Read Batak Toba 2 MUSA 21 Bible Online

2 MUSA 21 - Batak Toba bible

2 MUSA 21

¹I. [1] Jala on do uhum, angka siaturhononmu tu jolonasida.

²Molo dituhor ho sada hatoban baoa marga Heber, onom taon ma lelengna mangadop, alai anggo papitutaonhon ingkon malua boti ibana. [173†]

³Molo panangkarnangkar ibana ro panangkarnangkar ibana ruar; molo marripe ibana ro, rap malua ibana dohot ripena.

⁴Alai molo marripe ibana dibahen indukna, gabe ditubuhon anak manang boru di ibana, indukna i ma nampuna ripena dohot tubuna, holan ibana sandiri malua.

⁵Alai molo sada hata ni hatoban i mandok: Holong do rohangku di indukhu, di jolmangku dohot di angka anakkonku, tagonan unang malua ahu.

⁶Togihonon ni indukna ma ibana tu Debata patindangonna ma ibana tu pintu manang tu tiang, dung i turaon ni indukna ma pinggolna dohot turatura, jadi hatobanna ma ibana salelenglelengna. [174†]

⁷Alai molo digadis manang ise boruna bahen hatoban, ndang jadi malua, songon halulua ni hatoban baoa. [175†]

⁸Molo sogo roha ni indukna mida ibana, jala ndang marsinonduk mangan dibahen, ingkon tobuson ma i; alai anggo tung tu bangso sileban ndang guru rohana manggadis, ala naung diose padanna tu nasida.

⁹Alai molo tu anakna nasida maroroan dibahen, uhum parboruon na ma bahenonna tu nasida.

¹⁰Molo boruboru na asing dibuat bahen imbangna, ndang jadi oruanna sipanganonna, parulosonna dohot pargansionna.

¹¹Molo so dibahen uhum na tolu ondeng tu nasida, malua boti nasida, ndang sitobus. II.

¹²Molo adong manang ise na mangompong jolma, pola mate, ingkon marutang hosa ibana. [176†]

¹³Alai molo so diburu hian, tung Debata tardok patongonhon ibana tu tanganna so pangkirimanna, Ahu pe patuduhon haporusanna tu ho. [177†]

¹⁴Alai molo piripirion manang ise dompak donganna, marbisuk pamununa di ibana, saratonmu ma ibana sian lambung ni langgatanku laho mambunu ibana. [178†]

¹⁵Manang ise na mambunu amana manang inana, ingkon marutang hosa ibana.

¹⁶Manang ise na mamangus jolma jala digadis, manang jumpang di tanganna dope, ingkon marutang hosa ibana. [179†]

¹⁷Manang ise na mamburai amana manang inana, ingkon marutang hosa ibana. [180†]

¹⁸Molo marbadai angka baoa, gabe dipungkulhon ma sada batu tu alona manang ditinju ibana, alai ndang pola mate, asal peak di podomanna.

¹⁹Ia dung hehe muse ibana gabe mardalani di balian martungkottungkot, jadi lias ma na mambunu i, asal digarar halolahanna dohot upa pandaoni paima malum situtu.

²⁰Manang ise na mangompongi hatobanna baoa manang boruboru, gabe mate na niomponganna i, ingkon abulonna do.

²¹Alai molo tung mangolu sadari manang dua ari nari ndang abulonna, ai hepengna na ma i.

²²Molo marbadai angka baoa, gabe tarsamar boruboru na humunti pagar, pola hatektehan sanggul, alai ndang nian mahua anggo hosana, ingkon marutang hepeng ma ibana, marguru tu pandok ni harajaan ni boruboru i tu ibana, jala lehononna tu angka panguhum.

²³Alai molo sanga mate, ingkon hosa do abul ni hosa. [181†]

²⁴Mata do abul ni mata, ipon do abul ni ipon, tangan do abul ni tangan, pat do abul ni pat.

²⁵Mabortu ma abul ni na mabortu, bugang do abul ni bugang, na punil abul ni na punil.

²⁶Molo dilipat manang ise mata ni hatobanna baoa manang boruboru, pola sega matana, ingkon paluaonna boti, abul ni matana i.

²⁷Suang songon i molo diropangkon ngingi ni hatobanna baoa manang boruboru, ingkon paluaonna boti abul ni iponna i. III.

²⁸Molo adong baoa manang boruboru ditambing sada jonggi, pola mate ibana, ingkon mate dangguron do jonggi i dohot batu, jala ndang jadi panganon sibukna, alai lias ma ianggo nampuna lombu i.

²⁹Alai molo panambing hian jonggi i sian na sai laon, diboto nampunasa i huhut, hape ndang diramoti, gabe dibunu jonggi ma baoa manang boruboru, ingkon mate dangguron jonggi i dohot batu, bunuon ma dohot nampunasa. [182†]

³⁰Alai molo pardengganan uhum marobo tu ibana, ingkon lehononna do partobus singkat ni hosana, marguru tu pangarobo ni uhum tu ibana godangna.

³¹Laos uhum bongka ondeng do bahenon tu ibana, molo anak manang boru ditambing jonggi i.

³²Alai molo hatoban baoa manang boruboru ditambing lombu i, tolupulu ringgit ma lehonon ni nampunasa tu induk somangnasida i, jala ingkon mate dangguron ia jonggi i.

³³Molo adong manang ise patalak sada godung, manang tung dihali sada godung, hape ndang dilangkopi, gabe madabu ma tusi sada lombu manang halode.

³⁴Ingkon abulon ni nampuna godung i do, hepeng ma pasuangonna tu nampunasa, alai di ibana ma ianggo bangkena.

³⁵Molo ditambing jonggi ni na sahalak jonggi ni donganna, pola mate, gadisonnasida ma jonggi na mangolu i, jala parduaonna tuhorna, jonggi na mate i pe parduaonnasida do.

³⁶Alai anggo binoto hian na sai laon panambing jonggi i, hape ndang diramoti nampunasa, ingkon alianna do jonggi abul ni jonggi, di ibana ma anggo na mate i.