Read Batak Toba 2 MUSA 17 Bible Online

2 MUSA 17 - Batak Toba bible

2 MUSA 17

¹I. [1] Dung i borhat ma sandok luhutan ni halak Israel sian halongonan Sin, marguru tu pandokkon ni Jahowa pardalanonnasida i, gabe marsaro nasida di Rapidim; alai ndang adong aek siinumon ni bangso i disi.

²Jadi dibadai bangso i ma si Musa, angka didok ma: Lehon hamu aek siinumonnami! Jadi didok si Musa ma tu nasida: Boasa ahu badaanmuna? Boasa unjunanmuna Jahowa? [139†]

³Alai uasan di aek bangso i disi, gabe marmungutmungut nasida dompak si Musa, didok ma: Boasa tung paruaronmu hami sian Misir laho mambunu hami dohot anakkonnami ro di pinahannami dibahen uas?

⁴Jadi mangangguhi ma si Musa tu Jahowa, ninna ma: Aha ma bahenonku tu bangso on? Otik nari dangguronnasida ma ahu dohot batu. [140†]

⁵Jadi didok Jahowa ma tu si Musa: Bolus ma sian jolo ni bangso i, jala arahon deba sian angka sintua ni Israel bahen donganmu, jala boan ma tungkotmu, na nilipathonmu tu batang aek i, dung i laho ma ho. [141†]

⁶Ida ma, jongjong ma Ahu disi di jolom di atas ni sada dolok batu di Horeb, lipati ma dolok batu i, gabe ruar ma sian i aek siinumon ni bangso i. Jadi dibahen si Musa ma songon i di adopan ni angka sintua ni Israel. [142†]

⁷Jadi dibahen ma goar ni hajongjongan i Massa (pangunjunan) dohot Meriba (parbadaan), ala ni bada ni halak Israel, jala ala ni niunjunannasida Jahowa, na nidokna i: Di tongatonganta ulaning do Jahowa manang ndang? [143†] II.

⁸Dung i ro ma Amalek, jala marmusu dompak Israel di Rapidim.

⁹Dung i didok si Musa ma tu si Josua: Pilliti ma di hita angka baoa, jala borhat ma ho mandopangi Amalek; jongjong ma ianggo Ahu marsogot di punsu ni dolokdolok, patioptiop tungkot ni Debata di bagasan tanganku.

¹⁰Jadi dibahen si Josua ma, songon na nidok ni si Musa tu ibana laho mandopangi Amalek; alai anggo si Musa dohot si Aron dohot si Hur nangkok do nasida tu punsu ni dolokdolok i.

¹¹Jadi saleleng dipaherbang si Musa tanganna tu ginjang, monang ma Israel, alai molo dipalenduk tanganna, monang ma Amalek.

¹²Alai ngaolan ma tangan ni si Musa, gabe dibuat nasida ma batu sada, dibahen ma tu toruna, asa hundul ibana tusi; ro ma si Aron dohot si Hur tumungkol tanganna sambariba be; gabe hot ma tanganna i, paima mate mata ni ari.

¹³Jadi dipatunduk si Josua ma Amalek dohot bangsona marhite sian baba ni podang.

¹⁴Dung i didok Jahowa ma tu si Musa: Surathon ma i tu sada buku bahen parningotan, jala pasingothon ma tu pinggol ni si Josua, ai sai na siaphononku ma barita ni Amalek sian toru ni langit. [144†]

¹⁵Dung i dipauli si Musa ma sada langgatan, dibahen ma goarna: Jahowa Nissi (Jahowa partonggolhu).

¹⁶Angkup ni didok ma: Sintak tangan di atas habangsa ni Jahowa: Hamusuon tihus ma di Jahowa dompak Amalek marsundutsundut.