Read Batak Toba 2 MUSA 31 Bible Online

2 MUSA 31 - Batak Toba bible

2 MUSA 31

¹I. [1] Dung i ro muse ma hata ni Jahowa tu si Musa songon on:

²Ida ma, nunga hujou sahalak na margoar Bezaleel, anak ni si Uri, i ma anak ni si Hur sian marga Juda.

³Nunga pola hugoki rohana dohot Tondi ni Debata marhapistaran, marhapandean dohot marparbinotoan di bagasan saluhut ulaon i. [263†]

⁴Mamingkiri hapandean na sumurung mamandei sere, perak dohot tombaga.

⁵Huhut manguhir dohot mamijor batu intan, mamandei hau pe mambahen hapandean marragamragam.

⁶Ianggo Ahu, ida ma nunga pola hubahen donganna, i ma Oholiab, anak ni si Ahisamakh, sian marga Dan; tu bagasan roha ni saluhut halak na pande, nunga hulehon roha hapandean, asa nasida mangulahon sude na hutonahon tu ho:

⁷Tole undungundung parluhutan i, tole poti parpadanan i, ro di langkop pardengganan na di atasna i dohot sude ulaula di undungundung i.

⁸Tole muse meja i ro di ulaulana, tole parpalitoan sian sere na pita ro di ulaulana sudena dohot langgatan panutungan daupa.

⁹Tole langgatan pamelean ni pelean situtungon ro di ulaulana sudena, nang tong parburian dohot ojahanna.

¹⁰Tole angka pangkean tohonan dohot pangkean angka na badia di malim Aron, tole pangkean ni angka anakna laho mangaradoti hamalimon.

¹¹Tole muse miak pamiahion i dohot daupa sian pamurpuri na hushus situtungon di inganan na badia; hombar tu sandok na hutonahon i tu ho bahenonnasida. II.

¹²Dung i ro muse ma hata ni Jahowa tu si Musa songon on:

¹³Dok ma tu halak Israel: Ingkon ingotonmuna do ari paradiananku: Ai i do tanda ni parpadanan di Ahu dohot di hamu ro di pinomparmuna, asa tung diboto hamu, Ahu do Jahowa na pabadiahon hamu. [264†]

¹⁴Dibahen i sai ingot hamu ma ari Sabbat i, ai na badia do i di hamu; manang ise na mangaramuni ari Sabbat i, ingkon marutang hosa ibana: Ai manang ise na mangula ulaon disi, ingkon siap bahenon hosana sian tongatonga ni bangsona.

¹⁵Ingkon onom ari lelengna mangula halak; alai anggo ari papituhon i, ari Sabbat paradianan na badia ma i di Jahowa; manang ise na mangula ulaon di ari Sabbat, ingkon marutang hosa ibana.

¹⁶Dibahen i ingkon ingoton ni halak Israel ari Sabbat i, nang pinomparnasida laho pabadiahon ari Sabbat i, padan na hot ma i ro di salelenglelengna.

¹⁷Ari Sabbat i ma tutu manjadi tanda di Ahu dohot di halak Israel ro di salelenglelengna. Ai di bagasan na onom ari ditompa Jahowa langit dohot tano on; alai anggo di ari papituhon i maradian ma Ibana jala dipasonang dirina. [265†]

¹⁸Jadi dung sun Jahowa mangkatai dohot si Musa di atas dolok Sinai, dilehon ma tu ibana dua lei batu panuratan ni panindangion naung tarsurat marhite sian jarijari ni Debata. [266†]