Read Batak Toba 2 MUSA 25 Bible Online

2 MUSA 25 - Batak Toba bible

2 MUSA 25

¹I. [1] Dung i ro ma hata ni Jahowa tu si Musa, ninna ma.

²Paboa ma tu halak Israel mamboan tu Ahu silehonlehon, bahen pelean; sian ganup baoa na lomo roha, buatonmuna silehonlehon tu Ahu. [227†]

³Alai on do silehonlehon, angka sibuatonmuna sian nasida: sere, perak dohot tombaga.

⁴Tole abit sian bonang na rata langit dohot na rara dohot na merham, nang hain bontar na halus dohot imbulu ni hambing.

⁵Tole angka bobak ni birubiru tunggal, angka na tinubar, tole bobak ni pitudar dohot hau pinasa.

⁶Tole miak tu parpalitoan, miak na hushus pangkeon laho mamiahi dohot manutung daupa.

⁷Tole angka mata intan simata unam dohot landus pangkeon tu baju epod dohot tu tutup andora.

⁸Jala ingkon bahenonnasida di Ahu sada inganan na badia, asa maringan Ahu di tongatonganasida.

⁹Sandok songon na hupatuduhon i tu ho, tiruan ni inganan dohot tiruan ni sude angka parhohasna, ingkon songon i bahenonmuna. [228†] II.

¹⁰Alai bahenonnasida ma sada poti sian hau pinasa, tonga tolu asta unjurna, jala tonga dua asta bohangna, laos tonga dua asta ia timbona.

¹¹Ingkon lampisonmu ma i dohot sere na pita, sian bagasan dohot sian ruar lampisonmu, jala bahenonmu do bibirna marlaislais sere humaliang.

¹²Jala tompaonmu ma tusi opat langgu sere, angka sibahenonmu tu suhina na opat i; dua langgu di na sambariba be.

¹³Jala bahen ma haluhalu sian hau pinasa, ipe lampisonmu do i dohot sere.

¹⁴Jala surakkon ma haluhalu i tu bagasan langgu, angka na lohot di poti i laho mangusung poti i.

¹⁵Alai ingkon pasombuon do angka haluhalu i di bagasan angka langgu ni poti i, ndang jadi eneton sian i.

¹⁶Jala pamasuhonmu tu bagasan poti i surat parjanjian, silehononku tu ho. [229†]

¹⁷Ingkon bahenonmu huhut sada langkop pardengganan sian sere na pita; tonga tolu asta unjurna, jala tonga dua asta bohangna. [230†]

¹⁸Ingkon bahenonmu huhut dua kerubim sian sere sangkimpal na tinopa, bahenonmu do i tu na dua tampahan ni langkop pardengganan i.

¹⁹Jala bahen ma kerubim na sada tu tampahan na sada jala kerubim na sada nari tu tampahanna na sada nari; tubu sian bagasan langkop pardengganan i tolpus tu duru bahenonmuna angka kerubim i di na dua tampahanna.

²⁰Jala paherbangon ni angka kerubim habongna na dua i sian ginjang asa dihungkupi habongna i langkop pardengganan i, jala padompak be bohinasida, dompak langkop pardengganan i bohi ni angka kerubim mamereng.

²¹Dung i bahenonmu ma langkop pardengganan i tu ginjang ni poti i, jala pamasuhonmu ma tu bagasan poti i surat parjanjian silehononku tu ho. [231†]

²²Jadi disi ma topotonku ho, asa mangkatai Ahu dohot ho sian ginjang ni langkop pardengganan i sian holangholang ni kerubim na dua i, angka na di ginjang ni poti parpadanan i taringot tu sude sitonahononku tu ho, paboaonmu tu halak Israel. [232†] III.

²³Ingkon bahenonmu dohot sada meja sian hau pinasa; dua asta unjurna, jala saasta bohangna, jala tonga dua asta timbona.

²⁴Jala lampisonmu ma i dohot sere na pita, jala bahenonmu martopi sere humaliang.

²⁵Jala bahenonmu tusi sada lais santopap bidangna humaliang, jala bahen laisna i martopi sere pinariponipon humaliang.

²⁶Jala bahen tusi opat langgu sere, sibahenonmu tu suhina na opat i, angka na di patna na opat i.

²⁷Ingkon jonok di toru ni lais bahenon angka langgu i bahen panuruhan ni haluhalu laho mangusung meja i.

²⁸Sian hau pinasa ma bahenonmu haluhalu i, jala lampisonmu dohot sere, i ma pangkeon mangusung meja i.

²⁹Jala bahenonmu ma pingganna dohot saoanna dohot hondina dohot mangkukna, bahen pangusean ni tuak tangkasan ma i; sian sere na pita ma i paulionmu.

³⁰Jala ingkon peakkononmu tongtong di meja i sagusagu na marhadohoan maradophon Ahu. [233†] IV.

³¹Ingkon bahenonmu huhut sada parpalitoan sian sere na pita, sangkimpal parpalitoan i topaonmu, ro di badanna, dangkana dohot butuhana, hansingna dohot bungana bahenon sian i.

³²Jala ingkon onom dangka ruar sian lambungna, tolu dangka sian na sambariba ni parpalitoan i, jala tolu dangka sian na sambariba nari.

³³Martolu butuha, songon bunga ni buapala ganup dangkana i bahenon, mardongan hansing dohot bunga; laos songon i do bahenon tu na onom dangka i, angka na ruar sian parpalitoan i.

³⁴Alai ingkon opat do butuha ni parpalitoan i bahenon, songon bunga ni buapala mardongan hansing dohot bunga.

³⁵Jala sahansing be di toru ni na dua dangkana, angka na ruar sian i; suang songon i sahansing be di toru ni dangkana na dua, angka na ruar sian i; suang muse sahansing be di toru ni dangkana na dua, angka na ruar sian i, gabe onom dangka ruar sian badan ni parpalitoan i.

³⁶Ai ingkon ruar sian i do angka hansingna dohot dangkana; luhutna i sian sangkimpal sere na pita do i.

³⁷Jala bahenonmu do pitu palitona, angka sibahenon tu ginjang, asa marsinondang angka i tu jolo.

³⁸Panurturna pe dohot pangintopina sian sere na pita do.

³⁹Sian satalenta sere na pita bahenonmu luhutna i, ro di parhohasna sudena i.

⁴⁰Jala ingot ma mambahensa tudos tu tiruan na niidam di dolok i. [234†]