Read Batak Toba 1 KRONIKA 13 Bible Online

1 KRONIKA 13 - Batak Toba bible

1 KRONIKA 13

¹I. [1] Dung i martuptup ma si Daud rap dohot partogi ni paranganna marsasaribu, marsasaratus, rap dohot sude angka induk i tahe. [181†]

²Dung i didok si Daud ma tu sandok luhutan Israel: Molo denggan hata on di rohamu jala marharoroan sian Jahowa, Debatanta i, itatompuhon ma marsuru manopot hahaangginta angka na tinggal i di bagasan saluhut luat ni Israel, asa rap nasida muse manopot angka malim dohot halak Lepi di bagasan huta partaliannasida i, asa marpungu nasida di lambungta on. [182†]

³Asa mulak itaboan tu tongatonganta poti ni Debatanta; ai ndang lulululu hita disi saleleng mangolu si Saul. [183†]

⁴Jadi sahata ma sandok luhutan i manolopi, ingkon bahenon songon i, ai sude situan na torop i marhatongonhon hata i.

⁵Jadi dipaluhut si Daud ma sandok Israel olat ni sunge Sihor di Misir sahat ro di Hamat, asa mangalap poti ni Debata sian Kiriat Jearim. [184†]

⁶Dung i nangkok ma si Daud rap dohot sandok Israel tu Baalah, i ma Kiriat Jearim, na masuk tu Juda, asa diboan nangkok sian i poti ni Debata Jahowa, na marhabangsahon kerubim, disi do somal dijou halak Goarna. [185†]

⁷Jadi diboan nasida ma poti ni Debata di atas ni sada hureta na imbaru, sian bagas ni si Abinadab; si Usa dohot si Ahio manogunogu huretai. [186†]

⁸Alai anggo si Daud ro di sandok Israel mangasa gogo manortori di adopan ni Debata, huhut marende dohot umpalu parhinaloan marragamragam, mardongan sarune, arbap, sordam, ogung panggora dohot ogung panonggahi. [187†] II.

⁹Jadi dung sahat nasida tu pardegean Kidon, disurdukkon si Usa ma tanganna naeng maniopi poti i, ai manimbil do angka lombu i.

¹⁰Jadi tarrimas situtu ma Jahowa mida si Usa, laos dibunu ibana, ala na sinurdukkonna tanganna manjama poti i, gabe mate ibana disi di adopan ni Debata. [188†]

¹¹Jadi marsak situtu ma si Daud, ala parsirangan na binahen ni Jahowa tu si Usa, gabe digoar ma inganan i Peres-Usa rasirasa sadarion. [189†]

¹²Dung i mabiar ma si Daud mida Debata di na sadari i, ninna ma: Beha ma pambahenku mamboan poti ni Debata sahat tu ahu? [190†]

¹³Ala ni ndang diloas si Daud boanon poti i tu ibana, tu bagasan huta ni si Daud, didokkon do pataruon poti i tu bagas ni si Obed-Edom, halak Gat. [191†]

¹⁴Jadi tinggal ma poti ni Debata di bagasan jabu ni si Obed-Edom tolu bulan lelengna. Dung i dipasupasu Jahowa ma pinompar ni si Obed-Edom ro di sandok na di ibana. [192†]