Read Batak Toba PSALMEN 118 Bible Online

PSALMEN 118 - Batak Toba bible

PSALMEN 118

¹I. [1] Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohana! [1473†]

²Dohonon ni Israel ma tongon: Ai ro di salelenglelengna do asi ni rohana! [1474†]

³Dohonon ni pinompar ni si Aron ma: Ai ro di salelenglelengna do asi ni rohana.

⁴Dohonon ni angka na mangkabiari Jahowa ma: Ai ro di salelenglelengna do asi ni rohana i.

⁵Sian hagogotan do hupajoujou Jahowa, gabe dialusi Jahowa ahu, di na pinalumbangna i ahu.

⁶Jahowa do donganku, ndang mabiar ahu, tung aha ma tagamon bahenon ni jolma tu ahu? [1475†]

⁷Jahowa do donganku di tongatonga ni angka na mangurupi ahu, jadi sombu ma roha ni matangku marnida angka na mangkosom ahu. [1476†]

⁸Dengganan marhaporusan tu Jahowa, asa marhaposan tu jolma.

⁹Dengganan marhaporusan tu Jahowa, asa marhaposan tu angka raja. [1477†]

¹⁰Nunga pola luhut angka parbegu mangkaliangi ahu, mangasahon goar ni Jahowa tung rasiphononku do nasida.

¹¹Nunga pola dihaliangi nasida ahu tuk humaliang, mangasahon goar ni Jahowa tung rasiphononku do nasida.

¹²Nunga pola dihaliangi nasida ahu, songon * angka loba, mintop do nasida songon api di buluduri, marhitehite goar ni Jahowa tung rasiphononku do nasida. [1478†]

¹³Nunga pola digogo ho manulakkon ahu, asa tinggang nian, hape Jahowa mangurupi ahu. II.

¹⁴Jahowa do pargogongku dohot endengku, jadi gabe hatuaonku ibana. [1479†]

¹⁵Soara ni olopolop dohot hatuaon marsaringar di undungundung ni angka partigor: Siamun ni Jahowa do sibahen hamonangan. [1480†]

¹⁶Timbul situtu do siamun ni Jahowa, siamun ni Jahowa do sibahen hamonangan.

¹⁷Ndang tagamon mate ahu, sai na mangolu do ahu, asa hupajojor angka pambahen ni Jahowa.

¹⁸Nunga gogo tutu dipinsang Jahowa ahu, alai nda tung tu hamatean ahu dipasahat. [1481†]

¹⁹Ungkap hamu ma di ahu angka bahal ni hatigoran, asa hubongoti angka i laho mamuji Jahowa. [1482†]

²⁰On do bahal ni Jahowa, bongotan ni angka partigor do i sogot.

²¹Mandok mauliate ma ahu di Ho, ala naung dialusi Ho ahu, jala manjadi hatuaonku. [1483†]

²²Batu naung binolongkon ni angka pande bagas, i ma jadi batu parsuhi. [1484†]

²³Sian Jahowa do i masa, halongangan do i anggo di matanta.

²⁴Ari on do na jinadihon ni Jahowa, * marolopolop jala marlas ni roha ma hita disi. [1485†]

²⁵Iale Jahowa, sai manumpak ma Ho! Iale Jahowa sai Ho ma mambahen manjadi!

²⁶Pinasupasu ma na ro marhitehite goar ni Jahowa, hupasupasu hami ma hamu, angka na sian bagas ni Jahowa. [1486†]

²⁷Jahowa do Debata, jala Ibana manondangi hita. Tambathon hamu ma angka pelean pesta i sahat ro di angka tanduk ni langgatan.

²⁸Ho do Debatangku, jadi Ho do pujionku; ale Debatangku, sai Ho do patimbulonku. [1487†]

²⁹Mandok mauliate ma hamu di Jahowa, ai pardengganbasa do Ibana, ai ro di salelenglelengna do asi ni rohana i.