Read Batak Toba JOB 30 Bible Online

JOB 30 - Batak Toba bible

JOB 30

¹I. [1] Hape anggo nuaeng halak na umposo sian ahu marengkelihon ahu, ianggo amanasida nian na jolo maleahu huetong bahen dongan ni biang angka na mangadu birubirungku. [438†]

²Aha ma gunana di ahu nang gogo di tangannasida i, ai ndang sanga nasida sarimatua.

³Nasida angka na marniang binahen ni hahurangan dohot haraparon, pola laho manggagat tu tano bangkalbangkal, tu tano halongonan dohot na niulang sian na robi dope.

⁴Nasida angka na mansalong siarum horsik di holangkolang ni ramba, jala mangalului siarumpepe bahen panganonnasida.

⁵Tarliplip do nasida sian tongatonga ni jolma, jala disurakkon do nasida songon halak panangko.

⁶Ingkon maringan nasida di bagasan lombang sapsap bire, di bagasan liang ni tano i dohot di bagasan jaringjing ni dolok batu.

⁷Disi do nasida morongorong di holangkolang ni romporompo, jala manggompang nasida di toru ni tadatada.

⁸Angka anak ni halak na oto do nasida, huhut angka anak ni lapaslapas, pola batahi dibahen pabali nasida sian tano i.

⁹Hape anggo nuaeng gabe ende aling ahu di nasida, jala sirehereheonna. [439†]

¹⁰Marbiasbias nasida mida ahu, pola dipaholang dirina sian ahu, jala ndang moralangalang nasida mamursihi bohingku. [440†]

¹¹Ala naung dipahondur Ibana * tali ni siorhu, jala tarjepol ahu dibahen, gabe dibuang nasida kokang na di jolongku. [441†]

¹²Di * siamunhu hehe do angka halak gambalgambal jala dionjar pathu, jala dibungbungi + dalan hamagoan dompak ahu. [442†]

¹³Dilohai nasida do dalanku laho pagandahon hamagoanku, ndang pola adong na mangurupi nasida.

¹⁴Hira sian bungbung na ruak nasida ro manahopi ahu, pola mardorop pangarongomna.

¹⁵Angka hinamago manahopi ahu humaliang, nunga dipurpurhon hasonanganku hira marhite sian habahaba, jala nunga salpu mamolus hadoharonku * songon ombun. [443†] II.

¹⁶Ala ni * malampot do ateatengku di bagasan huhilala, nunga tung ditangkup angka ari pardangolanku ahu. [444†]

¹⁷Bornginna i ditura do holiholingku, hira dihishis sibukku huhilala, jala ndang mansohot panggirikna.

¹⁸Binahen ni panggagat ni sahithu mubauba do parsisikku hira pangkeanhu, jala disongkik ringkorang i ahu songon parrungkungan ni bajubaju. [445†]

¹⁹Nunga disampathon Ibana ahu tu bagasan gambo, gabe samak ahu tu orbuk dohot tu sirabun idaon.

²⁰* Mangangguhi ahu nian tu Ho, hape ndang dialusi Ho ahu, tongtong ahu jongjong di jolomi, jala dipanotnoti Ho ahu. [446†]

²¹Nunga tung marbalik Ho gabe musu na songe di ahu, mangasahon gogo ni tanganmu do Ho mangalo ahu. [447†]

²²Nunga tung dihindat Ho ahu laho papurpurhon tu alogo, tung didugudugu Ho do hadirionku.

²³Ai nunga huboto hian naeng boanonmu ahu tu hamatean, tu * bagas partumpuan ni nasa na mangolu. [448†]

²⁴Alai tahe, laho ompas jolma i nda diojakkon dope tanganna, manang ia ro hinamagona nda mangangguhi do?

²⁵Nda tangis do ahu mida halak na marhinamagoi? Nda maras do rohangku mida halak na pogos? [449†]

²⁶Ai sai maimaima do ahu di na denggan, hape jea do na ro; * mangkirim ahu di hatiuron, hape haholomon do na ro. [450†]

²⁷Sai hira gara do butuhangku huhilala, ndang olo marpasadian, nunga tung dirampok angka ari hinamago ahu. [451†]

²⁸Pola marbirong dagingku ahu mardalani, alai ndada binahen ni parngiar ni mata ni ari; hehe do ahu humasungsang di bagasan luhutan ni halak, huhut mangangguhi.

²⁹Nunga tung gabe dongan ni ulok naga ahu, gabe aleale ni pidong unto. [452†]

³⁰Marbirong do sisikku pola angka luak, jala mosok holiholingku dibahen mohopna di bagasan. [453†]

³¹Ala ni muba suara ni hasapingku gabe andung, jala suara ni tulilangku gabe suara partatangison. [454†]