Read Batak Toba PSALMEN 106 Bible Online

PSALMEN 106 - Batak Toba bible

PSALMEN 106

¹I. [1] Halleluya! Mandok mauliate ma hamu di Jahowa, ai na basa do Ibana, ai ro di salelenglelengna do asi ni rohana i. [1355†]

²Tung ise ma tuk mangkatahon angka hagogoon ni Jahowa, patubegehon baritana i sudena?

³Martua ma angka na mangaradoti uhum, na tongtong patupahon hatigoran.

⁴Sai ingot ma ahu, ale Jahowa, hombar tu halolomo di bangsom, sai tingkir ma ahu marhitehite hatuaonmi!

⁵Asa hupaidaida hadoharon ni angka na pinillitmu, asa huhalashon halalas ni roha ni bangsomi, mamujimuji rap dohot partohapanmi. II.

⁶Nunga mardosa hami rap dohot ompunami, nunga mangulahon hageduhon hami, nunga manjahati hami. [1356†]

⁷Ndang diparateatehon angka ompunami di Misir halongangan angka na binahenmi, ndang diingot nasida hinagodang ni asi ni roham, jala mangalo do nasida di lambung laut pararungan i. [1357†]

⁸Hape Ibana paluahon nasida ala ni goarna i, laho pabotohon hagogoonna i.

⁹Jadi mangonai hata do Ibana tu laut pararungan i, gabe marsik ma, dung i Ibana manogihon nasida umbolus angka lung songon adaran. [1358†]

¹⁰Jadi Ibana paluahon nasida sian tangan ni parsomor, jala ditobus nasida sian tangan ni musu.

¹¹Dung i dilungkupi aek alonasida i, nanggo sada sian nasida ndang teba.

¹²Jadi dihaporseai nasida ma angka hatana, diendehon ma baritana i. [1359†] III.

¹³Hape tibu do dihalupahon nasida angka pambahenanna i, ndang dipaima nasida sangkapna i.

¹⁴Lam mangoloi hisaphisap do nasida di halongonan, jala diunjuni Debata di tano tangkaltangkal. [1360†]

¹⁵Jadi dilehon Ibana tu nasida pinangidonasida i, gabe ditongos ma begu tiarap ala ni hisaphisapnasida i.

¹⁶Dung i mangiburu ma nasida dompak si Musa di parsaroan, dompak si Aron, na badia ni Jahowa. [1361†]

¹⁷Dipangangang tano i ma babana asa mamondut si Datan, jala dilungkupi luhutan ni si Abiram.

¹⁸Jala didilati api luhutannasida i, nala ni api mansudahon angka parjahat i.

¹⁹Dipauli nasida ma sada lombu di Horeb, jala marsomba nasida tu gombaran na tinuang i. [1362†]

²⁰Jadi disambarhon nasida ma hamuliaonnasida tu sumansuman ni lombu, sigagat duhut. [1363†]

²¹Nunga * dihalupahon nasida Debata, Sipaluanasida i, na patupahon angka pambahenan na balga di Misir. [1364†]

²²Angka halongangan di tano ni si Ham, angka sipasonggot di lambung laut pararungan.

²³Nunga pola didok Ibana, siaphononna nasida, aut unang si Musa, na pinillitna i * jongjong di partostosan di jolona i, paombunhon murukna i, asa unang disiaphon. [1365†]

²⁴Dung i dihapishon rohanasida tano na hinapianan ni roha, ndang dihaporseai nasida hatana i. [1366†]

²⁵Marmungutmungut ma nasida di bagasan undungundungnasida i, ndang ditangihon nasida soara ni Jahowa.

²⁶Jadi ditenggalhon Ibana ma tanganna dompak nasida, naeng mangaragehon nasida di halongonan.

²⁷Mandanggurhon dohot pinomparnasida tu tongatonga ni angka parbegu, jala paserakkon nasida tu angka luat. [1367†]

²⁸Dung i diharosuhon nasida ma Baal-Peor huhut manganhon angka pelean ni na mate ajiajiannasida. [1368†]

²⁹Sai maminggili do nasida di pambahenannasida i, jadi rarat ma begu masa mangaragehon nasida.

³⁰Dung i hehe ma si Pinehas mangaluluhon, gabe motap ma begu masa i. [1369†]

³¹Jadi dietong ma i tu ibana gabe hatigoran marsundutsundut sahat ro di salelenglelengna. [1370†]

³²Dung i manggitihi muse nasida di lambung aek Meriba parbadaan, gabe tarjea ma si Musa dibahen nasida. [1371†]

³³Ai ditaji nasida tondina i, gabe tarsor ma bibirna mandok soara. IV.

³⁴Ndang disiaphon nasida angka bangso, * naung nidokkon ni Jahowa tu nasida. [1372†]

³⁵Lam disaorsaor nasida do angka parbegu, jala diguruhon angka pambahenannasida.

³⁶Jala dipapelepele angka ajiajiannasidai, jadi jorgong ma i tu nasida. [1373†]

³⁷Huhut do dipampelehon nasida angka anak dohot borunasida tu begu. [1374†]

³⁸Jala dipandurushon nasida mudar na so marpipot, mudar ni angka anak dohot borunasida, angka na pinelehonna tu angka ajiajian ni tano Kanaan, gabe ramun ma tano i dibahen sapata ni mudar.

³⁹Jadi ormus ma nasida di pambahenannasida i, jala mangincui nasida di parulaon nasida i.

⁴⁰Jadi marpiarpiar ma muruk ni Jahowa dompak bangso i, jala dihabiashon partohapanna i.

⁴¹Dung i dipasahat ma nasida tubagasan tangan ni angka parbegu, gabe digomgom halak na mangkasomorhon nasida ma nasida. [1375†]

⁴²Jadi dirupa musunasida i ma nasida, gabe tarsugutsugut nasida tu toru ni tanganna.

⁴³Mansai jotjot do nian Ibana paluahon nasida, hape anggo nasida sai mangalo do mangihutihut sangkapnasida i, jadi pesan ma nasida binahen ni hajahatonnasida i. V.

⁴⁴Alai manatap ma anggo Ibana di hagogotannasida i, uju na tinangihonna i angguhangguknasida.

⁴⁵Jadi diingot Ibana muse padanna i tu nasida, meol ma rohana hombar tu hinagodang ni asi ni rohana.

⁴⁶Jadi dapotan asi ni roha ma nasida dibahen maradophon sude angka na mambuangkon nasida.

⁴⁷Tumpahi ma hami, ale Jahowa, Debatanami, jala papungu hami sian angka parbegu, asa hupuji hami goarmu na badia i jala martanggulhon baritami. [1376†]

⁴⁸Pinuji ma Jahowa, Debata ni Israel sian na saingan sahat ro di salelenglelengna jala rim bangso i mandok: Amin! Halleluya! [1377†]