Read Batak Toba JOB 21 Bible Online

JOB 21 - Batak Toba bible

JOB 21

¹I. [1] Dung i ninna si Job ma mangalusi:

²Sai tangihon hamu ma panariasonku, i ma nian singkat ni pangapulonmuna i. [308†]

³Hasiati hamu ahu, asa hudok hatangkon, ia dung tolhas hudok, tole pe hamu manginsahi.

⁴Tung tu jolma ma ahu marpangalualuan, * leak ma marsak tondingku tung sura. [309†]

⁵Dompakkon hamu ma ahu, asa tarhalomong hamu, jala mangampehon tangan tu pamangan. [310†]

⁶Ai molo sapala marningot ahu disi, angka hitir do ahu jala manindang imbulu ni dagingku. [311†] II.

⁷Boasa tung laos mangolu halak parjahat i, pola sanga sarimatua, jala lam tamba sinamotna? [312†]

⁸Pinomparnasida marsonangsonang do di jolonasida, jala simbur magodang angka pahompuna dipaidaida matana. [313†]

⁹Bagasnasida pe marhasonangan do ndang dung marhabiaran, jala ndang dung mangonai * batahi ni Debata tu nasida. [314†]

¹⁰Marbaringin lombuna jala ndang sala, rodot do lombuna maranak jala ndang dung habangan.

¹¹Disuru nasida anakkonna tu balian songon sada punguan birubiru, jala panihalnihalon angka anakna.

¹²Marioho suaranasida mardongan gondang dohot hasapi, jala marlas ni roha nasida umbege suara ni tulila. [315†]

¹³Dipasudasuda nasida ariarina marhariburon, hape tompu nasida lonong tu banua toru so pangkirimanna.

¹⁴Lam didok muse dope tu Debata: Paholang ma sian hami, ai ndang lomo rohanami umboto angka dalanmu. [316†]

¹⁵Pinabotoboto Ibana Nasunhinagogo i, umbahen tung oloannami Ibana? Jala tung aha ma gunana hami martangiang tu Ibana? [317†]

¹⁶Ida ma, ndada guru di nasida hadoharonna i. Sai mandao ma sian ahu * pingkiran ni halak parjahat! [318†]

¹⁷Anggo piga hali do mintop * palito ni halak parjahat jala songgop + hamagoan tu nasida? Piga hali diturpukkon Ibana hinamago tu nasida di bagasan rimasna? [319†]

¹⁸Jala piga hali nasida tudoshon durame moradophon alogo, jala tudoshon * hurangkam pinurpurhon ni habahaba? [320†]

¹⁹Tu * pinomparna disimpan Debata torutoruna; tu ibana sandiri nian diluluhon Ibana, asa mananda nian rohana disi! [321†]

²⁰Matana sandiri nian sanga marnida hamagoanna; ibana sandiri nian minum sian * rimas ni Nasunhinagogo. [322†]

²¹Ai ndang disarihon rohana pinomparna, dung mate ibana, anggo dung gok bilangan ni bulan angka naung binuhul hian tu ibana.

²²Tung jolma ma mangajarhon parbinotoan tu Debata, Ibana balik manguhumi angka isi ni banua ginjang. [323†]

²³Sadaon mate apala di haroro ni gogona, uju di sun ni hadoharonna jala marhasonangan situtu dope ibana.

²⁴Uju gok horbo siporoan barana, jala gok utohutok dope holiholina. [324†]

²⁵Jala sadaan mate margondok ni roha situtu, jala ndang dung didai hasonangan.

²⁶Hape rap nasida modom di bagasan orbuk jala marsapu * gulokgulok nasida duansa. [325†] III.

²⁷Ida hamu ma, tangkas do hutanda pingkiranmuna i dohot getegete ni rohamuna mangarupa ahu.

²⁸Ai didok hamu do: Didia do bagas ni halak sibahen gogo, jala didia do undungundung inganan ni halak parjahat? [326†]

²⁹Beha, ndang dung disungkun hamu halak pardalan pansar, jala ndang mananda hamu di partinandaannasida on?

³⁰Ai di ari * hamagoan ndang marmara anggo + halak parjahat, jala di ari gombunggombung ni tahi diiringiring halak do nasida. [327†]

³¹Tung ise ma na hum patumpolhon tu ibana harohaonna adop bohi be, jala tung ise ma na hum mamaloshon tu ibana hombar tu na binahenna?

³²Lam dipataru halak dope ibana tu tanoman pasangaphonsa, jala marjaga dope di atas hinamborna. [328†]

³³Lambok marpeahan di atasna angka galogat ni rura i, jala luhut jolma naeng * maniru pambahenna i, jala ndang habilangan toropna angka na mambahen songon i jumolo sian ibana. [329†]

³⁴Dibahen i boasa sai datdatanmuna mangapuli ahu so marguna; pangarimpunan ni sude alusmuna i, holan dosa do.