Read Batak Toba JOB 15 Bible Online

JOB 15 - Batak Toba bible

JOB 15

¹I. [1] Dung i ninna si Elipas sian Teman mangalusi:

²Tung ture ma halak na pistar mangalushon * parbinotoan angin? Manang tung paburnangonna rohana dohot alogo sian purba? [211†]

³Ndang marguna anggo paminsangon marhite sian hata sambing, jala ndang adong labana hatahata sambing marpoda.

⁴Tongon tahe mansoadahon biar mida Debata do ho, jala diorui ho do tangiang moradophon Debata.

⁵Ai hajahatonmu sandiri tahe mamodahon tu pamanganmu mandok songon i halak na mangkalushon salana pinangasahonmu.

⁶Pamanganmi sandiri tutu manguhumi ho, ndada ahu, jala bibirmu manindangi dompak ho. [212†]

⁷Tung ho ma di roham jolma na parjolo tubu? Manang jumolo ho tarjadi sian angka dolok batu? [213†]

⁸Nunga tung dibege ho huroha hahomion ni Debata, jala diduduk roham sandok hapistaran? [214†]

⁹Tung aha ma na binotom, so dohot hami umbotosa? Tung aha ma na niantusanmu, so dohot hami mangantusi? [215†]

¹⁰Nang di tongatonganami adong do halak na ubanon, naung sarimatua situtu, angka na tumua tahe sian amanta. [216†]

¹¹Tung na so pola do huroha anggo di roham angka * pangapulon sian Debata dohot hata na lambok na hudok hami tu ho? [217†]

¹²Boasa tung pangaruntuson roham, jala boasa tung * songe pamerengmu? [218†]

¹³Tung hum ho marmurukmuruk dompak Debata dohot paruarhon hata teal sian pamanganmu? II.

¹⁴Tung beha ma pambahen ni jolma na gale gabe na ias ibana? Manang jolma tubu ni parompuan gabe bonar ibana? [219†]

¹⁵Ida ma, gari mida angka na badiana ndang pos rohana, gari angka langit i ndang pita anggo moradophon Ibana. [220†]

¹⁶Lam beha ma jolma parroha mago dohot na busuk, jolma na manobur hajahaton songon aek! [221†]

¹⁷Naeng tariashononku tu ho, antong tangihon ma ahu, jala manang aha naung huida naeng pajojoronku tu ho.

¹⁸Manang aha naung binaritahon ni halak na pistar so marpamorso sian ompunasida.

¹⁹Tu nasida sandiri tahe tano i dipasahat, jala ndang adong na jumonok tusi anggo halak na buro. III.

²⁰Saleleng mangolu halak * parjahat i sai mangae na porsuk do ibana, jala nunga binuhul hian bilangan ni angka taon di halak siulahon gogo. [222†]

²¹Suara hasonggoton marsaringar tongtong di bagasan pinggolna, apala di tingki hadoharonna ro pangago so pangkirimanna. [223†]

²²Ndang be dihirim rohana tarbahensa dope malua sian haholomon, ripe panganon ni podang na ma ibana diparbaga rohana.

²³Sai madoado do ibana mangalului sipanganon, nunga diboto hian naung jonok pinadiri di ibana ari haholomon. [224†]

²⁴Pusok hosana binahen ni hasusaan dohot hagogotan, angka na manahopi ibana, songon raja na hobas manahopi parporangon.

²⁵Ala pinatoltolna tanganna naeng mangalo Debata, jala ogaoga ibana dompak Nasunhinagogo.

²⁶Tung dipagakgak do rungkungna marlojong manahopi Ibana, marondingonding tu lombulombuna angka na baris.

²⁷Ala naung hinungkupan ni mokmokna bohina, pola marhorothorot haehaena dibahen mokmokna. [225†]

²⁸Jadi maringan ibana di bagasan huta, angka naung niulang, di bagasan jabu, angka na so jadi inganan nian, angka naung pinadiri hian bahen timbunan batu. [226†]

²⁹Ndang tagamon mamora ibana, jala ndang tagamon tongtong sinamotna i, jala ndang tagamon tu gandana artana di tano on.

³⁰Ndang tagamon malua ibana sian haholomon, angka tumburna pe malos do dibahen jilam ni api, jala purpur do ibana binahen ni parngongos ni hosa ni Debata. [227†]

³¹Unang ma marhaposan ibana tu ugasan na laho salpu, na paotootohon dirina ibana disi, ai hamagoan do upana di ujung.

³²Ndang dope gok arina, nunga jumpang ajalna, jala ndang be rata marbulung dangkana.

³³Mosu ibana bahenon ni Debata songon parbue ni hau anggur, jala marurus ibana bahenonna songon bunga ni hau jetun. [228†]

³⁴Ai ingkon ripur do pinompar ni parjahat, jala ingkon suda panganon ni api angka undungundung ni halak na olo manjalo sisip. [229†]

³⁵Marbortianhon hangaluton nasida, gabe ditubuhon pardangolan, jala butuhanasida mangarade sipaotooto. [230†]