Read Batak Toba 2 MUSA 15 Bible Online

2 MUSA 15 - Batak Toba bible

2 MUSA 15

¹I. [1] Dung i diendehon si Musa dohot halak Israel ma ende on di Jahowa, angka didok nasida ma songon on: Marende ma ahu tu Jahowa, ai marmulia situtu Ibana; hoda dohot parsihundulna diusophon tu bagasan laut. [120†]

²Jahowa do hatogaonku dohot pujipujianku jala manjadi hatuaonku. Ibana do Debatangku; pasangaponku ma Ibana. Debata ni damang do Ibana, patimbulonku ma Ibana. [121†]

³Jahowa do Ulubalang bolon, Jahowa do Goarna. [122†]

⁴Angka hureta ni Firaun ro di paranganna diusophon do tu bagasan laut. Parsihundul angka na pinillitna dilonongkon do tu bagasan laut arung.

⁵Angka lung do manghungkupi nasida; lonong do angka nasida tu toru, songon batu.

⁶Tangan siamunmi, ale Jahowa, marmulia di bagasan hagogoon; tangan siamunmu, ale Jahowa, mangaropuhi musu i.

⁷Jala marhitehite hinatimbul ni hasangaponmu disiaphon Ho angka na mangalo Ho; dilaluhon Ho parpiarpiar ni rimasmu mansudahon nasida songon durame.

⁸Marhitehite pallongos ni igungmu marlintonglintong angka aek i; marsijongjong angka galumbang, songon dorpi; mangibulibul ma angka lung di tongatonga ni laut.

⁹Dung i ninna musu i ma: Leleonku, tangkuponku ma nasida, bagionku ma taban; sombu ma rohangku mida nasida, umpatonku ma podangku, siaphonon ni tanganku ma nasida.

¹⁰Diombushon Ho hosam, gabe dilungkupi laut nasida, angka lonong ma nasida songon simbora tu bagasan aek angka na tongam.

¹¹Ise ma songon Ho, ale Jahowa di tongatonga ni angka debata? Ise ma songon Ho marmulia di bagasan habadiaon, na songkal marpujipujian, na mambahen halongangan? [123†]

¹²Dung dipatoltol Ho tanganmu siamun, dibondut tano i nasida.

¹³Ditogihon Ho marhitehite asiasim bangso na pinaluam on; dipatolhas Ho nasida marhitehite hatogaonmu tu bagasan inganan ni habadiaonmu.

¹⁴Dibege angka bangso barita i, gabe angka dotdot nasida, manimbasnimbas ma halak Palistim. [124†]

¹⁵Tarsonggot ma uju i angka raja ni Edom, angka hitir ma raja ni Moab; tahuton ma sude isi ni Kanaan.

¹⁶Sai madabu ma tu nasida songgotsonggot dohot hatahuton; tarhatotong ma nasida, songon batu dibahen hinatimbul ni tanganmu, paima taripar bangsom, ale Jahowa; paima taripar bangsom, na tinobusmu.

¹⁷Sai pamasuk ma nasida, jala lopokkon nasida tu dolok partalianmi, haojahan ni ingananmi na pinaulim, ale Jahowa; tu habadiaon, na pinajok ni tanganmu, ale Tuhan.

¹⁸Jahowa do Raja ro di salelenglelengna. [125†]

¹⁹Ai bongot tu bagasan laut do hoda ni Firaun dohot angka huretana ro di parsihundulna, jadi dipasuang Jahowa ma angka aek ni laut i mangalungkupi nasida; alai anggo halak Israel mardalan di na mahiang do nasida di tongatonga ni laut. [126†]

²⁰Dung i ditiop si Meryam boru panurirang, iboto ni si Aron odap sada di bagasan tanganna, jala ruar sude angka boruboru marudurudur mangihuthon ibana masitiop odapna be.

²¹Jadi marende taripar ma si Meryam tu nasida; marende ma hamu tu Jahowa, ai marmulia situtu do Ibana; hoda dohot parsihundulna diusophon tu bagasan laut. II.

²²Dung i didokkon si Musa ma halak Israel borhat sian laut arung, asa mardalan nasida tu halongonan Sur; jadi mardalan ma nasida tolu ari di bagasan halongonan i, ndang jumpangan aek nasida.

²³Dung i sahat ma nasida tu Mara; alai ndang tarinum nasida aek sian Mara, ai na paet do i; ala ni do umbahen margoar Mara.

²⁴Jadi marmungutmungut ma bangso i dompak si Musa, ninna ma: Aha na ma siinumonnami?

²⁵Dung i mangangguhi ma si Musa tu Jahowa, gabe dipatuduhon Jahowa ma tu ibana sada hau, na nireongkonna tu aek, jadi tonggi ma aek i. Disi, ma dibahen tu nasida sada patik dohot uhum, jala disi ma nasida diunjuni.

²⁶Jala didok ma: Molo burju ditangihon ho soara ni Jahowa Debatam, jala diulahon ho na tigor di rohana, jala dipinggol ho angka patikna, jala diradoti ho sude angka uhumna: Ndang pamasaonku tu ho nanggo sada sahit, angka na hupamasa tu Misir, ai Ahu do Jahowa pandaonim. [127†]

²⁷Dung i sahat ma nasida tu Elim, adong do disi mual sampulu dua, jala pitupulu harambir, gabe marsaro ma nasida disi di lambung aek i.