Read Batak Toba 2 MUSA 35 Bible Online

2 MUSA 35 - Batak Toba bible

2 MUSA 35

¹I. [1] Dung i dipaluhut Musa ma sandok luhutan ni halak Israel, jala ninna ma mandok nasida: On do hata angka na tinonahon ni Jahowa siulahononmuna.

²Ingkon onom ari lelengmu mangula ulaon, alai anggo ari papituhon i, ari Sabbat paradianan na badia ma i di Jahowa. Manang ise na mangula ulaon di ari na sasada i, ingkon marutang hosa ibana. [306†]

³Ndang jadi hamu mangopan api di bagasan sude ingananmuna anggo di ari Sabbat i.

⁴Dung i didok Musa ma tu sandok luhutan ni halak Israel songon on: On do hata na tinonahon ni Jahowa tu hamu:

⁵Jalo hamu na sian hamu silehonlehon bahen pelean tatingan di Jahowa, ganup sian lomo ni rohana mamboan pelean tatingan di Jahowa: sere, perak dohot tombaga. [307†]

⁶Tole abit sian bonang na rata langit dohot na rara dohot na merham, nang hain bontar na halus dohot imbulu ni hambing.

⁷Tole bobak ni birubiru tunggal angka na tinubar, tole bobak ni pitudar dohot hau pinasa.

⁸Tole miak tu parpalitoan, miak na hushus pangkeon laho mamiahi dohot manutung daupa.

⁹Tole angka mata intan unam dohot simata landus bahenon tu baju epod dohot tu tutup andora.

¹⁰Jala manang ise na pantas marroha di tongatongamuna, ingkon ro be mangulahon sandok na tinonahon ni Jahowa:

¹¹Pauli inganan na badia i rap dohot undungundungna, langitlangitna, haithaitna, papanna, ransangransangna, angka tiangna dohot ojahanna.

¹²Tole poti parpadanan i rap dohot haluhaluna, langkop pardengganan i dohot rimberimbe.

¹³Tole meja i rap dohot haluhaluna ro di sandok ulaulana ro di roti na marhadohoan.

¹⁴Tole parpalitoan i bahen panondang i ro di ulaulana, angka palitona dohot miak tu palito i.

¹⁵Tole muse langgatan pardaupaan i rap dohot haluhaluna, nang miak pamiahion dohot pamurpuri bahen daupa na hushus ro di rimberimbe tutup ni pintu laho masuk tu inganan na badia i.

¹⁶Tole langgatan pamelean ni pelean situtungon rap dohot handanghandangna sian tombaga, angka haluhaluna dohot sandok ulaulana, tong parburian dohot ojahanna.

¹⁷Tole rimberimbe tu alaman i rap dohot tiangna dohot ojahanna; nang rimberimbe tutup ni bahal haroroan tu alaman i.

¹⁸Tole angka labang tu inganan na badia i dohot tu alaman i rap dohot angka talina.

¹⁹Tole angka pangkean tohonan laho marhalado di inganan na badia i, angka pangkean ni malim Aron na badia i rap dohot pangkean ni angka anakna laho mangaradoti hamalimon. II.

²⁰Dung i ruar ma sandok luhutan ni halak Israel sian adopan ni Musa.

²¹Jadi ro be ma ganup na tarsunggul rohana dohot ganup na martondi na girgir, diboan be ma pelean tatingan tu Jahowa pangkeon tu ulaon pauli undungundung parluhutan i dohot tu sandok ulaon siradotan disi dohot tu pangkean angka na badia i. [308†]

²²Jadi ro be ma, angka baoa dongan ni angka parompuan, sude tahe angka na girgir marroha, diboan be ma leangna dohot antingantingna dohot tintinna dohot horunghorungna, ro di ulaula sere marragamragam, jala ganup mamelehon sere bahen pelean tatingan tu Jahowa.

²³Manang ise pe na umpeop abit sian bonang na rata langit dohot na rara dohot na merham, nang hain bontar na halus dohot imbulu ni hambing, tole bobak ni birubiru tunggal angka na tinubar dohot bobak ni pitudar, diboan be ma i.

²⁴Manang ise na umpeop perak manang tombaga diboan be ma i guguanna bahen pelean tatingan tu Jahowa; jala manang ise na umpeop hau pinasa ditaruhon be ma i pangkeon tu sandok ulaon tohonan marragamragam.

²⁵Nang saluhut inaina angka na torang marroha mangganti be do dohot tanganna sandiri, jala diboan be na ginantina i, abit sian bonang na rata langit dohot na rara dohot na merham, nang hain bontar na halus.

²⁶Jala nasa parompuan angka na tarsunggul rohana jala na marhapistaran, mangganti imbulu ni hambing ma nasida.

²⁷Alai anggo angka induk i, diboan be ma mata intan unam dohot simata landus bahenon tu baju epod dohot tu tutup andora.

²⁸Tole muse parmurpuri dohot miak tu parpalitoan dohot miak na hushus pangkeon laho mamiahi dohot manutung daupa.

²⁹Nasa baoa dohot parompuan sian halak Israel angka na tarsunggul rohana be gabe girgir mamboan silehonlehon manumpak ulaon marragamragam, na tinonahon ni Jahowa marhite sian si Musa, sibahenon ni halak Israel bahen pelean tu Jahowa. III.

³⁰Dung i ro ma hata ni Musa tu halak Israel: Ida hamu ma, nunga pola dijou Jahowa sahalak na margoar Bezaleel, anak ni si Uri, i ma anak ni si Hur sian marga Juda.

³¹Nunga pola digohi Tondi ni Debata rohana i marhapistaran, marhapandean dohot marparbinotoan mangaradoti saluhut ulaon i.

³²Asa dipingkiri rohana hapandean na sumurung laho mamandei sere, perak dohot tombaga.

³³Huhut manguhir dohot mamijor batu intan, mamandei hau pe mambahen hapandean marragamragam.

³⁴Angkup ni nunga dibasabasahon Jahowa hamaloon tu bagasan rohana mangajari halak na asing, ibana dohot si Oholiab, anak ni si Ahisamakh sian marga Dan.

³⁵Nunga digohi Jahowa rohanasida dohot hapistaran laho mambahen hapandean marragamragam, mamandei hau, mamunsa dohot mangangit abit sian bonang na rata langit, na rara dohot na merham, nang hain bontar na halus, tole hapandean ni partonun, asa dibahen nasida hapandean marragamragam, jala dipingkirpingkiri rohanasida hapandean angka na sumurung.