Read Batak Toba PSALMEN 115 Bible Online

PSALMEN 115 - Batak Toba bible

PSALMEN 115

¹I. [1] Ndada di hami, ale Jahowa, ndada di hami, di goarmu ma tagonan lehon hamuliaon, ala ni asi ni roham, ala ni hasintonganmu. [1452†]

²Boasa ma tung dohonon ni angka parbegu: Didia ulaning Debatanasida i? [1453†]

³Hape di banua ginjang do Debatanta i, saguru lomo ni rohana dipatupa. [1454†]

⁴Alai anggo ajiajiannasidai perak do jala sere bahenbahenan ni tangan ni jolma. [1455†]

⁵Adong do pamangannasida, hape ndang mangkuling; adong do matanasida, hape ndang marnida.

⁶Adong do pinggolnasida, hape ndang marbinege; adong do igungnasida, hape ndang marnianggo.

⁷Adong do tangannasida, hape ndang tarjamahonsa, jala ndang tarlangkahonsa ia patnasida i; ndang mangkuling ianggo aruarunasida.

⁸Sobokkon nasida sogot angka na mambahennasida, sude angka na marhaposan tusi. [1456†] II.

⁹Ianggo ho, ale * Israel, marhaposan tu Jahowa ma ho! Ibana do pangurupi dohot lombulombunasida. [1457†]

¹⁰Ale pinompar ni * si Aron, marhaposan tu Jahowa ma hamu! Ibana do pangurupi dohot lombulombunasida. [1458†]

¹¹Hamu ale angka na * mangkabiari Jahowa, marhaposan tu Jahowa ma hamu! Ibana do pangurupi dohot lombulombunasida. [1459†]

¹²Nunga diingot Jahowa hita: Ibana mamasumasu, Ibana mamasumasu pinompar ni Israel, Ibana mamasumasu pinompar ni si Aron.

¹³Ibana mamasumasu angka na mangkabiari Jahowa, angka na metmet dohot angka na magodang.

¹⁴Sai ambaambaan ni Jahowa do tu hamu, tu hamu dohot tu pinomparmuna.

¹⁵Angka na pinasupasu do hamu sian Jahowa, Sitompa angka langit dohot tano on. [1460†]

¹⁶Jahowa do nampuna angka langit ni langitan, alai anggo tano on nunga dilehon tu jolma manisia.

¹⁷Ndang tagamon pujion ni angka naung mate Jahowa, nang sude angka naung tuat tu tano hasonangan. [1461†]

¹⁸Alai anggo hita, sai pujionta do Jahowa olat ni on ro di salelenglelengna. Halleluya!