Read Batak Toba JOB 18 Bible Online

JOB 18 - Batak Toba bible

JOB 18

¹I. [1] Dung i ninna si Bildad sian Sua ma mangalusi:

²Sadia leleng on sai palagelageonmuna hatahata? Sai olo ma hamu parrohaon, dung pe i asa mangkatai hita!

³Boasa tung dietong roham hami songon pinahan? Boasa tung songon na maoto hami di roham? [257†]

⁴Tung ho sandiri do tahe marsuragehon roham di bagasan dibahen gusarmu; tung tagamon tarulang ma tano on ala ho, manang tung munsat dolok batu sian ingananna? II.

⁵Tongon tahe, ingkon mintop do palito ni halak parjahat, jala unang be marsinondang nalanala ni apina. [258†]

⁶Hatiuron i pe, ingkon gabe haholomon di bagasan undungundungna, jala palitona ingkon mintop di atasna. [259†]

⁷Ingkon lam * targogot langkalangka ni hagogoonna, jala + sangkapsangkapna manginona tu ibana sandiri. [260†]

⁸Ai patna sandiri padapot ibana di bagasan aring, jala mardalani ibana di bagasan tali na rundut. [261†]

⁹Sai na taralit do tambihulna di bagasan jorgong, jala lingkup tu ibana rambang.

¹⁰Marsibuni di bagasan tano aringna ditaon, jala bostangna di dalan na bolon.

¹¹Angka hinamago manonggoti ibana humaliang, jala dihampungi angka bogas ni patna. [262†]

¹²Hisapan hinamagona i pasudasuda ibana, jala ngomngom di lambungna hamagoan i.

¹³Nunga suda dipangan uraturat ni dagingna, nunga pola suda tahe angka ruasna dipangan anak buhabaju ni hamatean.

¹⁴Tarsarat do ibana sian undungundungna, * haposan ni rohana hian, jala ingkon langkahononna mandapothon + raja ni hasonggoton. [263†]

¹⁵Halak na pulik marga na ma maringan di bagasan undungundungna, ala so adong tadingtadinganna; tung disirsirhon do * barerang tu ingananna i. [264†]

¹⁶Malos do angka uratna sian toru, jala ditultuli dangkana sian ginjang. [265†]

¹⁷Pesan do baritana sian tano on, jala ndang be targoar ibana di angka alaman. [266†]

¹⁸Dionjarhon halak do ibana sian hatiuron tu haholomon, pola dipabali ibana sian tano on.

¹⁹Ndang teba di ibana anak manang pahompu di tongatonga ni bangsona, tung na so adong pasipasina tinggal di ingananna.

²⁰Tung tarsonggot situtu do halak di pudina mida * ari hinamagona, jala panonditnonditon disi halak na robi. [267†]

²¹Sai songon i do parsorion ni isi ni jabu ni halak pargeduk, jala songon i do inganan ni halak angka na so tumanda Debata.