ni si Ahab dirinai maradophon Ahu? Ala naung pinaundukna i dirina maradophon Ahu, ndang paroonku jea i saleleng mangolu ibana, di ngolu ni anakna pe paroonku jea tu pinomparna. [465†]