Read Batak Toba JOB 40 Bible Online

JOB 40 - Batak Toba bible

JOB 40

¹I [1] Angkup ni didok Jahowa ma tu si Job songon on:

²Antong beha ma pamadai ni jolma na manarita di Ibana Nasunhinagogo i? Jolma na naeng mangajari Debata, i ma nian mangalusi angka sungkunsungkunna i? [636†]

³Dung i ninna si Job ma mangalusi Jahowa:

⁴Ida ma, mametmethu do ahu, tung aha ma dohononku balosna tu Ho? * Huampehon na ma tagonan tanganku tu pamanganku. [637†]

⁵Nunga sahali tarsor hatangku, ndang be ulahanku, manang dua hali pe, na so tupa be datdatanku. [638†] II

⁶Dung i ro ma alus ni Jahowa tu si Job marhite sian habahaba ninna ma. [639†]

⁷Ua hohos i ma gontingmu songon baoa, adong do naeng sungkunhononku tu ho, asa ho nian mangajari Ahu! [640†]

⁸Tung naeng do segaanmu uhumhu? Tung naeng salahononmu Ahu, asa mamintori dirim ho? [641†]

⁹Manang tung dos ma gogo ni botohonmu songon * botohon ni Debata? Tung tarbahen ho ma + marsuara ronggur songon Ibana! [642†]

¹⁰Ua pajagar ma dirim marhite sian habalgaon dohot hatimbulon, jala bahen ma hatongamon dohot hamuliaon pangkeanmu! [643†]

¹¹Tingting i ma parpiarpiar ni rimasmu, jala ranapi ma saluhut halak na ginjang marroha, angka i ma jolo paserep. [644†]

¹²Tailihon ma saluhut halak na jungkat marroha, angka i ma jolo patunduk, jala dugudugu ma halak parjahat i di ingananna.

¹³Rap panguspangus ma nasida tu bagasan orbuk, tambathon ma bohinasida i tu bagasan haholomon.

¹⁴Jadi dohot ma Ahu mamuji ho, ala * tanganmu siamun sandiri manolongi ho. [645†] III

¹⁵Ua ida ma binatang hoda aek naung hujadihon rap dohot ho, duhutduhut do digagat suang songon lombu.

¹⁶Ua ida ma, di bagasan gontingna do hagogoonna, jala di bagasan angka urat ni butuhana do hapuragaonna.

¹⁷Dipaegolegol do ihurna songon hau Ares, jala masidandanan do angka urat ni haehaena.

¹⁸Holiholina do songon ponot tombaga, ia angka ruasna songon tiang bosi.

¹⁹Ibana do situan ni jadijadian ni Debata, Sitompasa huhut mangalehon tangkena.

²⁰Angka dolok gabe panjampalanna; laos disi do marmeammeam saluhut binatang di harangan.

²¹Lomo rohana marlinggomlinggom tu toru ni hau ampolu, jala modom tu arung dohot ansising.

²²Di linggom ni hau ampolu i ibana marlinggomlinggom, jala angka bulung ni ansising manghungkupi ibana.

²³Munsat pe batang aek i ndang pola humordit ibana, ndang pola tahuton ibana nang pe nasa balga ni Jordan masuk tu babana.

²⁴Tung tagamon ma dapot jolma jailonna dohot jorat songon i mangolu manang mangkarihiri igungna? IV

²⁵Tung dapot ho ma tagamon toguonmu buea marhite sian hail, manang mangampot dilana dohot tali? [646†]

²⁶Tung dapot ho ma tagamon harihiranmu igungna dohot hotang manang turaonmu hurumna dohot hail bosi?

²⁷Tung tagamon ma pagodangonna elehelekna tu ho, manang manomba huasi tu ho?

²⁸Tung tagamon ma olo ibana marpadanpadan dohot ho, mangido jaloonmu ibana bahen naposom salelenglelengna?

²⁹Tung tagamon dapot ho ma ibana parmeammeamonmu songon pidong? Manang tambatonmu bahen meammeam ni angka borum?

³⁰Tung tagamon olo ma angka pardengke marboniagahon ibana? Manang olo halak partigatiga marbagi disi? [647†]

³¹Tung dapot ho ma tagamon gohanmu sisikna dohot tampuning, manang uluna dohot turatura?

³²Tole ampehon ma tanganmu tu ibana, ndang tagamon sangkaponmu marporang dohot ibana paduahalihon.