Read Batak Toba PSALMEN 119 Bible Online

PSALMEN 119 - Batak Toba bible

PSALMEN 119

¹I. [1] Martua ma halak angka na daulat marpangalaho, angka na marpangalahohon patik ni Jahowa. [1488†]

²Martua ma halak angka na mangaradoti angka panindangionna i, * angka na mangalului Ibana sian nasa roha. [1489†]

³Huhut angka na so mangulahon hageduhon, angka na mangkampungi angka dalanna i.

⁴Nunga ditonahon Ho angka parentam, siradotan situtu.

⁵Aut ni sai marsihohot angka dalanku mangaradoti angka aturanmu!

⁶Dung i ndang tagamon tarurak ahu, molo sai huparateatehon sude angka tonami.

⁷Sai mandok mauliate ma ahu di Ho sian hatigoran ni roha, molo huguruhon angka uhum ni hatigoranmi.

⁸Sai radotanku do angka aturanmi, unang tung tadingkon ahu situtu. II.

⁹Marhitehite aha tarpabontor dolidoli langkana? Molo dipahombarhombar tu hatam.

¹⁰Sai hulului do Ho sian nasa rohangku unang tung loas ahu lilu sian angka tonami. [1490†]

¹¹Nunga hupajop hatami di bagasan rohangku, asa unang mardosa ahu tu Ho. [1491†]

¹²Pinuji ma Ho, ale Jahowa, sai * podahon ma tu ahu angka aturanmi. [1492†]

¹³Nunga dipajojor angka bibirhon sude uhum, angka na ruar sian pamanganmi.

¹⁴Hinsaan do rohangku mida dalan ni angka panindangionmu, asa mida nasa hamoraon.

¹⁵Sai papingkirpingkironku do angka parentam, jala sai berengonku do angka bogasmi.

¹⁶Sai * huhahilashon do angka aturanmi, ndang tagamon + halupahononku hatami. [1493†] III.

¹⁷Mardenggan basa ma Ho tu naposom, pangolu ma ahu! Asa huradoti hatam.

¹⁸Sai pabuha ma matangku, asa huida halongangan, angka sian patikmi.

¹⁹* Paisolat do ahu di tano on, unang tung tabunihon angka tonami sian ahu. [1494†]

²⁰Malampot do rohangku mangkalungunhon angka uhummu manipat ari.

²¹Mangonai hata do Ho * mamulasi angka na jungkat roha, angka na manimbil sian tonami. [1495†]

²²Gilingi ma sian ahu haurahon dohot haleaon, ai nunga huradoti angka panindangionmi.

²³Hundul pe angka raja manuptupi mangalo ahu, sai angka aturanmi do dipingkirpingkiri naposom.

²⁴Tongon angka panindangionmi do hasoloan ni rohangku, angka i do jolma panuturingku. [1496†] IV.

²⁵Lohot di rere do rohangku, sai pangolu ma ahu hombar tu hatam! [1497†]

²⁶Hupajojor do angka dalanku, jadi dialusi Ho ahu, sai podahon ma tu ahu angka aturanmi.

²⁷Sai parroha i ahu mangantusi dalan ni angka parentam, asa hupingkirpingkiri halongangan angka na binahenmi.

²⁸Malampot do rohangku dibahen holsoholso, sai pahehe ma ahu hombar tu hatam.

²⁹Sai paholang ma sian ahu dalan ni pangansion, jala asinirohahon tu ahu patikmi.

³⁰Nunga hupillit dalan hasintongan, angka uhummu nunga hubahen tu jolongku.

³¹Sai marsihohot do ahu di angka panindangionmu, unang tung paurak ahu, ale Jahowa.

³²Sai dalan ni angka tonami do tulusonku, ai nunga * dipalumbang Ho rohangku. [1498†] V.

³³Sai podahon ma tu ahu, ale Jahowa dalan ni angka aturanmi, asa huradoti * ro di ujung. [1499†]

³⁴Sai parroha i ahu, asa huradoti patikmi, jalahuhajongjongkon sian nasa roha!

³⁵Sai panonohon ma tu ahu dalan balobung ni angka tonami, ai lomo do rohangku disi. [1500†]

³⁶Sai paeleng ma rohangku tu angka panindangionmu, unang tung tu parhilangon. [1501†]

³⁷Sai pasalpu ma angka matangku, unang marnida na so gabeak, sai pangolu ma ahu hinorhon ni angka dalanmi. [1502†]

³⁸Hajongjongkon ma tu naposom bagabagam taringot tu biar maradophon Ho.

³⁹Sai pasalpu ma haurahonku, na huholsohon, ai denggan do angka uhummi.

⁴⁰Ida ma, sai huhalungunhon do angka parentami sai pangolu ma ahu hinorhon ni hatigoranmi. VI.

⁴¹Sai tolhas ma tu ahu angka asi ni roha, ale Jahowa, hatuaonmi pe hombar tu bagabagam.

⁴²Asa hualushon sada hata tu na mangelesi ahu, ai marhaposan tu hatam do ahu.

⁴³Jala unang tung paunsat situtu hata hasintongan i sian pamanganku, ni angka uhummi do na huhalungunhon. [1503†]

⁴⁴Sai tongtong do radotanku patikmi ro di saleleng ni lelengna.

⁴⁵Sai mardalani ma ahu di halambason, ai huharingkoti do angka parentam.

⁴⁶Sai hatahononku do angka panindangionmu di jolo ni angka raja jala ndang hailahononku. [1504†]

⁴⁷Sai dihahinsahon rohangku do tonami, angka na huhaholongi. [1505†]

⁴⁸Jala sai hupataretare do tanganku tu tonami, angka na huhaholongi, jala sai pingkirpingkiranku do angka aturanmi. VII.

⁴⁹Sai ingot ma hata tu naposom, na pinalungunhonmu tu ahu.

⁵⁰Sai on do sabam ni rohangku di * pardangolankon, ai bagabagami do + pangoluhon ahu. [1506†]

⁵¹Mansai eles situtu do angka na jungkat roha tu ahu, alai ndang manimbil anggo ahu sian patikmi.

⁵²Sai huingot do angka uhummu sian narobi, ale Jahowa, jadi sabam ma rohangku.

⁵³Marpiarpiar do murukku mida parjahat, angka na tumadingkon patikmi.

⁵⁴Jadi gabe endengku do angka aturanmi, di bagasan bagas paisolatanki.

⁵⁵Sai * huingoti do bornginna i goarmi, ale Jahowa, jala huradoti patikmi. [1507†]

⁵⁶On do na sorang tu ahu: Sai naeng radotanku angka parentam. VIII.

⁵⁷Parjambaranku do Ho, ale Jahowa, nunga pola hudok, sai radotanku do angka hatami. [1508†]

⁵⁸Marhuraja do ahu tu bohimi sian nasa roha, asi ma roham di ahu hombar tu bagabagam.

⁵⁹Nunga tung hutimbangi angka dalanku, jadi sai mulak tu angka panindangionmi do pathu.

⁶⁰Sai humalaput do ahu, jala ndang huhabendahon mangaradoti angka tonami.

⁶¹Sai dihaliangi angka aring ni angka parjahat i do ahu, ianggo patikmi ndang huhalupahon. [1509†]

⁶²Hehe do ahu tonga borngin laho mandok mauliate tu Ho ala ni angka uhum ni hatigoranmi. [1510†]

⁶³Aleale ni sude angka na mangkabiari Ho do ahu, ro di angka na mangaradoti angka parentam.

⁶⁴* Gok asi ni roham do tano on, ale Jahowa, sai podahon ma tu ahu angka aturanmi. [1511†] IX.

⁶⁵Nunga denggan uhummi dibahen Ho tu naposom, ale Jahowa, hombar tu hatami. [1512†]

⁶⁶Sai podahon ma tu ahu roha hapantason dohot parbinotoan na denggan, ai huhaporseai do angka tonami.

⁶⁷Tagan so tarjepol ahu, sai lilu do ahu, alai anggo nuaeng sai bagabagami do na huradoti. [1513†]

⁶⁸Denggan do Ho marroha jala pardengganbasa, sai ajarhon ma tu ahu angka aturanmi. [1514†]

⁶⁹Sai patubutubu gasa do angka na jungkat roha mangalo ahu, ianggo ahu sai radotanku do angka parentam sian nasa roha. [1515†]

⁷⁰Ndang mangilala rohanasida songon tabotabo, ianggo ahu patikmi do na huhahilashon. [1516†]

⁷¹Untungku do i na tarjepol i ahu, asa huguruhon angka aturanmi. [1517†]

⁷²Tagonan do di rohangku patik sian pamanganmi asa sere dohot perak marriburibu. [1518†] X.

⁷³Angka tanganmi do tumompa ahu jala pauliuli ahu, sai parroha i ahu, asa huguruhon angka tonami. [1519†]

⁷⁴Ia diida angka na mangkabiari Ho ahu, sai las ma rohanasida, ala na huhalungunhon hatami.

⁷⁵Nunga huboto, ale Jahowa, hatigoran do tongon angka uhummi, jala * mardongan haburjuon do dijepol Ho ahu. [1520†]

⁷⁶Sai apulapul tu ahu ma nian asi ni rohami hombar tu bagabagam tu naposom. [1521†]

⁷⁷Sai tolhas ma tu ahu angka asi ni roham, asa mangolu ahu, ai patikmi do na * huhahilashon. [1522†]

⁷⁸Sai tarurak ma angka na jungkat roha i ala dipatungki ahu marhitehite gabus; ianggo ahu, sai angka parentam do hupingkirpingkiri. [1523†]

⁷⁹Sai mulak tu ahu ma angka na mangkabiari Ho dohot angka na umboto angka panindangionmi.

⁸⁰Sai sisangunjur ma rohangku tu angka aturanmi, asa unang tarurak ahu. XI.

⁸¹Pola maheu rohangku dibahen siholna di hatuaonmi, sai hatami do na huhalungunhon. [1524†]

⁸²Pola do rambon angka matangku mangkalungunhon bagabagami, angka ninna do: Andigan pe ulaning apulonmu ahu?

⁸³Ai nunga pola doshon hajut bobak sinale ni timus ahu, ianggo angka aturanmi ndang huhalupahon. [1525†]

⁸⁴Pola piga ariari ni naposom? Andigan pe dabuonmu uhum tu angka na mangalotongi ahu?

⁸⁵Nunga pola dihali angka na jungkat roha i angka godung tu ahu, nasida angka na so marparange hombar tu patikmi. [1526†]

⁸⁶Hasintongan do sude angka tonami; pangansion dibahen nasida mangalotongi ahu; sai urupi ma ahu! [1527†]

⁸⁷Otik nari tung siap ahu bahenonnasida di tano on, alai laos so hutadingkon do angka parentam.

⁸⁸Sai pangolu ma ahu hombar tu asi ni roham, asa huradoti panindangion sian pamanganmi. [1528†] XII.

⁸⁹Ro di salelenglelengna do hot hatami di angka banua ginjang, ale Jahowa. [1529†]

⁹⁰Marsundutsundut do hasintonganmi, nunga dipaojak Ho tano on, jadi hot ma jongjong.

⁹¹Rasirasa sadarion sai hot do angka uhummu, ai angka naposom, do nasida saluhutna. [1530†]

⁹²Aut unang patikmi ma huhahilashon, nunga leleng mago ahu di pardangolankon. [1531†]

⁹³Ro di salelenglelengna do ndang tagamon halupahononku angka parentami ai marhitehite angka i do dipangolu Ho ahu. [1532†]

⁹⁴Gok di Ho do ahu, sai palua ma ahu, ai angka aturanmi do na hulului. [1533†]

⁹⁵Sai diaropi angka parjahat i do ahu, naeng agoonna ahu, sai angka panindangionmi do huparateatehon. [1534†]

⁹⁶Sai marujung do huida saluhutna pangabahan, mansai hangkam do ianggo tonami. XIII.

⁹⁷Mansai huhaholongi do patikmi, sai i do hupingkirpingkiri manipat ari. [1535†]

⁹⁸Bisukan do ahu sian angka musungku dibahen angka tonami, ai gok disi do ahu salelenglelengna. [1536†]

⁹⁹Marrohaan do ahu sian sude angka gurungku, ai sai angka panindangionmi do na huparateatehon.

¹⁰⁰Marrohaan do ahu sian angka natuatua, ai sai huradoti do angka parentam.

¹⁰¹Sai huambatambat do angka pathu sian nasa dalan na roa, asa huradoti hatami. [1537†]

¹⁰²Ndang dung manimbil ahu sian angka uhummi, ai nunga dipodai Ho ahu.

¹⁰³Tumonggi do bagabagami didai aruarungku sian situak ni loba di pamanganku. [1538†]

¹⁰⁴Binahen ni angka parentam do ahu marroha, ala ni do umbahen huhagigihon nasa dalan pangansion. [1539†] XIV.

¹⁰⁵Hatami do sulusulu ni pathu jala hatiuron di dalanku. [1540†]

¹⁰⁶Nunga pola huuarihon, jadi sai huhajongjongkon do: Mangaradoti angka uhum ni hatigoranmi.

¹⁰⁷Tarjepol situtu do ahu, sai pangolu ma ahu, ale Jahowa, hombar tu hatam. [1541†]

¹⁰⁸Sai halomohon ma, ale Jahowa, angka pelean pujipujian ni pamanganku sian nasa roha, jala ajarhon tu ahu angka uhummu! [1542†]

¹⁰⁹Sai tongtong do huhomolhomol tondingki di bagasan tanganku, jala ndang huhalupahon patikmi. [1543†]

¹¹⁰Sai ditaoni angka parjahat i do jorgong tu ahu, alai laos so manimbil do ahu sian angka parentam. [1544†]

¹¹¹Angka panindangionmi do hubahen parjambaranku salelenglelengna, ai hahilason ni rohangku do angka i.

¹¹²Sai hupaunduk do rohangku, laho mangulahon angka aturanmi salelenglelengna ro di ujung sogot. XV.

¹¹³Sai * huhagigihon do angka simeoleol, jala huhaholongi patikmi. [1545†]

¹¹⁴Pangondianku jala lombulombungku do Ho, sai hatami do na huhalungunhon. [1546†]

¹¹⁵Sumurut ma sian ahu, hamu ale angka parjahat i, sai angka tona ni Debatangku do radotanku.

¹¹⁶Sai tiopi ahu hombar tu bagabagam, asa mangolu ahu, jala sai unang loas ahu tarurak mida na hinirim ni rohangku. [1547†]

¹¹⁷Sai sande ma ahu, asa martua ahu, asa tongtong huhahilashon angka aturanmi. [1548†]

¹¹⁸Diparhamuda roham do sude angka na manimbil sian angka aturanmi, ai gabus do sipaotooto binahennasida i.

¹¹⁹Disiaphon Ho do sude angka parjahat ni tano on, hira gubogubo, dibahen i huhaholongi do angka panindangionmi.

¹²⁰Manindang do imbulungku panonditnonditon mida Ho, jala huhabiari do angka uhummi. XVI.

¹²¹Sai huulahon do uhum dohot hatigoran, sai unang loas ahu rupaon ni angka siulahon gogo mangalo ahu!

¹²²Sai ondihon ma naposom tu na denggan, asa unang dirupa angka na jungkat roha i ahu. [1549†]

¹²³Pola do rambon angka matangku mangkalungunhon hatuaonmi dohot bagabaga ni hatigoranmi.

¹²⁴Bahen ma tu naposom hombar tu asi ni roham, jala podahon tu ahu angka aturanmi. [1550†]

¹²⁵Naposom do ahu, sai parroha i ma ahu, asa huboto angka panindangionmi.

¹²⁶Nunga jumpang tingki ni Jahowa painonahon uhum, ai nunga ditorbangi halak angka patikmi.

¹²⁷Ala ni do umbahen na huhaholongi angka tonami lobi sian sere, tongon tahe lobi sian sere palangki. [1551†]

¹²⁸Ala ni do umbahen huparhatongon salulut angka parentam di saluhutna, sai huhagigihon do nasa lapang pangansion. XVII.

¹²⁹Tung na sumurung do angka panindangionmi, ala ni do umbahen diradoti rohangku angka i. [1552†]

¹³⁰Pangungkapon di angka hatami do patiur parnidaan, marrohaihon angka na oto. [1553†]

¹³¹Sai hupangangang do pamanganku jala marhoi, ai angka tonami do na huhauashon.

¹³²Sai dompakkon ma ahu, jala asi ma roham di ahu, mangihuthon uhum tu angka na mangkaholongi goarmi.

¹³³Sai * pahot ma langkalangkangku marhitehite bagabagam, jala unang loas dirajai manang hajahaton dia ahu! [1554†]

¹³⁴Sai palua ma ahu sian pangarupaon ni jolma, asa huradoti angka parentam!

¹³⁵Sai bahen ma bohim marsinondang tu naposom, jala podahon tu ahu angka aturanmi.

¹³⁶Sai mabakbak do ilu ni matangku hira pansur, ala so diradoti halak angka patikmi. XVIII.

¹³⁷Nabonar do Ho, ale Jahowa, jala na tigor do angka uhummu.

¹³⁸Nunga tung ditingtingkon Ho paboa hatigoran do angka panindangionmu jala hasintongan situtu.

¹³⁹Ngaetan do ahu dibahen hajugulonki, ala dihalupahon angka alongku angka hatami. [1555†]

¹⁴⁰Na pinindan situtu do bagabagami, jadi holong roha ni naposom disi. [1556†]

¹⁴¹Metmet pe ahu jala lea, ianggo angka parentam ndang dung huhalupahon. [1557†]

¹⁴²Hatigoran ro di salelenglelengna do hatigoranmu, jala hasintongan do patikmi.

¹⁴³Songgop pe hagogotan dohot hasusaan tu ahu, ianggo angka tonami sai huhahilashon do. [1558†]

¹⁴⁴Sai hatigoran do angka panindangionmi ro di salelenglelengna, parroha i ahu, asa mangolu ahu. XIX.

¹⁴⁵Sai joujou do ahu sian nasa roha, sai alusi ma ahu, ale Jahowa; sai radotanku do angka aturanmi.

¹⁴⁶Sai joujou ahu tu Ho: Tumpahi ma ahu! Asa sai huradoti angka panindangionmi.

¹⁴⁷Hujoloani do * buha siang ari asa maungaung, angka hatami do huhalungunhon. [1559†]

¹⁴⁸Dijoloani angka matangku do angka gansi borngin, naeng mamingkirmingkiri bagabagami. [1560†]

¹⁴⁹Sai tangihon ma soarangki hombar tu asi ni roham, sai pangolu ma ahu, ale Jahowa, hombar tu angka uhummi. [1561†]

¹⁵⁰Dumonokdonok do angka sieahi hajahaton, holang do nasida sian patikmi.

¹⁵¹Donok do Ho, ale Jahowa, jala * hasintongan do sude angka tonami. [1562†]

¹⁵²Tibu hian do huboto sian angka panindangionmi, paboa Ho paojakkon angka i ro di salelenglelengna. XX.

¹⁵³Sai tatap ma pardangolankon, jala palua ahu, ai * ndang huhalupahon patikmi. [1563†]

¹⁵⁴Badahon ma parbadaanki, jala palua ahu, sai pangolu ma ahu ala ni bagabagami.

¹⁵⁵Mandao do hatuaon sian angka parjahat, ai ndang dilului nasida angka aturanmi.

¹⁵⁶Torop do angka asi ni roham, ale Jahowa, sai pangolu ma ahu hombar tu angka uhummi.

¹⁵⁷Torop do angka silotongi dohot sisosak ahu, laos so manimbil do ahu sian angka panindangionmi.

¹⁵⁸Huida angka parjehe, jadi gine ateatengku, ala so diradoti nasida bagabagami.

¹⁵⁹Sai tatap ma, ai sai huhaholongi do angka parentam, ale Jahowa, sai pangolu ma ahu hombar tu asi ni roham.

¹⁶⁰* Hasintongan do pangarimpunan ni hatam, jala ro di salelenglelengna do nasa uhum ni hatigoranmi. [1564†] XXI.

¹⁶¹Dilotongi angka raja do ahu soada alana, alai holan * hatami do dihabiari rohangku. [1565†]

¹⁶²Marhilas ni roha do ahu ala ni bagabagami, songon halak na jumpangan godang taban. [1566†]

¹⁶³Huhagigihon jala huhabiashon do sipaotooto, huhaholongi do ianggo patikmi.

¹⁶⁴Pitu hali di na sadari hupuji Ho, ala ni angka uhum ni hatigoranmi. [1567†]

¹⁶⁵Mardame situtu do angka na mangkaholongi patikmi, jala ndang adong partuktuhan di nasida. [1568†]

¹⁶⁶Sai huhalungunhon do hatuaonmi, ale Jahowa, jala huulahon angka tonami. [1569†]

¹⁶⁷Sai diradoti rohangku do angka panindangionmi, jala huhaholongi situtu angka i.

¹⁶⁸Sai huradoti do angka parentam dohot panindangionmi, ai di jolom do saluhut angka dalanku. [1570†] XXII.

¹⁶⁹Sai loas ma alualungku dumonok tu bohim, ale Jahowa, sai parroha i ma ahu hombar tu hatam.

¹⁷⁰Sai tolhas tujolo ni bohim ma angguhangguk i, sai palua ma ahu hombar tu bagabagam.

¹⁷¹Sai marbulakkon pujipujian ma angka bibirhu, ala dipodahon Ho angka aturanmi tu ahu.

¹⁷²Sai * tariashonon ni dilangku do bagabagami, ai hatigoran do angka tonami saluhutna. [1571†]

¹⁷³Sai ditumpahi tanganmi ma ahu, ai nunga hupillit angka parentam.

¹⁷⁴Sai dihalungunhon rohangku do hatuaonmi, ale Jahowa, jala patikmi do hasudungan ni rohangku. [1572†]

¹⁷⁵Sai mangolu ma tondingku, asa Ho dipuji, jala ditumpahi angka uhummu ma ahu!

¹⁷⁶Nalilu do ahu, * songon birubiru na mago, sai lulu i ma naposom, ai ndang + huhalupahon angka tonami. [1573†]