Read Batak Toba JOB 23 Bible Online

JOB 23 - Batak Toba bible

JOB 23

¹I. [1] Dung i ninna si Job ma mangalusi:

²Nang sadarion sugal dope alualungku; ndang tarantan ahu tanganku dibahen orongku.

³Aut ni huboto nian manang didia jumpang ahu Ibana, aut tarbahen ahu nian sahat tu habangsana!

⁴Naeng nian pajojoronku panariasonku tu jolona, jala gok paraluson pamanganku bahenonku. [354†]

⁵Botoonku nian hata sialushononna tu ahu, jala antusanku manang aha sidohononna tu ahu.

⁶Tung tagamon ma mangasahon hinagodang ni gogona Ibana laho manorui ahu? Ndang tahe, sai na tiroanna do ahu. [355†]

⁷Tanda ma disi antong halak partigor masialusan dohot Ibana, gabe malua ahu sian Siuhum ahu ro di salelenglelengna. II.

⁸Alai ida ma, tung sura laho ahu dompak habinsaran, ndang disi Ibana, mulak ahu muse tu hasundutan, ndang dapot ahu Ibana disi.

⁹Molo mangula Ibana tungkan utara, ndang dapot tataponku Ibana, molo martabuni Ibana tungkan dangsina, gabe ndang idaonku.

¹⁰Alai anggo ibana, diboto do dalanku, tung sura diuji Ibana ahu, songon sere na pita ma ahu ruar. [356†]

¹¹Sai marsihohot do pathu manjujur bogasna, sai huihutihut do dalanna, * ndang dung manimbil ahu. [357†]

¹²Ndang dung hulaosi tona na ruar sian pamanganna, gumodang do huradoti hata angka na ruar sian pamanganna, asa hangoluanku sandiri. [358†]

¹³Alai tahe, parhata sada do anggo Ibana, tung ise ma na tuk manogang Ibana? * Jala guru lomo ni rohana do dipasaut. [359†]

¹⁴Sai na paujungonna do sangkap ni rohana hian taringot tu ahu, jala tung na marragam do angka sisongon i di bagasan rohana.

¹⁵I ma alana umbahen tung tarsonggot ahu moradophon bohina; molo sapala hupingkiri, angka hitir do ahu mida Ibana. [360†]

¹⁶Nunga Debata mambiarbiari rohangku, jala Nasunhinagogo i mambukbahi ahu.

¹⁷Ai ndang nian mago rohangku anggo mida holom ni parnidaanku, manang mida ahu sandiri pe na hinungkupan ni haholomon nuaeng. [361†]