Read Batak Toba JOB 31 Bible Online

JOB 31 - Batak Toba bible

JOB 31

¹I. [1] Nunga huhomat matangku, tung na so tupa mamereng tu boruboru na marbaju. [455†]

²Jadi ninna rohangku, aha ulaning tohaphu lehonon ni Debata sian ginjang, manang partalianku bahenon ni Nasunhinagogo sian banua ginjang?

³Tung so tama ma mangonai hamagoan tu halak pargeduk, manang hinamago tu halak siula hajahaton?

⁴Tung na so diida Debata ulaning angka dalanku, jala na so dibilangi ulaning sude langkalangkangku? [456†]

⁵Tung sura naung marpangansi pangalahongku, jala pathu manilu manahopi, sipaotooto.

⁶Ibana nian * mandasing ahu di bagasan timbangan na sintong, asa Debata mananda habontoronku. [457†]

⁷Tung sura naung * manimbil langkangku sian dalan hasintongan, jala dipaihut rohangku lomolomo ni matangku, jala lohot di tanganku haurahon: [458†]

⁸+ Ahu pe manabur, ingkon halak na asing manganhon, jala suansuananku, ingkon butbutonna do rap dohot uratna. [459†]

⁹Tung sura naung tarpaoto rohangku olo ahu elaelaon ni jolma ni halak sileban, jala mangonggop ahu di lambung pintu ni alealengku:

¹⁰Jadi ingkon jolmangku manduda di halak na asing, jala halak na asing mangalangkup nasida. [460†]

¹¹Binoto ma i haurahon do i antong, jala hajahaton na patut uhumon ni panguhum. [461†]

¹²Ai api do i na manggagat sahat ro di banua toru, jala saluhut na huomo mosokkononna tama. [462†]

¹³Tung sura naung hupametmet uhum tu naposongku baoa manang boruboru, jumpa marsalisi nasida dohot ahu: [463†]

¹⁴Tung aha ma bahenonku tung sura hehe Debata, tung sura marlulu Ibana, aha ma tagamon alushu tu Ibana?

¹⁵Nda laos Sitompa ahu di bagasan butuha ni dainang, manjadihon nang ibana? Nda laos Sasadasa do manjadihon hami duansa di bagasan bortian? [464†]

¹⁶Tung sura naung hujua pangidoan ni halak na pogos, jala lotop hubahen mata ni parompuan na mabalu. [465†]

¹⁷Jala sasada ahu manganhon rotingku, so dohot dakdanak na tading di lampin manganhon sian i.

¹⁸Ai olat ni haposoonku magodang ibana rap dohot ahu, * hira sisada ama, jala sian butuha ni dainang ahu mangiringiring na mabalu i. [466†]

¹⁹Tung sura naung huida halak mago marsangkot bulung, manang halak na pogos so marbulusan. [467†]

²⁰Tung sura so gontingna * mamasumasu ahu ala so pinalas dagingna sian imput ni birubirungku. [468†]

²¹Tung sura naung mangonai tanganku tu dakdanak na tading di lampin, ala mangasahon panolongion ahu di partungkoan. [469†]

²²Ingkon tanggal abarangku sian sasapna, jala tanganku sirang sian ringringna!

²³Ai matua ahu, sai huhabiari do torutoru ni Debata, jala ndang manahan ahu moradophon hatongamonna. [470†] II.

²⁴Tung sura sere hubahen haposan ni rohangku, jala hudok tu * sere palangki: Ho do arop ni rohangku! [471†]

²⁵Tung sura mangapian rohangku naeng marsinamot godang ahu, jala naeng jumpangan pangomoan godang tanganku. [472†]

²⁶Tung sura naung dung hutailihon mata ni ari jumpa marsinondang arian, manang bulan jumpa di rondangna situtu mardalan. [473†]

²⁷Manang tung dung tarpaoto rohangku di sibunian, tung olo ahu maniop * tanganku manombahon tusi: [474†]

²⁸Binoto ma i hajahaton na tama * uhumon ni Panguhum do nang i, ala mansoadahon + Debata na di ginjang i do ahu disi. [475†]

²⁹Tung sura naung martilla ahu mida hinamago ni musungku, manang marolopolop ahu molo marjea ibana. [476†]

³⁰Alai tahe gari langitlangit ni pamanganku, ndang dung huloas mardosa, mangidohon mate hosana marhite sian bura. [477†]

³¹Balik do jolma isi ni undungundungku mandok: Didia do adong jolma na so dung bosur mangan lompan binahenmi! [478†]

³²Halak dagang pe, ndang dung hupasombu marmalam di alaman, sai talak do pintu ni jabungku didapot halak pardalandalan. [479†]

³³Tung sura naung huhungkupi pangalaosionku, mangihuthon pangalaho ni jolma, manang hutabunihon hajahatonku, di bagasan andorangku. [480†]

³⁴Ala na mabiar ahu mida situan na torop i, jala tahuton ahu mida haleaon ni halak marompuompu, umbahen mauhom ahu, jala ndang ruar sian jabungku. [481†] III.

³⁵Aut adong ma nian sahalak na olo pangalualuanku! Na ida ma, tanda tanganhon; sai na alusan ni Nasunhinagogo i do ahu! Aut di ahu nian surat pangaluan na sinurat ni alongku! [482†]

³⁶Tongon tahe pampehononku do i tu abarangku, jala talitalihononku do i songon bulangbulang. [483†]

³⁷Papataronku ma tu Ibana bilangan ni langkalangkangku, jala marpangalaho raja ahu mandapothon Ibana.

³⁸Tung sura maungaung tanongku dompak ahu, manang rap tumatangis angka baruranna.

³⁹Tung sura naung hupangan gogo na so magargar, manang naung dung hupangan mudar ni anak gajian. [484†]

⁴⁰Denggan ma tubu di ahu sihupi singkat ni eme, jala unak singkat ni jagung! -- Marujung ma hata panariason ni si Job.