Read Batak Toba JOB 7 Bible Online

JOB 7 - Batak Toba bible

JOB 7

¹I. [1] Nda ulaon porang do ulaon ni jolma saleleng di tano on? Jala nda songon ari ni anak gajian do ariarina? [90†]

²Songon hatoban tahe na mangido marlinggomlinggom, jala songon anak gajian na paimaimahon gajina:

³Suang songon i diturpukkon tu ahu angka bulan hinamago, jala dipadiri tu ahu angka borngin na marhangaluton.

⁴Molo laho modom ahu, ningku do: Andigan pe tarbahen ahu hehe? Alai borngin pe * mansai ngolngol do, jala loja ahu margilinggiling sahat ro di andostorang. [91†]

⁵Marsapu gulokgulok dohot orbuk do dagingku; tongkin maripos ngolu hulingkulingku, tongkinnari malala muse.

⁶Tumibu ariaringku laho salpu sian turak, jala magomago boti soada adong sihirimon. [92†] II.

⁷Sai ingot ma, alogo sambing do * ngolungku, jala ndang tagamon mulak matangku marnida hadoharon. [93†]

⁸Nang mata ni na maningkir ahu, ndang be idaonna ahu; molo dilului matam ahu, hape ndang be disi ahu.

⁹Habang boti do ombun laho salpu, suang songon i turun manisia tu parbeguan, ndang tarbahensa be nangkok sian i.

¹⁰Ndang tagamon * mulak be ibana tu jabuna hian, jala ndang be tandaon ni + sambulona ibana. [94†]

¹¹Ahu pe antong ndang olo ahu mangontok pamanganku, alualuhononku ma hagogotan ni tondingku, jala andungkononku ma hinaponjot ni rohangku.

¹²Apala laut ahu manang ihan lumbalumba, umbahen pajongjongonmu parhal jumaga ahu?

¹³Molo didok rohangku: Paratengku ma mangapuli ahu, podomanku mamuati orongorongku.

¹⁴Jadi disonggoti Ho ahu marhitehite nipi, pola angka hitir ahu dibahen Ho marhitehite alatan.

¹⁵Jadi patahitahi paningkoton do rohangku jala holiholingku mangido hamatean.

¹⁶Nunga * biasan ahu, ndang ahu naeng mangolu salelenglelengna; palua ma ahu, ai + alogo sambing do ariaringku. [95†]

¹⁷Tung aha ma nian jolma i umbahen pola patimbulonmu ibana, jala pola tiroan ni roham ibana? [96†]

¹⁸Sai diebati Ho ibana ganup sogot, jala ganup tongkin diunjuni Ho ibana? [97†]

¹⁹Sadia leleng on so padaoonmu * pamerengmu sian ahu? So paluaonmu asa sanga ahu nian mamondut ijurhu? [98†]

²⁰Molo naung mardosa ahu, tung aha ma * tarbahen ahu dompak Ho, ale ** Sijaga jolma manisia? Boasa tung ahu bahenonmu + panonjolanmu, gabe ahu sandiri padokdok sitaononku? [99†]

²¹Boasa so marpamuati roham mida pangalaosingku, jala boasa so dibolus roham hajahatonku? Ai laho modom ma ahu nuaeng tu bagasan orbuk, molo dilului Ho ahu manogot, ndang be disi ahu dapotonmu!