Read Batak Toba JOB 39 Bible Online

JOB 39 - Batak Toba bible

JOB 39

¹Tung diboto ho ma tingki ni hije maranak poso? Nunga tung dung dipamanat ho ursa tini laho mangae anakna? [631†]

²Nunga tung dietongi ho angka bulan hasasangana maranak poso, jala nunga tung diboto ho tingkina mangintubu?

³Uju marsinggang nasida laho mangintubu, laho mambolongkon pusokna na niaena i.

⁴Dung i lam margogo ma angka anakna jala magodang di ramba, ruar nasida laos so mulak be tu inana.

⁵Ise ulaning pajalang halode jalang i mardalan guru lomo ni rohana? Jala ise ulaning mangkarhari angka tali tambatan ni halode jalang i? [632†]

⁶Nunga pola Hulehon halongonan bahen jabuna, jala tano na niulang bahen ingananna.

⁷Pola diparengkeli angka hariburon na masa di bagasan huta, jala ndang dibege suara songgak ni jolma pandasdas.

⁸Sai diaotaoti do angka dolok mangalului gagatonna jala sai diihutihut do sandok tumbur ni duhutduhut.

⁹Tung tagamon olo badak i pajinahonmu mangoloi ho? Tung tagamon olo ma ibana marudam di lambung ni panggagatan binahenmi?

¹⁰Tung tagamon tarpampe ho ma tali tompi tu tangkuhuk ni badak asa ditait ninggala? Manang tung tagamon ma ihuthononna ho manisir di angka rura?

¹¹Tung tarbahen ho ma marhaposan tusi ala panimbukbuk ni gogona? Manang tung tarpasahat ho ma ulaonmu tusi?

¹²Tung pos ma roham disi boanonna muli gogo ni na niulam, manang papunguonna eme i tu bagasan sopom?

¹³Denggan do nian mamerper anggo habong ni pidong unto; alai nda tung taratup habongna habong ni sibarung.

¹⁴Hape dipirahon do pirana i tu tano, laos dipasombu do horsik na mohop i mamorpori.

¹⁵Laos lupa rohana atik tung mabola bahenon ni pat, jala mapisar degeon ni binatang di ladang.

¹⁶Sai pangaritingon do ibana dompak angka anakna, hira na so ibana nampunasa, ndang dihaborihon rohana atik tung beha mangago hangalutonna i.

¹⁷Ala naung diunsati Debata habisuhon sian ibana jala ndang marjambar dibahen di panimbangon.

¹⁸Alai anggo uju dipaspas habongna laho marlojong, diparengkeli do nang hoda ro di jolma parsihundulna.

¹⁹Tung ho ma huroha naung mangalehon gogo tu hoda? Tung ho ma mamangke tangkuhukna dohot jumbak na janggejanggeon?

²⁰Tung tarpaakkathon ho ma i songon sihapor? Pola tarsonggot jolma binahen ni parlongos ni pariheiheonna? [633†]

²¹Ia tambirikna sai mangkaishaisi tano i do sian las ni rohana di gogona, tole borhat ditahopi do musu na tang marsinjata.

²²Eles rohana anggo mida habiaran, jala ndang olo humordit, jala ndang olo lumindak bahenon ni podang.

²³Patuseok pe nangkat di atasna, sumillamsillam ia mundimundi dohot hujur.

²⁴Pangarimason jala pangaritingon do i mangkaishaisi tano i, jala ndang be hatogangan, molo dibege suara ni sangka.

²⁵Disi mangkuling sangka i, mariheihe ma i, diteshon ma langkana, sian na dao dope nunga dianggo uap ni parporangan, ro di suara porioho ni partogi dohot suraksurak ni parangan.

²⁶Beha do, binahen ni parentam ulaning habang pidong lali tu ginjang, jala meapeap habongna tungkan dangsina?

²⁷Beha do, binahen ni parentam ulaning habang pidong raja ualu dompak ginjang, jala dibahen asarna di inganan na timbo sahali? [634†]

²⁸Dolok batu do diingani, laos meat ibana di punsu ni dolok batu dohot di jaringjingna.

²⁹Sian i do diranapi sisoroonna, mansai dao ditatap matana.

³⁰Jala angka anakna mudar sambing do disopsop; jala ia * disi adong bangke disi do ibana. [635†]