Read Batak Toba NEHEMIA 4 Bible Online

NEHEMIA 4 - Batak Toba bible

NEHEMIA 4

¹Alai dung dibege si Sambalat, si Tobia, halak Arab, halak Amoni dohot halak Asdodi, lam simpan hape angka parik ni Jerusalem, nunga pola mamungka tutup angka bungbungna na sai laon, gabe tarrimas situtu nasida. [44†]

²Rap marbulan ma nasida sude mangondam ro marporang dompak Jerusalem, asa manggaori huta i nian.

³Alai martangiang do anggo hami tu Debatanami jala hupajongjong hami angka parhal mangalo nasida arian dohot borngin, asa unang dirampok nasida hami.

⁴Dung i didok halak Juda ma: Nunga surut gogo ni halak parhuli jala godang dope turanggong i, dibahen i ndang tarbahen hita pasunhon parik i. [45†]

⁵Alai roha ni angka alonta mandok: Ndang jadi botoonnasida, jala ndang jadi idaonna manang aha, paima sahat hita tu tongatonganasida, asa mangaragehon nasida jala manundati ulaonnasida i.

⁶Alai dung ro deba halak Jahudi, angka na maringan di lambungnasida i, palumba hami pola sampulu hali taringot tu saluhut inganan, haroroan ni musu dompak hami. [46†]

⁷Jadi hupajongjong hami ma halak situan na torop mangihuthon partubuna bahen parjaga di inganan angka na rumodop, di pudi ni parik i huhut patioptiop podang, hujur dohot sior.

⁸Jadi dung hutangkasi, hehe ma ahu, huhut mandok tu halak na sangap dohot tu angka induk dohot tu pasipasi ni halak situan na torop: Unang hamu mabiar mida nasida, sai paingotingot hamu ma Tuhan i na timbul jala na songkal sahali, jala marporang ma hamu humongkop hahaanggimuna, angka anakmuna dohot borumuna, jolmamuna dohot bagasmuna. [47†]

⁹Alai dung tarbortik dibege angka musunami naung huboto hami hape luhutna i, jala naung disundati Debata tahinasida i, mulak ma hami sude manahopi parik i, ganup tu ulaonna be. [48†]

¹⁰Jadi olat ni ari na sasada i marsatonga nama angka naposongku mangula ulaon i, anggo na satonganari nasida patioptiop hujur, lombulombu, sior, jala marbaju partahanan; jala angka induk i jongjong di pudi ni sandok pinompar ni Juda. [49†]

¹¹Ia halak angka na pajongjong parik i dohot halak na mangkuli tano dohot halak na pausungkon, tanganna na sada dipangke mulaulaon, jala tanganna na sadanari patioptiop sinjata.

¹²Ai sude halak na tole mulaulaon manandang be podangna, laos songon i mangula; jala halak na mamalu sangka jongjong di lambungku.

¹³Ai ningku ma tu halak na sangap dohot tu angka induk dohot tu pasipasi ni na torop i: Godang do ulaon i jala lambas jala mampar di atas parik i do hita, ganup holang sian donganna.

¹⁴Manang sian inganan dia dibege hamu soara ni sangka i, ingkon tusi ma hamu marpungu mandapothon hami! Debatanta i do anggo marporang humongkop hita! [50†]

¹⁵Antong tole be ma hita mangaringkoti ulaon i. Jadi satonga sian nasida patioptiop hujur sian andos torang sahat ro di na mullop angka bintang.

¹⁶Angkup ni hudok uju i tu situan na torop i: Ingkon ganup hita marborngin di Jerusalem rap dohot naposona be, asa marhal hita ia bornginna i, jala mangaringkoti ulaon ia arian.

¹⁷Alai nang ahu, nang angka hahaanggingku, nang angka naposongku, nang angka baoa parhal, angka na mangihuthon tu ahu, ndang dung hutanggali hami ulosnami; ganup patioptiop sinjatana laho haduru. [51†]