Read Batak Toba JOB 20 Bible Online

JOB 20 - Batak Toba bible

JOB 20

¹I. [1] Dung i ninna si Sopar na sian Naema ma mangalusi:

²Sai masirapusan angka pingkiranku mangalusi hatahatam, pola gunsang rohangku di bagasan ala ni.

³Ingkon pabegebegeonku hape pangajaran bahen haurahonku, alai tondi i manariashon paralusan tu ahu di bagasan rohangku. [286†]

⁴Ndang diboto ho hapengani hata on sian na robi sahali dope, olat ni dung adong dipaojak jolma di atas tano on.

⁵Satongkin sambing do suraksurak ni halak parjahat, jala las ni roha ni halak pangarupa sangkidop mata do lelengna. [287†]

⁶Nang pe manaek sahat ro di langit hajungkatonna pola mandolos uluna tu ombun di rohana. [288†]

⁷Ingkon buriapus ibana songon * ginagatna sandiri ro di salelenglelengna, pola dohonon ni halak na marnida ibana na jolo: Didia ibana ulaning? [289†]

⁸Songon doras ni nipi ibana habang, ndang be jumpang halak ibana, hiap do ibana songon alatan borngin. [290†]

⁹Mata naung marnida ibana, ndang be idaonna ibana, jala ingananna hian pe, ndang umbolanna be. [291†]

¹⁰Angka anakna pe ingkon manehenehe tu halak angka naung pinapogosna, jala tanganna sandiri paulakkon arta na nidobona. [292†]

¹¹Manggagat tu holiholina do dosa angka na niulana di sibunian, peak di bagasan * orbuk do i rap dohot ibana. [293†]

¹²Nang pe tonggi hajahaton i didai pamanganna, jala diongom ibana do i di toru ni dilana. [294†]

¹³Lomo rohana paianianhon, ndang olo mambolongkon, tung dipaongomongom do i di bagasan pamanganna.

¹⁴Hape muba do roti pinanganna gabe rasun dung ro di butuhana, gabe * bisa ni ulok dari di bagasan ibana. [295†]

¹⁵Sinamot naung binondutannai, ingkon utahononna muse, Debata sandiri tahe paruarhon i sian butuhana.

¹⁶Nunga disopsop ibana bisa ni ulok dari, gabe * dila ni ulok dari mambunu ibana. [296†]

¹⁷Tung na so jadi be idaonna mabaor angka sunge sian situak ni loba dohot miak susu. [297†]

¹⁸Ingkon paulahonna naung nilaumna, ndang jadi parsaulihononna; ndang tagamon las rohana mida hamoraon na nilahanganna i. [298†] II.

¹⁹Ala naung dirupa ibana halak na pogos, jala dipupusi, jala nunga dilaum bagas, angka na so pinaulina. [299†]

²⁰Ai ndang olo sombu hisap ni butuhana, manang aha na pinangido ni hisapna i, ndang tagamon malua. [300†]

²¹Nanggo sada ndang malua dibahen papanganna, dibahen i ndang tagamon ganda sinamotna.

²²Atik pe na mora jong hian ibana, gabe marpogospogos do, tung marsitampak do angka jea i mangonai tu ibana. [301†]

²³Jadi asa tung gok butuhana, tongoson ni Debata ma parpiarpiar ni rimasna tu ibana, jala * diudanhon do i tu ibana bahen sipanganonna. [302†]

²⁴Ia sanga pe ibana malua moradophon sinjata bosi, garsang ma ibana bahenon ni sior haksa. [303†]

²⁵Ia dienet sumbia i, jadi ruar do nian sian dagingna, songon i nang podang sumillamsillam sian poguna, alai songgop do tu ibana songgotsonggot hamatean. [304†]

²⁶Nasa haholomon marsibuni di bagasan * sinamotna, suda do i + panganon ni api na so niombus ni jolma, ia adong pe teba di bagasan undungundungna, ingkon mago marambolongan do i. [305†]

²⁷Langit i huhut papatarhon hajahatonna, jala ia tano on hehe mangalo ibana. [306†]

²⁸Ingkon tarboan tu habuangan do sinamot na di bagasan jabuna, jala maup di ari pangarimasanna.

²⁹I ma jambar na pinatongon ni Debata tu jolma parjahat, jala teanteanan na pinatontu ni Debata tu ibana. [307†]