Read Batak Toba PSALMEN 108 Bible Online

PSALMEN 108 - Batak Toba bible

PSALMEN 108

¹Ende sian si Daud. I.

²Nalom do rohangku, ale Debata, marende ma ahu jala umpalu arbap, i ma tutu, ale hamuliaonku. [1397†]

³Ngot ma ho, ale arbap dohot sordam, asa husunggul buha siang ari.

⁴Pujionku ma Ho di tongatonga ni angka bangso, ale Jahowa, jala endehononku ma Ho di tongatonga ni angka marga.

⁵Ai manalpui angka langit do godang ni asi ni roham, jala tolhas ro di aoangaoang parginjang do hasintonganmu.

⁶Sai patimbul ma dirim tu atas ni angka langit, ale Debata, jala hamuliaonmi tu sandok tano on.

⁷Asa malua angka na niasianmi, sai manumpak ma siamunmi jala alusi ahu! II.

⁸Nunga marbagabaga Debata di bagasan habadiaonna i: Ingkon marolopolop ahu marsagihon Sikem dohot manali rura Sukot.

⁹Ahu do nampuna Gilead, jala ahu nampuna Manasse, jala Epraim do partanobatoan ni ulungku, Juda do tungkot ni harajaonku.

¹⁰Moab do mangkuk parburianku, tu Edom hureongkon sipatungku, marolopolop ma ahu mida Palistim.

¹¹Ise ulaning manogihon ahu tu huta na gonting? Ise ulaning pataruhon ahu tolhas ro di Edom?

¹²Nda Ho do, ale Debata, Ho naung mambolongkon hami, jala na so ruar, ale Debata, mandongani parangannami?

¹³Sai patupa ma haluaon di hami sian hagogotan, ai ndang marnosan ianggo haluaon binahen ni jolma.

¹⁴Mangasahon Debata sai hamonangan do ulahononta, jala Ibana sandiri mangalotlot alontai.