Read Batak Toba ESRA 1 Bible Online

ESRA 1 - Batak Toba bible

ESRA 1

¹I. [1] Di taon parjolo hinarajahon ni si Sirus, raja sian Persia, asa pasintongkon hata ni Jahowa marhite sian pamangan ni si Jeremia, disunggul Jahowa ma tondi ni si Sirus, raja sian Persia, asa disuru martingting tu sandok gomgomanna, pola mardongan surat mandok: [1†]

²Songon on do hata ni si Sirus, raja sian Persia: Nunga sahat tu ahu saluhut harajaon di tano on, dilehon Jahowa, Debata di surgo, jala Ibana marsuru ahu pajongjong di Ibana sada joro di Jerusalem, na di tano Juda. [2†]

³Manang ise sian hamu, sian sandok bangsona i, sai didongani Debatana ma ibana, asa nangkok tu Jerusalem, na di tano Juda, asa dipajongjong joro ni Jahowa, Debata ni Israel, Ibana do Debata na mian di Jerusalem. [3†]

⁴Jala manang ise na tinggal dope di saluhut inganan paisolatanna i, songon halak dagang, ingkon tolongon ni angka baoa donganna sahuta ibana marhite sian perak, sere, sinamot dohot pinahan, angkup ni silehonlehon sian lomo ni rohana tu joro ni Debata, na di Jerusalem. [4†] II.

⁵Jadi hehe ma angka induk sian Juda dohot Benjamin marompuompu, ro di angka malim dohot halak Lepi, sude tahe angka na sinunggul ni Debata tondina i laho nangkok, asa pajongjong joro ni Jahowa, na di Jerusalem. [5†]

⁶Dung i luhut jolma angka na humaliang nasida margogoihon tangannasida marhite sian angka ulaula perak dohot sere, tole sinamot dohot pinahan dohot arta angka na arga, so padohot saluhut silehonlehon tu joro sian lomo ni rohana. [6†]

⁷Diparuar raja Sirus huhut ulaula ni joro ni Jahowa, angka naung binoan ni si Nebukadnesar sian Jerusalem, jala naung binahenna tu bagasan joro ni debatana. [7†]

⁸Jadi didokkon si Sirus, raja sian Persia, paruaron ni si Mistredat, siramoti arta angka i, jala bilanganna angka i tu si Sesbasar, induk ni halak Juda. [8†]

⁹Jala on do bilanganna: Angka saoan sere tolupulu, angka saoan perak saribu, angka raut duapulu sia.

¹⁰Angka panginuman sere tolupulu angka panginuman perak paidua opat ratus sampulu, ulaula angka na asing saribu. [9†]

¹¹Luhut angka ulaula sere dohot perak lima ribu opat ratus do. Luhutna i diboan si Sesbasar nangkok manguluhon angka na tarbuang sian Babel tu Jerusalem. [10†]