Read Batak Toba 2 KRONIKA 6 Bible Online

2 KRONIKA 6 - Batak Toba bible

2 KRONIKA 6

¹I. [1] Uju i ma didok si Salomo: Nunga marboaboa hian Jahowa ingkon naeng maringanan Ibana di bagasan haholomon. [53†]

²Antong nunga hupauli sada joro parmiananmu, bahen ojahan ni habangsam ro di saleleng ni lelengna. [54†]

³Dung i dipahusor rajai ma bohina, asa pasupasuonna sandok luhutan Israel, jala jongjong be do sandok luhutan Israel. [55†]

⁴Dung i ninna rajai ma: Pinuji ma Jahowa, Debata ni Israel, naung marbagabaga hian marhite sian pamanganna sandiri tu damang si Daud i, jala nunga dipasintong nuaeng marhite sian tanganna, uju na nidokna i. [56†]

⁵Olat ni ari uju Ahu manogihon bangsongku ruar sian tano Misir, ndang dung hupillit sada huta sian sandok marga ni Israel paulionna sada joro bahen inganan di Goarhu, jala ndang dung hupillit nanggo sada halak, asa ibana gabe jujungan gumomgom bangsongku Israel. [57†]

⁶Alai nunga hupillit anggo Jerusalem, asa disi Goarhu; jala nunga hupillit anggo si Daud, asa ibana manggomgomi bangsongku Israel.

⁷Nunga nian disangkap roha ni damang si Daud i, naeng paulionna sada joro di Goar ni Jahowa, Debata ni Israel. [58†]

⁸Alai ninna Jahowa ma mandok damang si Daud i: Ala naung ditahi roham naeng pajongjongonmu sada joro di Goarhu, denggan do nian anggo sangkap ni roham.

⁹Alai ndada jadi anggo ho pajongjong joro i, ingkon anakmu na ruar sian butuham, ibana pe pajongjong sada joro di Goarhu. [59†]

¹⁰Nunga tung dipasintong Jahowa hatana, naung pinaboana hian, jala nunga ahu dipahot singkat ni damang si Daud i, jala nunga hundul ahu di atas habangsa ni harajaon Israel, songon na pinaboa ni Jahowa hian, jala nunga ahu pajongjong sada joro di Goar ni Jahowa, Debata ni Israel.

¹¹Jala nunga hubahen tusi poti, parpeopan ni parjanjian ni Jahowa, binahenna tu halak Israel. II.

¹²Dung i jongjong ma rajai di adopan ni langgatan ni Jahowa mandompakkon sandok luhutan Israel, jala dipaherbang tanganna. [60†]

¹³Ai nunga dibahen si Salomo hian sada parjamitaan sian tombaga, jala tu tongatonga ni alaman do i dibahen, lima asta unjurna jala lima asta bohangna jala tolu asta timbona. Jadi jongjong ma rajai tu atasna, laos marsinggang di adopan ni sandok luhutan Israel, jala dipaherbang tanganna dompak langit.

¹⁴Dung i ninna ma: Ale Jahowa, Debata ni Israel! Ndang adong Debata na tudoshon Ho, nang di banua ginjang, nang di tano on; Ho do tutu pahothon parjanjian dohot asi ni roha tu naposom, angka na marparange di adopan ni Bohim sian nasa rohana. [61†]

¹⁵Ho do naung pasintongkon tu damang, naposom si Daud i, hata na pinorbagabagam tu ibana; pamanganmu tutu marbagabagahon, jala tanganmu pasintongkon apala sadarion ma.

¹⁶On pe, ale Jahowa, Debata ni Israel! Sai pasintong ma tu naposom si Daud, damang i, hata naung pinarbagam hian tu ibana, uju na nidokmu: Ndang jadi hurangan di ho sada baoa di jolongku, na hundul di atas habangsa ni harajaon Israel, asal diramoti angka anakmu dalanmu, marparange nasida di bagasan patikku, songon ho naung marparange di jolongku. [62†]

¹⁷On pe, ale Jahowa, Debata ni Israel! Sai pasintong ma hatami, naung pinarbagam tu naposom si Daud i. [63†]

¹⁸Alai tahe, tung tarbahen Debata ma tutu maringan rap dohot jolma i di atas tano on? Ida ma, gari langit ni langitan ndang tuk mangkamham Ho, baliksa apala joro na hupauli on. [64†]

¹⁹Alai sai manatap ma Ho tu tangiang ni naposom dohot tu parhurajaonna i, ale Jahowa, Debatangku! Sai tangihon ma joujou dohot tangiang, na tinangiangkon ni naposom di adopanmon! [65†]

²⁰Sai tonggor ma matam manatap tu joro on borngin dohot arian, tu inganan naung nidokmu: Ingkon disi bahenonmu Goarmu; antong sai tangihon ma tangiang na tinangiangkon ni naposom di inganan on! [66†]

²¹Sai tangihon ma tutu parhurajaon ni naposomon dohot bangsom on Israel, na tinangiangkonnasida di inganan on; sai tangihon ma i tutu sian inganan parhabangsaanmu, sian banua ginjang, tangihon ma tutu, jala marpamuati roham! [67†]

²²Tung sura mardosa sada baoa dompak donganna, molo dipatolon halak ibana alani, sanga ibana ro jala saut manolon di adopan ni langgatanmon di bagasan joro on. [68†]

²³Sai manangi ma Ho sian banua ginjang huhut marlulu, asa maruli uhum angka naposom, laho manorui anggo halak parjahat, asa manginona pambahenanna tu uluna sandiri, laho mamintori anggo halak parpintor, mangalehon tu ibana hombar tu hatigoranna i. [69†]

²⁴Tung sura talu bangsom Israel maradophon musuna, ala naung mardosa nasida dompak Ho; alai molo mulak nasida tu Ho, jala dihatindangkon Goarmu, jala martangiang nasida huhut marhuraja tu adopan ni bohim di bagasan joro on. [70†]

²⁵Sai manangi ma Ho sian banua ginjang, jala marpamuati roham mida dosa ni bangsom Israel, jala boan nasida mulak tu tano naung nilehonmu tu nasida dohot tu ompunasida i. [71†]

²⁶Tung sura tarhinsu langit i, gabe ndang ro udan, ala naung mardosa nasida dompak Ho, dung i martangiang nasida di inganan on, jala dihatindangkon nasida Goarmu, jala mulak nasida sian dosanasida i, ala naung tarjepol nasida binahenmu. [72†]

²⁷Sai manangi ma Ho di banua ginjang, jala marpamuati roham mida dosa ni angka naposom dohot bangsom Israel, ala naung niajarhonmu tu nasida dalan na denggan i na tama sidalananna, jala lehon udan tu tanom naung nilehonmu tu bangsom bahen partalianna. [73†]

²⁸Tung sura masa haleon di tano i, manang begu antuk, manang siraraon hauma, manang antinganoon, manang masa sihapor manang tamponok; molo tung disosak musuna nasida di tano i, pola dirongom pargumbanganna, tung sura masa begu masa manang sahit na asing. [74†]

²⁹Nasa tangiang dohot nasa pangidoan manang marsasahalak, manang tung sandok bangsom Israel manangiangkonsa, ala naung mananda be di jea ni harohaonna dohot parsorionna, gabe dipaherbang tanganna dompak joro on.

³⁰Sai manangi ma Ho sian banua ginjang, ojahan ni habangsam, jala marpangulahi roham huhut mangalehon tu ganup hombar tu saluhut dalanna, marguru tu panandam di harohaonna, ai sasada Ho do tumanda roha ni jolma manisia! [75†]

³¹Asa tung dihabiari nasida Ho, jala marparange di bagasan angka dalanmu ariari, saleleng mangolu nasida di tano naung nilehonmu tu ompunasida i. [76†]

³²Nang halak dagang na so sian bangsom Israel, tung sura ro ibana sian luat na dao ala Goarmu na timbul i dohot ala ni Tanganmu na sun hinagogo i dohot ala ni Botohonmu na toltoli, molo ro ibana tahe martangiang dompak joro on. [77†]

³³Sai manangi ma Ho sian banua ginjang, sian ojahan ni habangsam, jala bahen ma saluhut hombar tu na pinangido ni halak dagang i tu Ho, asa tung saluhut bangso di tano on mananda di Goarmu, jala marhabiaran tu Ho, suang songon bangsom Israel, asa tung diboto naung sahat jinou Goarmu tu atas joro on na hupauli i. [78†]

³⁴Tung sura borhat bangsom laho marporang dompak musuna, di dalan sinurum nasida, jala martangiang nasida tu Ho mandompakkon huta on, naung pinillitmu dohot mandompakkon joro naung hupajongjong di Goarmu. [79†]

³⁵Sai tangihon ma tangiang dohot pangidoannasida di banua ginjang, jala pasintong uhum tu nasida!

³⁶Tung sura mardosa nasida dompak Ho (ai ndang adong jolma nanggo sada na so mardosa), gabe tarrimas Ho mida nasida, jala dipasahat Ho nasida tu musuna, asa tung tarbuang nasida tu tano ni musuna na dao manang na donok. [80†]

³⁷Dung i dipasuang nasida ma rohanasida tu bagasan di tano habuangannasida i, laos dipauba nasida rohanasida i, jala martangiang tu Ho di tano habuangannasida i songon on: Nunga mardosa hami, nunga huulahon hami hajahaton, jala nunga manggunturi hami. [81†]

³⁸Molo tung mulak nasida tu Ho sian nasa rohanasida dohot sian nasa ateatenasida di tano habuangannasida i, jala martangiang nasida mandompakkon tanonasida, naung nilehonmu tu ompunasida i dohot mandompakkon huta naung pinillitmu dohot mandompakkon joro naung hupauli on di Goarmu. [82†]

³⁹Sai manangihon ma Ho sian banua ginjang, sian ojahan ni habangsam mangalusi tangiang dohot pangidoannasida, huhut pasintong uhum tu nasida, jala sai marpamuati ma roham mida dosa, angka naung niulahon ni bangsom dompak Ho! [83†]

⁴⁰On pe, ale Debatangku! Sai tonggor ma matam, jala tinggil pinggolmu mangalusi tangiang di inganan on! [84†]

⁴¹On pe ale Debata Jahowa! Sai hehe ma Ho tumopot paradiananmon, Ho dohot poti ni hamuliaonmu, alai sai marpangkean hatuaon ma angka malimmu bahen, ale Debata Jahowa, jala marlas ni roha ma angka na niasianmu mida denggan ni basam! [85†]

⁴²Ale Debata Jahowa! Unang tung tulak bohi ni na miniahanmu, sai ingot ma asi ni roha angka na tu si Daud naposom! [86†]