Read Batak Toba JOB 9 Bible Online

JOB 9 - Batak Toba bible

JOB 9

¹I. [1] Dung i ninna si Job ma mangalusi:

²Tangkas do huboto sintong do songon i; tung tarbahen ma tigor jolma na gale anggo moradophon Debata? [115†]

³Tung sura olo Ibana manjujur dompak jolma i, ndang haalusansa nanggo sada sian saribu. [116†]

⁴Parroha na sun pistar Ibana jala Nasunhinagogo, tung ise ma manangkangi rohana maralohon Ibana laos marsonangsonang?

⁵Ibana * paunsathon angka dolok so pangkirimanna, Ibana pabalikkon angka i di bagasan rimasna. [117†]

⁶Ibana mangkutol tano on sian ingananna, pola reberebe angka tiang partunggulna. [118†]

⁷Ibana mandok tu mata ni ari, gabe ndang olo binsar, jala Ibana mansahapi angka bintang humaliang. [119†]

⁸Sasada Ibana * paherbang angka langit, jala Ibana mardalan di atas galumbang ni laut. [120†]

⁹Ibana manjadihon * bintang poriama, bintang sidongdong dohot hala ro di bintang angka na di langit pardangsina. [121†]

¹⁰Ibana mambahen habalgaon angka na so dapot sulingkiton, dohot halongangan, angka na so dapot bilangan. [122†]

¹¹Ida ma, Ibana mardalan di lambungku, hape ndang huida, Ibana mamolus sian jolongku, hape ndang pamotoanku.

¹²Ida ma, Ibana tarsulandit, tung ise ma na tuk manogang Ibana? Tung ise ma na hum mandok tu Ibana: Aha do na binahenmi? [123†]

¹³Ndang olo Debata pasuruthon rimasna; nunga pola tunduk dibahen angka na hinara ni * Rahab. [124†]

¹⁴Lam ahu ma, tung haalusan ahu ma Ibana, hapillitan ahu ma hata angka na taralushon ahu tu Ibana?

¹⁵Nang tung sura parpintor ahu, ndang haalusan ahu Ibana, ingkon mangido asi ni roha ahu sian Siuhum ahu.

¹⁶Molo joujou ahu, jala Ibana mangalusi ahu, laos so pahatopoton ni rohangku dope, tung Ibana manangihon suarangku.

¹⁷Ibana mangaropuhi ahu marhitehite habahaba, jala dipatorop bugangku, soada alana.

¹⁸Ndang diloas Ibana ahu humosa, lam dipagodang do angka soro ni aringku.

¹⁹Tung sura naeng mangasahon gogo iba, gumogo do Ibana; tung sura mangasahon uhum iba, tung ise ma mangaluhon Ibana? [125†]

²⁰Nang tung sura hapintoran ahu diringku, pamanganku sandiri manorui ahu; nang tung sura bontor rohangku, pargeduk do ahu anggo tuduonna. [126†]

²¹Bontor do ahu tutu, ndang huholsohon hosangku, nunga biasan rohangku di hangoluan on.

²²Sada do pangarimpunanna, ala ni do umbahen hudok: Rap diago Debata do jolma na daulat dohot na jahat marroha. [127†]

²³Molo tompu Ibana mambunu marhite sian begu antuk, mengkel do Ibana mida pandelean ni jolma na so marpipot.

²⁴Nunga dipasahat Ibana luat i tu tangan ni halak parjahat, nunga dipapitung Ibana bohi ni panguhum ni luat i; * tung ise ma mambahensa, molo so Ibana? [128†] II.

²⁵Dumoras do ariaringku laho salpu sian halak na doras marlojong, luhutna i nunga habang so sanga marnida hadoharon. [129†]

²⁶Luhutna i nunga salpu songon * solu hotang dorasna, songon + lali piuan laho manoro sisoroon. [130†]

²⁷Molo didok rohangku: Naeng ahu mangkalupahon pardangolanku, naeng manadingkon surbot ni bohingku, jala naeng pasiharonku:

²⁸Jadi bajogiton muse rohangku mida sude pardangolanku, ala huboto hian * ndang tagamon lias ahu dohononmu. [131†]

²⁹Antong, ingkon parjahat na ma ahu, aha gunana sai datdatanku marporsukporsuk?

³⁰Tung sura pe huparidi aek ni ambolas jala hupaias tanganku dohot aek ni sabun. [132†]

³¹Sai na gunomhononmu do ahu tu bagasan lupaklupak, gabe magigi pangkeanhu mida ahu.

³²Ai ndada baoa Ibana songon ahu on, umbahen so haalusan ahu Ibana, tung sura rap tarboan tu paruhuman. [133†]

³³Angkup ni ndang adong panolai di tongatonga ni hami na dua, na mambahen tanganna tu hami padua.

³⁴Sai dipaholang ma nian sian ahu batahina, jala unang hinasongkalna manonggoti ahu. [134†]

³⁵Asa hudok nian hatangku jala unang mabiar ahu mida Ibana, ai ndang parsala ahu huhilala.