Read Batak Toba PSALMEN 104 Bible Online

PSALMEN 104 - Batak Toba bible

PSALMEN 104

¹I. [1] Puji ma Jahowa, ale tondingku! Na bolon situtu do Ho, ale Jahowa Debatangku, * marpangkean hasangapon dohot hamuliaon do Ho. [1303†]

²* Hatiuron dialithon Ibana hira ulos, Ibana pahembangkon angka langit songon + rimberimbe. [1304†]

³Ibana manggulanggulangi di angka aek bilutna parginjang; huretana do dibahen angka ombun i, mardalandalan do Ibana di atas habong ni alogo. [1305†]

⁴Ibana mambahen angka alogo surusuruanna, api na marjimburjimbur bahen parhaladona. [1306†]

⁵Nunga dipaojak Ibana tano on tu angka ojahanna i, asa unang lalolalo salelenglelengna. [1307†]

⁶Lintong majoajo do pangkuphupina dibahen hira ulos, disalpui aek i do angka dolok.

⁷Maporus do angka i dibahen pangasupim, humalaput do nasida maporus maradophon soara ni ronggurmu. [1308†]

⁸Hinsat ma angka dolok, marongrong ma angka rura tu inganan, na pinaojakmu hian di nasida.

⁹Nunga dibahen Ho hian sada parbolatan, na so tupa salpuanna, ndang jadi ulahanna manghungkupi tano on. [1309†]

¹⁰Ibana manongos angka mual di angka rura, sian holangkolang ni angka dolok do angka i mabaor. [1310†]

¹¹Dipasobur nasida saluhut binatang harangan, gabe sombu ma uas ni angka halode harangan.

¹²Marasari di lambungnasida i pidong angka na martongatonga langit, angka na pahar soarana sian holangkolang ni angka dangka.

¹³Ibana pasobur angka dolok sian angka bilutna parginjang i, sian parbue ni angka jadijadianmu do butong tano on. [1311†]

¹⁴Ibana patubuhon duhutduhut di pinahan dohot ingkau rata bahen parulian ni jolma, laho paruarhon roti sian tano on. [1312†]

¹⁵Ro di * anggur, na palas roha ni jolma na gale i, asa marmiak bohina lobi sian na hona miak, dohot roti na tumungkol roha ni jolma na gale i. [1313†]

¹⁶Butongan ma angka hau ni Jahowa, angka hau Ares ni Libanon, angka na sinuanna i.

¹⁷Disi ma marasari angka pidong; siboru tasik i na marjabuhon hau tusam.

¹⁸Angka bedu do nampuna dolok angka na timbo i, haporusan ni angka antuasu do angka dolok batu.

¹⁹Ibana mambahen bulan panjujuran tingki, diboto mata ni ari do hasundutanna. [1314†]

²⁰Ho do mambahen haholomon, jadi tubu ma borngin, disi ma gumamang saluhut binatang harangan;

²¹Singa na bajar, angka na patungaor mangido sisoroonna jala mangalului sian Debata sipanganonnasida. [1315†]

²²Binsar mata ni ari, manginsurut ma nasida, laho manggompang tubagasan liangnasida. [1316†]

²³Ruar ma jolma i tumopot ulaonna, na pinuhutanna rasirasa bot ari. II.

²⁴Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran, tung gok jadijadianmu do tano on.

²⁵Tole laut i na balga jala na lambas, disi do rumamang angka gulokgulok na so habilangan, binatang angka na metmet rap dohot angka na balga.

²⁶Disi do mardalani angka parau, tole buea, na jinadihonmu, asa marmeammeam disi.

²⁷Saluhut nasida mangaranap tu Ho, asa lehononmu sipanganonnasida di tingkina be. [1317†]

²⁸Molo dilehon Ho di nasida, dijomputi nasida, molo dipatedek Ho tanganmu, butongan nasida di na denggan i.

²⁹Molo ditabunihon Ho bohim, holsoan ma nasida, ditait Ho ma hosanasida, monding ma nasida, jala mulak nasida tu orbuknasida hian. [1318†]

³⁰Molo ditongos Ho tondim, tartompa ma nasida, jala dipaimbaru Ho do rupa ni tano on. [1319†]

³¹Sai ro di salelenglelengna ma hamuliaon ni Jahowa * marlas ni roha ma Jahowa mida angka jadijadianna i! [1320†]

³²Molo Ibana mamereng tano on, jadi humuntal ma, dijama angka dolok, jadi martimus ma. [1321†]

³³Endehononku ma Jahowa saleleng di ngolungku, umpalu parhinaloan ma ahu umpuji Debatangku, saleleng adong dope ahu. [1322†]

³⁴Sai dihalomohon rohana ma nian pingkiranku, ianggo ahu, sai marlas ni roha do ahu mida Jahowa. [1323†]

³⁵Sai siap ma nian angka pardosa sian tano on, jala unang adong be angka parjahat! Puji ma Jahowa, ale tondingku! Halleluya! [1324†]