Read Batak Toba JOB 1 Bible Online

JOB 1 - Batak Toba bible

JOB 1

¹I. [1] Adong do na jolo di tano * Us, sada baoa, na margoar ** si Job; na + daulat jala na burju do roha ni baoa i jala mabiar mida Debata, jala dipadao rohana sian hajahaton. [1†]

²Ditubuhon ibana do pitu anak dohot tolu boru. [2†]

³Ia torop ni pinahanna pitu ribu birubiruna, jala tolu ribu untona, jala lima ratus pasang horbona, jala lima ratus halodena boruboru, angkup ni mansai torop naposona; sumangap do ibana tahe sian saluhut halak * na di habinsaran. [3†]

⁴Alai laholaho do anggo angka anakna mambaheni panggalangon, ganup di bagasan jabuna dohot di ari hatutubuna be; disuru huhut mamio ibotona na tolu i, asa mangan dohot minum rap dohot nasida. [4†]

⁵Ia dung marliat angka ari panggalangan i, disuru si Job ma mangalapi nasida, asa * diuras nasida; dipasogot ma hehe manogotna i; jala dipelehon angka pelean situtungon, marguru tu toropnasida sudena. Ai ninna roha ni si Job do: Atik tung naung mardosa angka anakkonku, jala naung + ditundali rohana di bagasan maon Debata. Sai songon i dibahen si Job ganup ari. [5†] II.

⁶Alai jumpang ma di na sadari, ro be ma angka * anak ni Debata jongjong di jolo ni Jahowa, tung ro ma dohot sibolis tu tongatonganasida. [6†]

⁷Dung i didok Jahowa ma tu sibolis i: Sian dia do ho ro? Jadi ninna sibolis i ma mangalusi Jahowa: Sian * paraotaotan do ahu mangkahapi tano on. [7†]

⁸Dung i ninna Jahowa ma tu sibolis i: Atehe, nunga tung diiburu roham naposongku si Job? Ai ndang adong baoa tudoshon ibana marroha di tano i, * daulatna, tigorna, biarna mida Debata, jala dipadao rohana sian hajahaton. [8†]

⁹Dung i ninna * sibolis i ma mangalusi Jahowa: Nda na + marpambuat do biar ni si Jobi mida Debata? [9†]

¹⁰Nda diramoti Ho ibana dohot jabuna humaliang ro di nasa na di ibana? Ulaon ni tanganna pe nunga * ditumpak Ho manjadi, jala ditutup pinahanna do tano i. [10†]

¹¹Alai tung sura disurdukkon Ho tanganmu mambuat saluhut na di ibana, manang so * buraan na ma Ho di hapataron. [11†]

¹²Dung i ninna Jahowa ma tu Sibolis i: Ida ma, sahat tu tanganmu ma nasa na di ibana, alai ndang jadi dais tanganmu anggo tu ibana sandiri. Dung i ruar ma Sibolis i sian adopan ni Jahowa. III.

¹³Dung i jumpang ma di na sadari, tongon * mangan dohot minum anggur angka anak ni si Job dohot boruna di bagasan jabu ni sihahaannasida. [12†]

¹⁴Jadi ro ma sada suruan manopot si Job, ninna ma: Maninggala nangkin angka horbo, jala angka halode boruboru manjampal di lambungna.

¹⁵Dung i ro halak sian * Seba mangalaum, ianggo angka naposo i ditampuli do dohot podang, holan sasada ahu na ma malua, mamboan barita tu ho. [13†]

¹⁶Andorang mangkatahon dope ibana, ro ma soluk jolma na asing mandok: Madabu * api ni Debata sian langit, jadi suda dipangan api i angka birubiru dohot angka naposo i, holan sasada ahu na ma malua mamboan barita i tu ho. [14†]

¹⁷Andorang mangkatahon dope ibana, ro ma soluk jolma na asing mandok: Ro do halak * Kasdim mambahen + tolu panggungan, mangalaum angka unto laos diboan do, ianggo angka naposo i ditampuli do dohot podang, holan sasada ahu na ma malua mamboan barita tu ho. [15†]

¹⁸Andorang mangkatahon dope ibana, ro ma soluk jolma na asing mandok: Tongon mangan dohot minum anggur angka anakmu dohot borum di jabu ni sihahaannasida. [16†]

¹⁹Jadi ida ma, ro * halisungsung na marpiupiu sian halongonan manondong dompak na opat suhi ni bagas i, gabe mate angka anakkonmu ditipa, holan sasada ahu na ma malua mamboan barita i tu ho. [17†]

²⁰Dung i hehe ma si Job * disansani ma angka ulosna jala + dinabung obuk ni uluna, jala manungkap ibana tu tano huhut martangiang. [18†]

²¹Jala didok ma: * Na marsaemara do ahu ruar sian butuha ni dainang, jala marsaemara do ahu mulak tusi. Jahowa do na mangalehonsa, Jahowa do muse mambuatsa + pinuji ma Goar ni Jahowa! [19†]

²²Di bagasan saluhut parsorionna i, ndang mardosa si Job, jala ndang manarita rohana dompak Debata. [20†]