Read Batak Toba PSALMEN 107 Bible Online

PSALMEN 107 - Batak Toba bible

PSALMEN 107

¹I. [1] * Mandok mauliate ma hamu di Jahowa, ai pardengganbasa do Ibana, ai salelenglelengna do asi ni rohana i. [1378†]

²I ma dohonon ni angka na pinalua ni Jahowa, angka na pinaluana sian tangan ni musu.

³Jala angka na pinapunguna i sian angka luat, sian habinsaran dohot sian hasundutan, sian utara dohot sian laut i.

⁴Lilu do angka nasida di halongonan di dalan na lungun, ndang jumpang nasida huta soranganna.

⁵Male huhut mauas nasida, pola tarhatos rohanasida di bagasan.

⁶Jadi joujou ma nasida tu Jahowa di hagogotannasida i, gabe dipalua Ibana nasida sian hagogotannasida i. [1379†]

⁷Dung i ditogihon ma nasida di dalan na tigor i, asa tolhas nasida tu huta siinganan. II.

⁸Ingkon pujionnasida ma Jahowa ala ni asi ni rohana dohot halongangan angka na binahenna i tu jolma manisia. [1380†]

⁹Ala naung pinasabamna roha na malungun i, jala * dipasuksuk na denggan i tu roha na male i. [1381†]

¹⁰Angka na hundul di haholomon dohot di linggom ni hamatean, angka na nirante ni pardangolan dohot bosi.

¹¹Ala na nialonasida i angka hata ni Debata, jala dielesi sangkap ni Natumimbul i.

¹²Jadi dipajimput Ibana ma rohanasida marhitehite hangaluton, angka martungkapan ma nasida, jala ndang adong sipangurupi.

¹³Dung i joujou ma nasida tu Jahowa di hagogotannasida, jadi dipalua ma nasida sian hasosahannasida i. [1382†]

¹⁴Ibana do paruarhon nasida sian haholomon dohot sian linggom ni hamatean, jala dirapui angka rantenasida i. III.

¹⁵Ingkon pujionnasida ma Jahowa ala asi ni rohana dohot halongangan angka na binahenna i tu jolma manisia. [1383†]

¹⁶Ala naung binolana i angka pintu haksa, jala dirosahi angka sordaksordak bosi. [1384†]

¹⁷Marsipal dihilala angka na oto ala ni dalan pangalaosionnasida i dohot dibahen angka hajahatonnasida.

¹⁸Luhut do sipanganon dihaginehon rohanasida, jala nunga pola dolos nasida sahat tu angka harbangan ni hamatean.

¹⁹Dung i joujou ma nasida tu Jahowa di hagogotannasida i, jadi dipalua Ibana nasida sian angka hasosahannasida. [1385†]

²⁰Ditongos ma hatana i jala dipamalum nasida, jala dipalua nasida sian hamagoannasida i. IV.

²¹Ingkon pujionnasida ma Jahowa ala asi ni rohana dohot halongangan angka na binahenna i tu jolma manisia. [1386†]

²²Jala dipelehon nasida ma angka pelean hamauliateon jala dipajojor angka pambahenanna i mardongan olopolop. [1387†]

²³Angka na tuat marparau tu laut, angka na marboniaga tu angka laut bolon.

²⁴Diida nasida ma angka jadijadian ni Jahowa dohot halongangan angka na binahenna di bagasan lung.

²⁵Dung i mangkuling ma Ibana, jadi hehe ma habahaba, gabe lam timbo ma angka galumbangna i. [1388†]

²⁶Tongkin manaek nasida tu langit, tongkin tuat nasida tu angka lung, malala ma rohanasida dibahen hinamago.

²⁷Moror do angka nasida jala lalolalo songon parmabuk, jala tarbondut do sude habisukonnasida.

²⁸Dung i joujou ma nasida tu Jahowa di hagogotannasida i, jadi diparuar Ibana nasida sian hasosahannasida i. [1389†]

²⁹Dipasohot ma habahaba i gabe mardemak, so ma dohot angka galumbangnasidai. [1390†]

³⁰Jadi marlas ni roha ma nasida ala naung so angka i, dung i ditogihon Ibana ma nasida tu muara lomo ni rohanasida. V.

³¹Ingkon pujionnasida ma Jahowa ala asi ni rohana, dohot halongangan angka na binahenna i tu jolma manisia. [1391†]

³²Jala patimbulonnasida Ibana di bagasan luhutan ni bangso i, jala pujionnasida Ibana di luhutan ni angka sintua.

³³Ibana mangarsik angka batang aek gabe halongonan dohot angka mual gabe tano bangkalbangkal.

³⁴Tano bosar hian gabe garaga ala hajahaton ni angka pangisina i. [1392†]

³⁵Ibana muse mambahen halongonan hian gabe tao jala tano bangkalbangkal hian gabe angka mual. [1393†]

³⁶Dung i tusi ma dipaian angka na male, gabe dipaojak nasida ma sada huta inganan.

³⁷Jadi disaburi nasida ma angka ladang i, jala dipungka angka porlak anggur, jala gabe do na niulanasida i.

³⁸Dung i dipasupasu Ibana ma nasida, gabe sopar situtu nasida, pinahannasida i pe dipasinur do.

³⁹Dung i lam otik ma ianggo nasida, jala tarjimput dibahen pangarupaon, hinamago dohot pardangolan.

⁴⁰Ibana mangusehon haleaon tu angka induk, jala dililuhon nasida di halongonan soada dalan. [1394†]

⁴¹Jala Ibana patimbul na pogos sian pardangolan jala dibahen angka marga songon birubiru toropna.

⁴²* Diida angka partigor i ma i, jadi marlas ni roha ma nasida gabe manguntam ma pamangan ni nasa hajahaton. [1395†]

⁴³Manang ise na pantas roha ditimbangi ma angka i, jala diparateatehon nasida ma angka asiasi ni Jahowa. [1396†]