Read Batak Toba 1 KRONIKA 10 Bible Online

1 KRONIKA 10 - Batak Toba bible

1 KRONIKA 10

¹I. [1] Dung i marporang ma halak Palistim dompak halak Israel, gabe maporus ma halak Israel maradophon halak Palistim, jala marragean nasida di dolok Gilboa. [125†]

²Dung i sai dilotongi halak Palistim ma si Saul dohot angka anakna, jala dibunu halak Palistim ma si Jonatan, si Abinadab dohot si Malkisua, angka anak ni si Saul. [126†]

³Jadi tarsugutsugut ma si Saul, sai ditumpur angka halak parsior i ibana, gabe targisik bugangna dibahen angka parsior i.

⁴Dung i didok si Saul ma mandok naposona siusung sinjatana: Umpat ma podangmu jala tihamhon tu ahu, asa unang ro halak parhulup on mangalesanlesan ahu. Alai ndang olo naposo siusung sinjatana i, ai mabiar situtu do ibana. Dung i dibuat si Saul ma podang i, laos ditinggangkon dirina tusi. [127†]

⁵Jadi dung diida naposo siusung sinjatana i, naung mate si Saul, dohot ma ibana maninggangkon dirina tu podangna, laos mate.

⁶Jadi rap mate ma si Saul dohot anakna na tolu i ro di sandok pinomparna rap mate do.

⁷Jadi dung diida halak Israel, angka na maringan di rura, naung maporus angka donganna i, jala naung mate si Saul rap dohot angka anakna, ditadingkon nasida ma hutanasida i jala maporus. Jadi ro ma halak Palistim maringan disi. II.

⁸Dung i marsogotna i ro ma halak Palistim laho mamupusi angka na marragean i, gabe jumpang nasida ma si Saul dohot angka anakna i marpeahan di dolok Gilboa.

⁹Jadi dung dipupusi nasida ibana ditipul ma uluna, laos diboan do i rap dohot sinjatana, dipaebangkon ma i tu luat ni halak Palistim humaliang, laho mamaritahon barita i tu bagas ni ajiajiannasida dohot tu situan na torop i. [128†]

¹⁰Dung i dipampeakkon nasida ma angka sinjatana i tu bagasan joro ni debatanasida i, alai anggo tangkurakna i digantungkon do di bagasan joro ni Dagon.

¹¹Jadi dung dibege sandok isi ni Jabes di Gilead barita taringot tu na binahen ni halak Palistim tu si Saul. [129†]

¹²Borhat ma nasa baoa sialo musu, dibuat nasida ma bangke ni si Saul dohot bangke ni angka anakna i, jala diboan do i tu Jabes, jala ditanom holiholinasida di toru ni hariara di Jabes, laos marpuasa nasida pitu ari lelengna. [130†]

¹³Jadi mate ma si Saul di bagasan dosana, angka na binahenna dompak Jahowa, ala na so niradotanna hata ni Jahowa dohot ala marsungkun ibana tu parompuan pangarunding mangalului pangungkapon. [131†]

¹⁴Alai ndang dilului rohana anggo tu Jahowa, gabe dibunu Jahowa ibana, jala dipatongon harajaon i tu si Daud, anak ni si Isai. [132†]