Read Batak Toba 1 KRONIKA 5 Bible Online

1 KRONIKA 5 - Batak Toba bible

1 KRONIKA 5

¹I. [1] Ia angka anak ni si Ruben, buhabaju ni si Israel; ai ibana do tutu buhabajuna, alai ala na niramunanna i podoman ni amana i, gabe bali sahalana sihahaan tu angka anak ni si Josep, anak ni Israel; alai tahe ndang tarjujur tu ibana sahala sihahaan. [54†]

²Ai si Juda nian na sumangap sian angka hahaanggina, gabe sahat tu ibana jujungan partogion, alai anggo sahala sihahaan tu si Josep do. [55†]

³Ia angka anak ni si Ruben, buhabaju ni Israel i ma: Si Hanok, si Pallu, si Hesron dohot si Karmi. [56†]

⁴Ia angka anak ni si Joel i ma: Si Semaya, na manubuhon si Gog, anak ni muse si Simei.

⁵Anak ni si Simei do si Mika, anak ni muse si Reia, anak ni muse si Baal.

⁶Anak ni muse si Beera, na binoan ni si Tiglat Pelesar, raja sian Assur tu habuangan; ibana do sada induk di halak Ruben. [57†]

⁷Alai anggo hahaanggina marompuompu mangihuthon aturan ni sundutsundutnasida marihutan do tu si Jeiel dohot si Sakaria.

⁸Tole muse si Bela, anak ni si Asas, anak ni si Sema, anak ni si Joel, maringan do ibana di Aroer sahat ro di Nebo dohot Baal-Meon.

⁹Dung i maringan ibana tungkan habinsaran, sahat tu partalpahan ni halongonan na mardonokkon Euprat, ai mansai sinur do dorbianasida di tano Gilead.

¹⁰Jala uju di tingki ni si Saul marporang do nasida dompak halak Hagar i, gabe marragean nasida dibahen, laos disoluk do undungundungnasida di sandok partalpahanna tungkan habinsaran sian Gilead. II.

¹¹Maringan huhut patondong dohot nasida halak Gad, di tano Basan sahat ro di Salka.

¹²Si Joel do jujunganna parjolo, jala si Sapam paidua tole muse si Janai dohot si Sapat di Basan.

¹³Jala hahaangginasida mangihuthon pinompar ni ompuna be i ma: Si Mikhael, si Mesulam, si Seba, si Jorai, si Jakan, si Sia dohot si Heber, na pitu i do.

¹⁴On do angka anak ni si Abihail, anak ni si Huri, anak ni si Jaroa, anak ni si Gilead, anak ni si Mikhael, anak ni si Jesisai, anak ni si Jahdo, anak ni si Bus.

¹⁵Tole muse si Ahi anak ni si Abdiel, anak ni si Guni, i ma partogi ni pinompar ni ompuna.

¹⁶Jala maringan nasida di Gilead di Basan dohot di bagasan angka sosorna dohot di saluhut luat humaliang Saron sahat ro di partalpahanna.

¹⁷Luhutna i tarbilang do uju di tingki ni si Jotam, raja sian Juda dohot uju di tingki ni si Jerobeam, raja sian Israel. [58†] III.

¹⁸Ia angka pinompar ni si Ruben, si Gad dohot satonga marga Manasse, nasa baoa sialo musu, angka na manandang hujur dohot podang, jala angka sisintak sior dohot angka na somal marmusu, opatpulu opat ribu pitu ratus onompulu halak toropna, angka na borhat tu parporangan.

¹⁹Jadi saut ma nasida marporang dompak halak Hagar i, Jetur, Napis dohot Nodab.

²⁰Jadi dapotan pangurupion ma nasida, gabe sahat ma halak Hagar i tu tangannasida ro di saluhut halak na hinaranasida; ai joujou do nasida tu Debata di tongtangan jala dioloi Ibana do pangidoannasida, ala marhaposan tu Ibana do nasida.

²¹Jadi tarboan ma dohot dorbianasida, limapulu ribu unto jala dua ratus limapulu ribu birubiru, jala dua ribu halode angkup ni saratus ribu jolma na mangolu.

²²Ai mansai torop jolma marragean dibunu, ala sian Debata parporangan i; laos disoluk nasida inganannasida i sahat ro di tingki habubuangnasida. IV.

²³Ia pinompar ni satonga marga Manasse, maringan do di tano olat ni Basan sahat ro di Baal Hermon dohot Senir ro di dolok Hermon, ai torop do nasida. [59†]

²⁴Jala angka on do jujungan ni pinomparna marompuompu: Si Eper, si Isai, si Eliel, si Asriel, si Jeremia, si Hodapia, si Jahdiel, luhut do halak ulubalang angka na tarbarita, jala jujungan di pinompar ni ompunasida i. V.

²⁵Alai dung mardosa nasida dompak Debata ni ompunasida i jala marmainan nasida mangihuthon angka debata ni angka bangso isi ni tano i, angka na niago ni Debata nian maradophon nasida.

²⁶Jadi disunggul Debata ni halak Israel ma tondi ni si Pul, raja sian Assur dohot tondi ni si Tiglat Pelesar, raja sian Assur, asa ibana mambuangkon halak Ruben, Gad dohot satonga marga Manasse, jala diboan nasida tu Hala, Habor dohot Hara dohot tu batang aek Gozan tahe rasirasa sadarion. [60†]

²⁷Ia angka anak ni si Lepi on do: Si Gerson, si Kohat dohot si Merari. [61†]

²⁸Ia angka anak ni si Kohat: Si Amram, si Ishar, si Hebron dohot si Usiel. [62†]

²⁹Ia angka anak ni si Amram: Si Aron, si Musa dohot si Miryam. Ia angka anak ni si Aron: Si Nadab dohot si Abihu, si Eleasar dohot si Itamar. [63†]

³⁰Si Eleasar manubuhon si Pinehas, na manubuhon si Abisua.

³¹Si Abisua manubuhon si Bukki, na manubuhon si Usi.

³²Si Usi manubuhon si Seraia, na manubuhon si Merayot.

³³Si Merayot manubuhon si Amaria, na manubuhon si Ahitub.

³⁴Si Ahitub manubuhon si Sadok, na manubuhon si Ahimas. [64†]

³⁵Si Ahimas manubuhon si Azaria, na manubuhon si Johanan.

³⁶Si Johanan manubuhon si Azaria, ibana do na mangaradoti hamalimon di bagasan joro, na pinajongjong ni si Salomo di Jerusalem.

³⁷Si Azaria manubuhon si Amaria, na manubuhon si Ahitub.

³⁸Si Ahitub manubuhon si Sadok, na manubuhon si Sallum.

³⁹Si Sallum manubuhon si Hilkia, na manubuhon si Azaria. [65†]

⁴⁰Si Azaria manubuhon si Seraia, na manubuhon si Josadak. [66†]

⁴¹Alai anggo si Josadak tarboan do tu habuangan uju na binuangkon ni Jahowa halak Juda dohot Jerusalem marhite sian si Nebukadnesar. [67†]