Read Batak Toba JOB 4 Bible Online

JOB 4 - Batak Toba bible

JOB 4

¹I. [1] Dung i ro ma hata ni * si Elipas sian Teman mangalusi. [50†]

²Ra tung sogo roham, molo huunjuni hami mandok hata tu ho, alai tahe ise ma ibana tung taroromsa so dohononna hatana?

³Ida ma, mansai torop halak naung niajaranmu, jala * tangan ni angka na so marnangon naung pinargogoanmu. [51†]

⁴Halak na tinggang hehe do muse binahen ni hatam, jala pat angka na telluktelluk dipatogar ho.

⁵Hape anggo nuaeng, dung songgop hinamago tu ho, gabe manderse ho, jala dung mangonai tu ho, gabe gamang roham.

⁶Nda biarmu mida Debata haposan ni roham na sai laon? Nda habonaron di dalanmu pangkirimon ni roham na sai laon?

⁷Ua marningot ma ho! Andigan dung adong mago jolma na lidang marroha? Jala didia dung hea pesan jolma na tigor marroha?

⁸Ianggo naung huida, matua halak na maninggalahon hajahaton dohot manaburhon hamagoan, ingkon gotilonna do i. [52†]

⁹Matua mago nasida dibahen * pangombus ni Debata, jala siap nasida dibahen parngongos ni igungna. [53†]

¹⁰Parauangon ni singa dohot suara ni singa panoro dohot sait ni singa naposo dapot do diropangi. [54†]

¹¹Singa na matua pe mago do ala hurangan soroanna, jala anak ni singa boruboru dapot diparsisiga. [55†] II.

¹²Ro do tu ahu marsibuni hata ulpuhan, jala pistik tu pinggolhu lingona. [56†]

¹³Jumpa mamingkirmingkiri alatan bornginna i, uju renge modom angka jolma i. [57†]

¹⁴Mangonai tu ahu hasonggoton, pola angka dotdot ahu, jala sude holiholingku angka hitir. [58†]

¹⁵Ai mamolus sada Tondi sian jolongku, gabe manindang imbulu ni dagingku.

¹⁶Jongjong do ibana di jolongku, alai ndang hutanda anggo rupana, asal rumangna dapot matangku, husiphusip dohot sada suara hubege na mandok. [59†]

¹⁷Tung adong ma jolma na gale tarbahen tigor anggo moradophon Debata? Manang tung adong ma baoa tarbahen bontor anggo moradophon Sitompa ibana? [60†]

¹⁸Ida ma, gari mida angka parhaladona ndang pos rohana, jala di angka surusuruanna dapotsa dope tuduonna haliluon. [61†]

¹⁹Lam di nasida ma angka na manginganhon * bagas sian tano liat, angka na marojahan di orbuk, angka na pisar dapot dogilon + songon ngitngit. [62†]

²⁰Tupa olat ni * manogotna i sahat ro di botari nunga marragean nasida i; + ndang dope disura roha ni jolma nunga mago nasida saleleng ni lelengna. [63†]

²¹Nda tongon do tahe? Molo tos hosanasida di bagasan, mate ma nasida, so jolo sanga maruli habisuhon. [64†]