Read Batak Toba 2 MUSA 36 Bible Online

2 MUSA 36 - Batak Toba bible

2 MUSA 36

¹I. [1] Jadi tole ma Bezaleel dohot Oholiab ro di sude baoa angka na pistar marroha, angka naung maruli rohana hapistaran dohot hapandean sian Jahowa, marmulahon mambahen hapandean marragamragam mangaradoti tohonan di inganan na badia i, hombar tu saluhutna na tinonahon ni Jahowa.

²Ai nunga dijou Musa hian Bezaleel dohot Oholiab ro di sude baoa angka na pistar marroha, angka naung maruli rohana hapistaran sian Jahowa, nang sude naung tarsunggul rohana ro jumonok mangaradoti ulaon i.

³Jadi dibuat nasida ma sian adopan ni Musa saluhut pelean tatingan, angka naung binoan ni halak Israel manumpak ulaon mangaradoti tohonan di inganan na badia i, asa paulionna; alai sai didatdati nasida dope ganup sogot mamboan silehonlehon guguan lomo ni rohana i tu Musa.

⁴Jadi ro be ma sude pande, angka na mangula sandok ulaon di inganan na badia i, ganup sian ulaon na niulanasida be.

⁵Didok nasida be ma tu Musa songon on: Magodangku do guguan na binoan ni bangso i, lobi sian na tarpangke hasea tu ulaon tohonan i, naung tinonahon ni Jahowa sibahenon i.

⁶Jadi didokkon Musa ma martingting tu sandok parsaroan i, songon on: Unang be didatdati hita on, nang baoa nang parompuan mangalehon guguan manumpak ulaon pauli inganan na badia i! Jadi dipasohot bangso i ma mamboan.

⁷Ai nunga tung singkop ulaula tu sandok ulaon sipaulion i, marlobilobi gariada. II.

⁸Jadi tole ma sude halak na pistar marroha, angka siula ulaon i pauli undungundung i, i ma sampulu rimberimbe sian bonang na nidua, na rata langit, na rara jala na merham, margombaran kerubim, hapandean na binahen ni parpunsa.

⁹Ia unjur ni rimberimbe i sadasada duapulu ualu asta do, ia bidangna opat asta; sisada suhat do saluhut angka rimberimbe i.

¹⁰Limalima angka rimberimbe i dipadomu, na sada tu donganna.

¹¹Dibahen huhut angka tali sangkutan na rata tu bibir ni rimberimbe parjolo i apala di pardomuanna, laos songon i muse dibahen di bibir ni rimberimbe paduahon i bahen pardomuan paduahon.

¹²Limapulu tali sangkutan dibahen tu rimberimbe na sada, jala limapulu tali sangkutan muse dibahen di ujung ni rimberimbe i, apala di pardomuanna paduahon; jadi masijaloan ma angka tali sangkutan, na sada tu donganna.

¹³Dibahen muse ma limapulu haithait sere laho patunggomhon angka rimberimbe i, na sada tu donganna, i ma manjadi sada undungundung.

¹⁴Dibahen muse ma angka rimberimbe sian imbulu ni hambing bahen langitlangit di atas ni undungundung i; sampulu sada rimberimbe sisongon i dibahen.

¹⁵Ia unjur ni rimberimbe sadasada tolupulu asta do jala bidangna opat asta; sisada suhat do rimberimbe na sampulu sada i.

¹⁶Jala dipatunggom pulik na lima rimberimbe i, laos songon i pulik rimberimbe na onom nari.

¹⁷Dibahen muse ma limapulu tali sangkutan di bibir ni rimberimbe na sada parduru apala di pardomuanna, jala limapulu tali sangkutan di bibir ni rimberimbe na sada nari, di pardomuanna paduahon.

¹⁸Dibahen muse ma limapulu haithait tombaga laho padomuhon undungundung i gabe sada.

¹⁹Dibahen muse ma di atas langitlangit ni undungundung i salampis sian bobak ni birubiru tunggal na tinubar, di atas ni muse salampis sian bobak ni pitudar.

²⁰Dibahen muse ma angka papan sian hau pinasa bahen dorpi ni undungundung i, angka sipajongjongon do.

²¹Sampulu asta ganjang ni papan i, jala tonga dua asta ia bidang ni sada papan.

²²Mardua pasi ganup papan, baris be tu donganna, songon i do dibahen saluhut papan angka na masuk tu undungundung i.

²³Jala songon on do dibahen parmasuk ni angka papan tu undungundung i: Duapulu papan sambariba tungkan dangsina.

²⁴Dibahen do huhut opatpulu ojahan perak di toru ni na duapulu papan i, dua be ojahan di toru ni sada papan, marguru tu pasina na dua i.

²⁵Di na sambariba nari ni undungundung i pe, tungkan utara dibahen muse duapulu papan.

²⁶Nang na opatpulu ojahanna perak, dua be ojahan di toru ni sada papan.

²⁷Alai di tampahan ni undungundung tungkan hasundutan, onom papan dibahen.

²⁸Dibahen muse papan dua nari di na dua suhi ni undungundung i, di tampahanna parpudi.

²⁹Jadi dua lampis ma i sian toru mardomu di ginjang pinadomu ni sada langgu; songon i ma dibahen duansa di na dua suhi i.

³⁰Jadi ualu papan ma disi mardongan ojahanna perak sampulu onom toropna, dua be di toru ni sada papan.

³¹Dibahen muse ma angka ransangransang sian hau pinasa, lima tu angka papan di na sambariba ni undungundung i.

³²Laos lima ransangransang tu angka papan di na sambariba nari ni undungundung i, laos lima ransangransang tu angka papan ni undungundung i di tampahanna parpudi tungkan hasundutan.

³³Dibahen ma huhut ransangransang partonga na di dos tonga ni angka papan, torus sian suhi na sada tu suhi na sada nari.

³⁴Dilampis muse ma angka papan i dohot sere, sabongna pe sian sere do dibahen, asa tusi pabongoton angka ransangransang; angka ransang i pe dilampis do dohot sere.

³⁵Dipauli muse ma sada rimberimbe sian bonang na rata langit, jala na tinubar, jala na merham dohot sian hain na halus na nidua, margombaran kerubim do i dibahen, tinonunhon ni parpunsa tusi.

³⁶Dung i dihirehon ma i tu opat tiang sian hau pinasa angka na nilampis dohot sere, jala marhaithait sere, jala dituang tusi opat ojahan perak.

³⁷Dipauli muse ma sada rimberimbe bahen tutup ni pintu ni undungundung i sian bonang na rata langit dohot na tinubar dohot na merham dohot sian bonang na bontar na nidua, tinonunhon ni parpunsa.

³⁸Dibahen muse ma lima tiang rap dohot haithaitna; dilampis muse ma angka uluna nang rungkungna dohot sere, jala ditumpa lima ojahanna sian tombaga.