Read Batak Toba 1 KRONIKA 18 Bible Online

1 KRONIKA 18 - Batak Toba bible

1 KRONIKA 18

¹I. [1] Jadi dung salpu angka i, ditaluhon si Daud ma halak Palistim, tung tarjepol situtu nasida dibahen, dirampas ibana huhut huta Gat, ro di huta angka na masuk tusi sian tangan ni halak Palistim.

²Ditaluhon muse halak Moab, gabe mangoloi patu nasida tu si Daud jala manggarar sohe. [264†]

³Ditaluhon si Daud huhut Hadateser, raja sian Zoba, di Hemat, uju na laho ibana pahothon gomgomanna di pasir ni batang aek Euprat. [265†]

⁴Dung i dilaum si Daud ma sian ibana saribu hureta porang dohot pitu ribu halak parsihundul dohot duapulu ribu halak parhantarhantar; jala ditallik si Daud do doldol ni saluhut hoda sitait hureta, saratus pasang sambing sian i ditinggalhon di ibana. [266†]

⁵Alai ro ma halak Ram sian Damaskus naeng manolongi si Hadateser, raja sian Zoba; gabe mate halak Ram i duapulu dua ribu halak, dibunu si Daud. [267†]

⁶Dung i dipajongjong si Daud ma angka benteng di Ram humaliang Damaskus, jadi mangoloi patu ma halak Ram tu si Daud huhut manggarar sohe; ai sai ditumpak Jahowa do si Daud monang manang dompak dia ibana mangalangka. [268†]

⁷Dung i dibuat si Daud ma lombulombu sere, angka na pinaboanboan ni naposo ni Hadateser, jala ditaruhon angka i tu Jerusalem. [269†]

⁸Dibuat si Daud huhut sian Teba dohot sian Kun, angka huta ni si Hadateser mansai godang tombaga; sian i dipauli si Salomo muse tobat tombaga ro di tiang na dua i dohot angka ulaula tombaga. [270†]

⁹Jadi dung dibege si Tou, raja di Hemat, naung ditaluhon si Daud sandok parangan ni si Hadateser, raja sian Zoba. [271†]

¹⁰Disuru ibana ma anakna Hadoram manopot raja Daud manangkasi sonangna dohot mamasumasu ibana, ala naung pinorangna Hadateser, jala naung tinaluhonna ibana, ai marmusu tihus hian do si Tou dompak si Hadateser; ditongoshon muse ulaula sere, perak dohot tombaga marragamragam. [272†]

¹¹Angka i pe diparbadiai raja Daud do laho pasahathon tu Jahowa rap dohot perak dohot sere naung binuatna sian saluhut bangso parbegu, sian halak Edom, Moab, Amon, Palistim dohot Amalek. [273†]

¹²Angkup ni ditaluhon si Abisai, anak ni Nai Seruia do halak Edom di rura parsiraan, sampulu ualu ribu halak toropna. [274†]

¹³Dung i dipambahen ma angka benteng di Edom, gabe patu saluhut halak Edom dibahen si Daud, ai ditumpak Jahowa do si Daud monang manang dompak dia ibana mangalangka. II.

¹⁴Jadi dirajai si Daud ma sandok halak Israel jala dihajongjongkon uhum dohot hatigoran di sandok bangsona i. [275†]

¹⁵Alai anggo si Joab, anak ni Nai Seruia manguluhon angka parangan, jala si Josapat, anak ni si Ahilud do panuturi. [276†]

¹⁶Jala si Sadok, anak ni si Ahitub dohot Abimelek, anak ni si Abiatar, i ma angka malim, jala Sausa do juaratulis. [277†]

¹⁷Jala si Benaia, anak ni si Joiada, panahatan ni angka hupas dohot rundo. Alai anggo angka anak ni si Daud, i ma angka na sumolhot di lambung ni rajai. [278†]