Read Batak Toba JOB 14 Bible Online

JOB 14 - Batak Toba bible

JOB 14

¹I. [1] Ia jolma na tinubuhon ni parompuan, otik do ariarina, jala mahapan di hangaluton. [193†]

²* Mangerbang do ibana songon bungabunga dung i malos, jala manilu ibana laho salpu songon + halinu na so leleng manahan. [194†]

³Hape pola ma tung ranapan ni matam jolma sisongon i, jala pola boanonmu ahu tu paruhuman di adopanmu? [195†]

⁴Tung ise ma tarbahen mambahen sada jolma na ias sian na ramun? Ianggo sada ndang adong. [196†]

⁵Molo naung dibuhul Ho ariari ni manisia, bilangan ni angka * bulanna, naung dibahen Ho + parbalohanna, na so tupa laosanna. [197†]

⁶Padao nian pamerengmu sian ibana, asa sonang ibana satongkin, asa sombu rohana di ujung ni ariarina, * songon anak gajian. [198†]

⁷Ai adong dope sihirimon anggo di hau, nang tung sura ditaba, tarbahensa dope martumbur, jala ndang mansohot martunas.

⁸Nang tung sura matua uratna di bagasan tano, jala mate pangkalna di bagasan orbuk. [199†]

⁹Asal diangor aek ulahanna do martunas, jala marranting songon suansuanan nambura sinuan.

¹⁰Alai anggo baoa ia dung mate, laos bustang boti, jala ia dung tos hosa ni jolma tudia be ibana? [200†]

¹¹Suda do aek mabaor sian tao, jala olo marsik ia sunge gabe mahiang. [201†]

¹²Alai anggo jolma i dung sapala bustang, ndang tarbahensa be hehe; saleleng adong dope langit, ndang hehe nasida, jala ndang tarsunggul sian na modom. [202†] II.

¹³Aut olo ma Ho nian * manabunihon ahu di bagasan parbeguan; diondingi Ho nian ahu disi, paima mombun rimasmu, jala dibahen Ho nian buhulna di ahu, dung i marpangulahi nian roham mida ahu. [203†]

¹⁴Ia dung mate baoa i, tung tagamon ma ulahanna mangolu? Tung di saluhut ariari ni * parporangonku nian ahu mangkirim, paima ro ari haluaonku. [204†]

¹⁵Disi Ho joujou di ahu, pintor alusanku do Ho, halungunhononmu tahe jadijadian ni tanganmu. [205†]

¹⁶Alai anggo nuaeng dibilangi Ho do langkalangkangku, jala ndang marpamuati roham mida dosangku. [206†]

¹⁷Nunga tarsahap panundalionku di bagasan parningotanmu, lam ganda dope hajahatonku dijujur Ho. [207†]

¹⁸Alai gari dolok tupa matompas do laos magargar, jala dolok batu tupa munsat sian ingananna. [208†]

¹⁹Angka batu peo pe malala do dibahen aek, jala tangkujuna mamburburhon orbuk ni tano i; suang songon i diago Ho pangkirimon ni jolma na gale. [209†]

²⁰Dipatunduk Ho do ibana ro di saleleng ni lelengna, gabe laho salpu ibana; Ho huhut paubahon bohina, dung i dipalaho Ho ibana.

²¹Marmulia pe angka anakna, ndang dipabotoboto, marlea pe nasida ndang pardulina. [210†]

²²Alai ripe mangae na bernit na ma dagingna i, jala ripe marsak ia tondina.