Read Batak Toba JOB 24 Bible Online

JOB 24 - Batak Toba bible

JOB 24

¹I. [1] Boasa ulaning so dibuhul Ibana Nasunhinagogo i angka tingki partubolon, asa diida angka na tumanda Ibana nian angka * ari pamalosanna. [362†]

²Sai * dipaorot halak parjahat parbalohan, jala dilaum angka parduan birubiru, laos diparmahan do. [363†]

³Diolat nasida halode ni angka na tading di lampin, dibuat ia lombu ni na mabalu bahen singkoram. [364†]

⁴Dionjar ia halak na pogos sian dalan; ingkon mamolngit be isi ni tano angka na dangol i dibahen nasida. [365†]

⁵Ida ma, tudoshon halode harangan di halongonan ruar nasida tumopot ulaonna; ingkon sogot nasida hehe magalului sisoroonna; ingkon paraotaotan na ma mangalehon sipanganon tu nasida dohot tu ianakhonna.

⁶Ingkon di ladang nasida mansalong gagatonna, jala ingkon putihanna parbue na tading di bagasan porlak anggur ni parjahat.

⁷Marsaemara nasida modom bornginna i so marulos, jala ndang marbulusan di panangkihik ni ari.

⁸Marudan marari nasida di atas ni angka dolok, ala soada panisioanna gabe dolok batu dihaolhaol.

⁹Tung dirapus parjahat i do posoposo sian bagot ni inana, jala disoro dope na alit di halak na pogos bahen gade.

¹⁰Marsangkot bulung halak na pogos dipalaholaho nasida, so marbaju dibahen, jala halak na manarui tibalanna rapar do dipalaho. [366†]

¹¹Ingkon di holangkolang ni parikna nasida mamoro miak, * ingkon mauas dipasombu nasida halak na mardege pangilangan anggurna. [367†]

¹²Ingkon pola morongorong tarbege sian huta i angka na laho mate, jala maungaung suara ni halak na mabugang, alai ndang ditudu Debata na so uhum binahenna i.

¹³Di tongatonga ni halak angka na mangalo hatiuron do nasida, ndang olo nasida mananda angka dalanna, jala ndang dijujur nasida angka bogasna. [368†]

¹⁴Andos torang dope ari nunga hehe sibunu jolma laho mambunu halak na dangol dohot na pogos, jala bornginna i madoado ibana songon panangko.

¹⁵Mata ni pangalangkup paimahon rambon ni ari, ai ninna rohana do: Ndang adong na marnida ahu nanggo sahalak, jala patinda rupa ibana. [369†]

¹⁶Ia dung holom mangarut nasida tu angka jabu, mangkurung do nasida ia arian, ndang dihalomohon nasida hatiuron. [370†]

¹⁷Ai tiur ni ari manogotna i tudoshon linggoman ni hamatean di nasida luhutna, ai somal do nasida mangae songgotsonggot mida hamatean. II.

¹⁸Doras do parjahat i * diumbang aek, hona bura partalianna di tano on, ndang be diumboli dalan laho tu angka porlak anggurna. [371†]

¹⁹Songon panintak ni logo ni ari marngiarngiar di aek udan, songon i do panompu ni parbeguan di halak na mardosa.

²⁰Gari bortian ni inana mangkalupahon ibana, jala suda ibana dijepjep angka gulok, ndang be diingot halak ibana, jala marobur do halak parjahat i songon hau na tinaba.

²¹Dipupusi halak parjahat do parompuan na hol, na so dung marianakkon, jala ndang maruhum na denggan ibana tu parompuan na mabalu.

²²Alai tahe sai diudut Debata do ngolu ni halak pangarupa marhite sian gogona; hehe do nian ibana muse naung tarsosak rohana di ngoluna.

²³Sanga marhasonangan ibana dibahen Debata, pola dipangatauanhon, alai sai diranapi matana do angka dalannasida i.

²⁴Sanga dope nasida timbul, hape tongkin nari nunga lonong; mate do nasida songon halak na asing, jala digotil do nasida songon eme di hatotorasna.

²⁵Alai tung sura so songon i, tung ise ma na tuk manudu gabushu, jala mansoadahon panariasonku?