Read Batak Toba 2 MUSA 37 Bible Online

2 MUSA 37 - Batak Toba bible

2 MUSA 37

¹I. [1] Dung i Bezaleel sandiri ma paulihon poti i sian hau pinasa, tonga tolu asta unjurna, jala tonga dua asta bohangna, laos tonga dua asta dohot timbona.

²Dung i dilampis ma poti i dohot sere na pita, sian bagasan dohot sian ruar, jala dibahen huhut bibirna marlaislais sere humaliang.

³Ditumpa huhut tusi opat langgu sere tu suhina na opat i, dua langgu di na sambariba be.

⁴Dibahen muse ma haluhalu sian hau pinasa, jala dilampis do i dohot sere.

⁵Disurukkon ma haluhalu i tu bagasan langgu angka na lohot di poti i, laho mangusung poti i.

⁶Dibahen muse ma sada langkop pardengganan sian sere na pita, tonga tolu asta unjurna, jala tonga dua asta bidangna.

⁷Dibahen muse ma dua kerubim sian sere sangkimpal na tinopa, dibahen do i tu na dua tampahan ni langkop parpadanan i.

⁸Kerubim na sada tu tampahan na sada, jala kerubim na sada nari tu tampahanna na sada nari; tubu sian bagasan langkop pardengganan i tolpus tu duru dibahen angka kerubim i di na dua tampahanna.

⁹Jala dipaherbang angka kerubim i ma habongna na dua i sian ginjang, asa dihungkupi habongnasida langkop pardengganan i, jala padompak be bohinasida, dompak langkop pardengganan i bohi ni angka kerubim i mamereng. II.

¹⁰Dipauli muse ma sada meja sian hau pinasa, dua asta unjurna, jala saasta bidangna, jala tonga dua asta timbona.

¹¹Dilampis ma i muse dohot sere na pita, jala dibahen martopi sere humaliang.

¹²Dibahen muse ma tusi sada lais santopap bidangna humaliang, dibahen muse laisna i martopi sere pinariponipon humaliang.

¹³Jala ditumpa tusi opat langgu sere, angka na binahenna tu suhina na opat i, angka na di patna na opat i.

¹⁴Jonok di toru ni lais i do angka langgu i bahen panuruhan ni haluhalu laho mangusung meja i.

¹⁵Sian hau pinasa ma angka haluhalu i dibahen, jala dilampis ma i dohot sere, i ma pangkeon mangusung meja i.

¹⁶Dipauli ma huhut ulaula sipangkeon di atas meja i: angka pingganna, saoanna, hondina dohot mangkukna, bahen pangusean ni tuak tangkasan ma i; sian sere na pita do i dipauli. III.

¹⁷Dipauli muse ma sada parpalitoan sian sere na pita, sangkimpal parpalitoan i ditopa, ro di badanna, dangkana dohot butuhana, hansingna dohot bungana.

¹⁸Onom dangka ruar sian lambungna, tolu dangka, sian na sambariba ni parpalitoan i, jala tolu dangka sian na sambariba nari.

¹⁹Martolu butuha, songon bunga ni buapala ganup dangkana i, mardongan angka hansing dohot bunga; laos songon i do dibahen tu na onom dangka i, angka na ruar sian parpalitoan i.

²⁰Alai opat do butuha ni parpalitoan i, songon bunga ni buapala mardongan hansing dohot bunga.

²¹Jala sahansing be di toru ni na dua dangkana angka na ruar sian i; suang songon i sahansing be di toru ni dangkana na dua, angka na ruar sian i; suang muse sahansing be di toru ni dangkana na dua, angka na ruar sian i; gabe onom dangka ruar sian badan ni parpalitoan i.

²²Ruar do sian i angka hansingna dohot dangkana, luhutna i sian sangkimpal sere na pita i do dipauli.

²³Dipauli muse ma pitu palitona rap dohot panurturna dohot pangintopina sian sere na pita.

²⁴Sian satalenta sere na pita parpalitoan i dipauli, ro di parhohasna i sudena. IV.

²⁵Dipauli muse ma langgatan pardaupaan sian hau pinasa, saasta unjurna, jala saasta bohangna, maropat suhi tahe, jala dua asta timbona, ruar huhut sian i angka tandukna.

²⁶Jala dilampis do i dohot sere na pita, nang tutupna, nang dorpina humaliang dohot angka tandukna; dibahen do i huhut marbibir humaliang sian sere na pita.

²⁷Dibahen muse dua langgu sere di toru ni bibirna i di lambungna na dua i angkup be, bahen panuruhan ni haluhalu, asa dapot usungon ni halak langgatan i.

²⁸Alai sian hau pinasa haluhalu i dipauli, jala dilampis do i dohot sere.

²⁹Dipamasak huhut miak pamiahion na badia i dohot daupa sian pamurpuri na so sinaor, mangihuthon hapandean ni pande daon. [309†]