Read Batak Toba 2 MUSA 24 Bible Online

2 MUSA 24 - Batak Toba bible

2 MUSA 24

¹I. [1] Dung i didok Jahowa ma tu si Musa: Nangkok ma hamu mandapothon Jahowa, ho dohot si Aron, Nadab dohot Abihu, ro di na pitupulu halak sintua ni Israel, mandaodao ma hamu marsomba Ahu. [216†]

²Sasada si Musa pe jumonok mandapothon Jahowa, alai anggo nasida ndang jadi jumonok, bangso i pe ndang jadi nangkok rap dohot ibana.

³Dung i ro ma si Musa, jala dipajojor tu bangso i saluhut hata ni Jahowa dohot sude angka uhum. Jadi sahata ma sandok bangso i mangalusi, didok nasida ma: Sude hata angka na pinaboa ni Jahowa, sai bahenonnami do. [217†]

⁴Jadi disurathon si Musa ma sude hata ni Jahowa, jala dipasogot manogotna i, dipauli ma sada langgatan di bona ni dolok i dohot sampuludua tiang parningotan marguru sian na sampuludua marga ni Israel. [218†]

⁵Dung i disuru ma angka dolidoli sian halak Israel, asa dipelehon nasida angka pelean situtungon dohot mamotongi lombu bahen angka pelean hamauliateon di Jahowa.

⁶Dung i dibuat si Musa ma mudar i satonga, jala dibahen tu bagasan angka saoan; alai anggo mudar na satonganari, tu langgatan i do dipispishon.

⁷Dung i dibuat ma pustaha parpadanan i, jala dijaha tu pinggol ni natorop i. Jadi didok nasida ma: Sude na nidok ni Jahowa, sai bahenonnami do, jala tangihononnami do. [219†]

⁸Dung i dibuat si Musa ma mudar i, jala dipispishon tu na torop i, jala ninna ma: Ida ma, on ma mudar ni parpadanan i, naung pinahot ni Jahowa tu hamu ala saluhut hata ondeng. [220†] II.

⁹Jadi nangkok ma si Musa dohot si Aron, si Nadab dohot Abihu ro di na pitupulu sintua ni halak Israel i.

¹⁰Jadi diida nasida ma Debata ni Israel; ia sidegean ni patna, songon mata intan na rata riongna, jala songon rupa ni langit jumpa puasa bintang. [221†]

¹¹Jala ndang disurdukkon tanganna mangkahua angka sintua ni halak Israel. Jadi dung diida nasida Debata mangan dohot minum ma nasida. [222†] III.

¹²Dung i ninna Jahowa ma tu si Musa: Nangkok ma ho mandapothon Ahu tu dolok on, disi ma ho, asa hulehon tu ho angka batu na marsurat dohot patik ro di uhum, angka naung husurati, sipodahononmu tu nasida. [223†]

¹³Jadi hehe ma si Musa dohot si Josua parhaladona i, gabe nangkok ma si Musa tu dolok ni Debata.

¹⁴Jala didok ma tu angka sintua i: Tading dison ma anggo hamu, paima mulak hami tu hamu. Antong si Aron dohot si Hur do di lambungmuna on; manang ise na marparkaro, tu nasida ma diboan.

¹⁵Jadi dung sahat si Musa tu punsu ni dolok i, gabe dihungkupi ombun i ma dolok i.

¹⁶Jadi mangulon ma hamuliaon ni Jahowa di punsu ni dolok Sinai, jala dihungkupi ombun i dolok i onom ari lelengna; tole papituarihon dijou ma si Musa sian bagasan ni ombun i. [224†]

¹⁷Jala songon api na marjilam rupa ni hamuliaon ni Jahowa di punsu ni dolok i, diida halak Israel. [225†]

¹⁸Jadi masuk ma si Musa tu bagasan ombun i laho nangkok tu dolok i gabe didolok i ma si Musa opatpulu ari opatpulu borngin lelengna. [226†]