Read Batak Toba NEHEMIA 2 Bible Online

NEHEMIA 2 - Batak Toba bible

NEHEMIA 2

¹I. [1] Alai masa ma di bulan Nisan, paduapulutaonhon hinarajahon ni raja Artasasta, tongon adong anggur di adopanna, gabe hubuat ma anggur i jala hulehon tu rajai; ndang dung surbot panailingku di adopanna anggo na sai laonna i. [11†]

²Dung i ninna rajai ma tu ahu: Boasa songon i surbot panailim? Nda tung adong sahitmu? Ndang tahe rupa adong do arsak ni roham! Jadi mabiar situtu ma ahu.

³Ningku ma mandok rajai: Sai mangolu ma rajai ro di salelenglelengna! Boasa so surbot panailingku? Ia huta bagas parbandaan ni angka daompung, nunga tarulang, jala nunga masurbu pintu harbanganna dohot api. [12†]

⁴Dung i ninna rajai ma tu ahu: Apala nuaeng pinangidom? Jadi martangiang ma rohangku di bagasan tu Debata na di surgo! [13†]

⁵Dung i ningku ma mandok rajai: Molo tung denggan di roha ni rajai jala lomo roham ahu naposomon di adopanmu, sai suruhon ma ahu tu tano Juda, tu huta parbandaan ni angka daompung, asa hupauli. [14†]

⁶Dung i ninna rajai ma tu ahu, nang jolma ni rajai na marhabangsa di lambungna: Sadia laon tagamon pardalanonmu, jala andigan ho mulak? Jadi denggan ma di roha ni rajai marsuru ahu dung hubuhul janjina. [15†]

⁷Alai ningku ma mandok rajai: Molo tung denggan di roha ni rajai, dilehon ma nian tu ahu angka surat boanonku tu pangarajai ni luat di bariba ni batang aek i, asa dipataru nasida ahu, paima sahat tu tano Juda. [16†]

⁸Angkup ni sada surat tu Asap, sijaga porlak ni rajai, asa dilehon tu ahu hau bahen gulanggulang ni pintu harbangan ni huta i mardonokkon joro i dohot bahen parik ni huta i dohot bahen parhau ni bagas siingananku. Dung i dilehon rajai ma surat i tu ahu, hombar tu panogunoguon ni tangan ni Debata na basa i di ahu. [17†] II.

⁹Jadi dung sahat ahu tu angka pangarajai ni luat na di bariba ni batang aek i, hupasahat ma tu nasida angka surat tinongos ni rajai. Mardongan partogi ni parangan dohot jolma parsihundul ahu hian dibahen rajai. [18†]

¹⁰Alai dung dibege Sambalat, halak Horon i dohot Tobia naposo i sian halak Amon barita i, sogo situtu ma rohanasida disi, ala adong ro sahalak mangalului hasonangan ni halak Israel. [19†]

¹¹Jadi dung sahat ahu tu Jerusalem, jala dung tinggal ahu disi tolu ari lelengna. [20†]

¹²Hehe ma ahu bornginna i rap dohot deba angka baoa; alai ndang hupaboa tu manang ise jolma manang aha naung niaturhon ni Debatangku tu bagasan rohangku, na naeng bahenonku di Jerusalem; jala ndang mardongan hoda parhuli ahu nanggo sada, dungkon ni na huhunduli. [21†]

¹³Dung i ruar ma ahu bornginna i sian bahal rura tole muse sian jolo ni sumur naga, boti tu bahal partangkalan; dung i hutangkasi ma angka parik ni Jerusalem, naung marbungbungan dohot pintu harbanganna naung matutung dibahen api. [22†]

¹⁴Dung i taripar ma ahu tu bahal parmualan dohot tu tobat ni rajai, alai tahe sungkot do hoda i mardalan anggo di atasna ahu. [23†]

¹⁵Laos bornginna i ahu nangkok sian rura i asa hutangkasi parik i, dung i mulak ahu jala masuk sian bahal rura laho muli.

¹⁶Alai anggo angka induk ni huta i ndang diboto manang dompak dia ahu mardalan, jala manang aha na naeng bahenonku, ai rasirasa nuaeng ndang marboaboa ahu tu halak Jahudi, tu angka malim pe, tu halak na sangap, tu angka induk pe, ro di halak na asing, angka na mangula ulaon i.

¹⁷Dung i ningku ma mandok nasida: Nunga diida hamu hinamago na songgop tu hita, naung tarulang i Jerusalem jala masurbu pintu harbanganna dibahen api; tole ma hita mangulahi pajongjong parik ni Jerusalem, asa unang be marhaurahon hita! [24†]

¹⁸Dung i hubaritahon ma tu nasida panogunoguon ni tangan ni Debata, na basa i di ahu; angkup ni hata ni rajai angka na pinaboana i tu ahu. Dung i ninna nasida ma: Hehe ma hita tutu manolehon pajongjongkon muse! Jadi manggogo ma tangannasida mangaringkoti ulaon na denggan i. [25†] III.

¹⁹Alai dung dibege Sambalat, halak Horon i dohot Tobia naposo i, sian halak Amon dohot Gesem halak Arab, barita i, mangelak ma nasida di hami, jala marro ni lea, angka didok ma hata dia do on na binahenmuna i? Naeng ulahanmuna manggunturi dompak rajai? [26†]

²⁰Alai ningku ma mangalusi nasida: Debata na di surgo i, Ibana manumpak ulaonnami saut, ala ni umbahen hehe muse anggo hami naposona i pajongjongkon; alai anggo hamu ndang martohap manang nampuna hatigoran dohot parningotan di Jerusalem. [27†]