Read Batak Toba 2 MUSA 5 Bible Online

2 MUSA 5 - Batak Toba bible

2 MUSA 5

¹I. [1] Dung i ditopot si Musa dohot si Aron ma raja Firaun didok ma: Boti tona ni Jahowa, Debata ni Israel: Loas ma laho bangsongki, asa marpesta nasida di Ahu di halongonan. [27†]

²Dung i ninna raja Firaun ma: Ise do Jahowa, tung ingkon tangihononku soarana mangaloas laho Israel? Ndang hupabotoboto Jahowa, Israel pe ndang huloas laho. [28†]

³Dung i ninna nasida ma: Na pajumpang do hami dohot Debata ni halak Heber, ua loas ma hami laho partoluarian tu halongonan, asa mamele hami tu Jahowa, Debatanami, asa unang dihonahon tu hami begu antuk manang podang.

⁴Dung i ninna raja ni Misir i ma tu nasida: Ia ho ale Musa dohot Aron, boasa tung lolaanmuna bangso i sian ulaonnasida? Laho ma hamu tumopot rodimuna.

⁵Angkup ni didok raja Firaun ma: Ida ma madeakku gariada bangso i di tano on, lam pasadionmuna nasida sian rodinasida. [29†]

⁶Ala ni dilehon raja Firaun ma di na sadari i parenta tu angka mandur dohot tu angka juaratulis di tongatonga ni bangso i, ninna ma:

⁷Ndang jadi be lehononmuna durame tu bangso i mambahen tano takko, songon siap ari; nasida sandiri ma laho papungupungu durame.

⁸Alai anggo bilangan ni tano takko, angka na binahennasida songon siap ari, tong do pangidoonmuna sian nasida, unang orui hamu sian i, ai angka sigurbak ulu do nasida, umbahen mangangguhi nasida mandok: Laho ma hami mamele tu Debatanami.

⁹Ingkon parengeon ulaon tu nasida, asa adong siulaonnasida, asa unang dipatangitangi hatahata gapgap.

¹⁰Jadi ruar ma angka mandur ni bangso i dohot angka juaratulisna, angka didok nasida ma tu natorop i: Songon on do parenta ni raja Firaun: Ndang jadi be lehonon durame tu hamu.

¹¹Hamu ma laho mangalului durame di hamu, manang didia jumpang hamu; alai ndang jadi moru anggo sian ulaonmuna.

¹²Jadi mampar ma na torop i tu sandok tano Misir papungupungu panabian singkat ni durame.

¹³Jadi sai disosaksosak angka mandur i nasida, angka ninna ma: Pasun hamu ulaonmuna songon siap ari, songon uju na adong durame.

¹⁴Jadi hona balbal ma angka sintua ni halak Israel, angka na pinabangkit ni mandur ni raja Firaun tu nasida, angka ninna ma: Boasa so dipasidung hamu bilanganmuna tano takko songon siap ari, nang nantuari nang sadari on? II.

¹⁵Jadi ditopot angka sintua ni halak Israel ma raja Firaun, mangangguhi ma nasida ninna: Boasa ma tung songon i bahenonmu tu angka naposom?

¹⁶Ndang be maruli durame angka naposom, sai bahen hamu tano takko, angka ninna mandok hami! Jala ida ma, hona linsing angka naposom, gabe dapotan dosa bangsom. [30†]

¹⁷Alai ninna raja i ma: Angka sigurbak ulu do hamu tongon, umbahen sai didok hamu: Loas ma hami laho mamele tu Jahowa.

¹⁸On pe, laho ma hamu, mangula ma hamu, ianggo durame ndang be lehonon tu hamu, alai sai lehon hamu bilangan ni tano takko i.

¹⁹Jadi diida angka sintua ni halak Israel ma sorimagonasida i, ala didok: Ndang jadi oruanmuna sian tano takko pinaulimuna songon siap ari.

²⁰Dung i di na ruar i nasida sian jolo ni raja Firaun, didapot nasida ma si Musa dohot si Aron, angka na jongjong mandapothon nasida.

²¹Angka didok ma tu nasida: Sai Jahowa ma marlulu dompak hamu dohot manguhum, ala binahenmuna hami hasomoran ni raja Firaun dohot angka naposona i mangalehon podang tu tangannasida mambunu hami. [31†]

²²Jadi mulak ma si Musa tumopot Jahowa, jala didok ma: Ale Tuhan, boasa ma tung paporsuhonmu bangso on? Boasa ma tung suruhononmu ahu tuson?

²³Ai olat ni dung bongot ahu tumopot raja Firaun mangkatai marhitehite goarmi, ganda do jahatna tu bangso on, jala ndang dipalua Ho bangsom.