Read Batak Toba JOB 28 Bible Online

JOB 28 - Batak Toba bible

JOB 28

¹I. [1] Adong do panombangan di perak jala pangaragaan anggo di sere.

²Bosi pe sian tano do binuat, jala dilala ia batu gabe tombaga.

³Gari haholomoni marujung do dibahen jolma i, sahat ro di sude tampahanna disulingkit rohana do, nang batu haholomon dohot linggoman ni hamatean.

⁴Marbuhalbuhal disi sada sunge sian tano na so dung niumbolan ni pat ni jolma, tartantan nasida tusi, gaunggaung holang sian jolma.

⁵Sada do tano i, sian sisikna do ruar sipanganon, hape anggo partorunai marbalik do dibahen api. [402†]

⁶Jumpang do disi batu na marisi mata intan Sapir, huhut marisi sere marhimpalhimpal.

⁷Ndang dipabotoboto pidong panoro dalan laho tusi, jala ndang dapot mata ni lali piuan idaonna.

⁸Ndang dung diumboli pat ni * binatang ingananna, jala ndang dung dibolus singa. [403†]

⁹Mangonai tanganna tu dolok batu, jala marbalik ojahan ni angka dolok dibahen.

¹⁰Tolpus do dituhil angka dolok batu bahen dalan ni aek, luhut arta na arga dapot diida matana do.

¹¹Ditambak do angka sunge, asa unang mimir nanggo santetek, jala na buni sahali diparuar tu hatiuron. [404†] II.

¹²Alai anggo hapistaran i, sian dia ulaning jumpang? Jala didia do ulaning inganan pangalapan parbinotoan? [405†]

¹³Ndang diboto jolma na gale i asamna, jala ndang tagamon jumpang di bagasan * luat ni halak na mangolu on. [406†]

¹⁴* Lung i mandok: Ndang di bagasan ahu ibana; jala laut i mandok: Ndang di lambungku ibana. [407†]

¹⁵Ndang dapot tuhoron ibana, nang marhite sian sere na pita, jala asam na i ndang dapot timbangon marhite sian perak. [408†]

¹⁶Ndang tartimbang ibana dohot * sere sian Opir, manang mutiha na arga, manang mata intan pe. [409†]

¹⁷Ndang tartimbang ibana dohot sere manang simata landus pe, jala ndang tartungkar nang marhitehite ulaula sian sere.

¹⁸Ndang pola etongon humala dohot mata intan na songkal martimbangkon ibana; molo maruli hapistaran manang ise ummarga do i sian * mutiha. [410†]

¹⁹Ndang tartimbang tusi nang * mata intan Topas sian Kus, jala + sere na pita pe ndang tartimbang tusi. [411†] III.

²⁰Antong marharoroan sian dia ulaning hapistaran i? Jala didia ulaning jumpang inganan ni parbinotoan? [412†]

²¹Ai holip do i sian mata ni saluhut na mangolu, jala buni do i nang moradophon pidong angka na martongatonga langit.

²²Banua toru dohot hamatean mandok: Nunga nian dibege pinggolnami lingona. [413†]

²³Debata sambing tahe mangantusi dalanna, jala Ibana umboto ingananna. [414†]

²⁴Ai Ibana manatap sahat ro di angka ujung ni tano on, Ibana marnida saluhut na di toru ni langit.

²⁵Uju na binahenna timbangan ni alogo, jala dipaojak * parbalohan ni angka aek. [415†]

²⁶Uju na binahenna patik di udan, dohot dalan di porhas. [416†]

²⁷Uju i nunga Ibana martiruan tusi, jala dipapatar, jala dipadiri ojahanna huhut * disulingkit. [417†]

²⁸Alai anggo tu jolma i songon on do hatana: Ida ma, * biar mida Jahowa, i do hapistaran, jala + sumurut sian hajahaton, i do parbinotoan. [418†]